ତୁଷୁରା, (କେପିଏନ୍ଏସ୍) : ଗୁଡଭେଲା ବ୍ଲକ ଅଧୀନସ୍ଥ ତୁଷୁରା ଏନ୍.ଏ.ସି. କ୍ଲଷ୍ଟରର ଅଷ୍ଟମ ମାସିକ ବୈଠକ ବୁରୋମାଲ ପ୍ରାଥମିକ ବିଦ୍ୟାଳୟ ପରିସରରେ ସ୍ଥାନୀୟ ପ୍ରଧାନ ଶିକ୍ଷୟିତ୍ରୀ ସଂଯୁକ୍ତା ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏଥିରେ ସିଆର୍ସିସି ଜଗମୋହନ ତ୍ରିପାଠୀ ମୁଖ୍ୟ ଅତିଥି ଭାବେ ଯୋଗଦେଇ ଦୀପ ପ୍ରଜ୍ୱଳନ ପୂର୍ବକ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ । ତତ୍ପରେ ସେ ବ୍ଲକର କେତେକ ଗୁରୁତ୍ଵପୂର୍ଣ୍ଣ ଏଜେଣ୍ଡା ଉପରେ ଆଲୋଚନା କରିଥିଲେ । ସାଧନ କର୍ମୀ ତଥା ତୁଷୁରା ବାଳକ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ହେମନ୍ତ କୁମାର ଦାଶ ଜାନୁଆରୀ ମାସର ମାସିକ ବୈଠକର ଏଜେଣ୍ଡା ଉପରେ ବୈଠକ ପରିଚାଳନା କରିଥିଲେ । ବିଦ୍ୟାଳୟ ତରଫରୁ ସମସ୍ତଙ୍କୁ ସ୍ୱାଗତ କରାଯାଇଥିଲା । ସମସ୍ତ ଅଂଶ ଗ୍ରହଣକାରୀ ସ୍କୁଲ ପରିଦର୍ଶନ କରିବା ପରେ ବିଦ୍ୟାଳୟର ଶୈକ୍ଷିକ ଓ ଭୌତିକ ପରିବେଶର ସ୍ଥିତି ଉପରେ ଆଲୋଚନା କରିଥିଲେ । ମୌଳିକ ସାକ୍ଷରତା ଉପରେ ଏଫ୍ଏଲ୍ଏନ୍ ଶିକ୍ଷକ ତହସିଲ ଭୋଇ, ଚନ୍ଦ୍ରଧ୍ୱଜ ମେହେର ଓ ପୂରନ ମେହେର ଶିକ୍ଷାଦାନ ଦେଇଥିବା ବେଳେ ମୌଳିକ ସଂଖ୍ୟାଜ୍ଞାନ ଉପରେ ଗିରିଜା ଦୀପ, ଗୀତାଞ୍ଜଳି ପ୍ରଧାନ ଓ ପ୍ରଶାନ୍ତି ଦାସ ଶିକ୍ଷାଦାନ ଦେଇଥିଲେ । ଏଥିରେ ପ୍ରଧାନ ଶିକ୍ଷକ ଦୁତିଆ ସେଠ, ମନ୍ମଥ ରାଜହଂସ, ବିଦ୍ୟୁତ ଲତା ସାହୁ, ଦୁର୍ଗାମଣି ମହାନନ୍ଦ, ମହାନନ୍ଦ ପ୍ରମୁଖ ସକ୍ରିୟ ଅଂଶ ଗ୍ରହଣ କରିଥିଲେ । ଶେଷରେ ଶିକ୍ଷକ ଅନ୍ତର୍ଯ୍ୟାମୀ ସାହୁ ଧନ୍ୟବାଦ ଅର୍ପଣ କରିଥିଲେ ।