ନୂଆପଡ଼ା, (କେପିଏନ୍ଏସ୍) : ନୂଆପଡ଼ା ଜିଲ୍ଲା ପୁଲିସ ଏକ ଆନ୍ତଃରାଜ୍ୟ ବାଇକ ଚୋରି ରାକେଟ ଠାବ କରିଛି । ଏଥିରେ ୧୭ଟି ବାଇକ ଜବତ ହେବା ସହ ସିନାପାଲି ଥାନା ହଳଦୀମୁଣ୍ଡା ଗାଁର ବନମାଳି କୋଲଥ୍ଆ (୩୮) ଓ ପର୍ଶୁରାମ ମାଝି ଓରଫ ପରଶୁ (୩୨), ତାଲାକୋଟ ଗାଁର ବାସୁଦେବ ମାଝି ଓରଫ ବାସୁ (୨୪) ପ୍ରମୁଖ ୩ଜଣ ଅଭିଯୁକ୍ତଙ୍କୁ ଗିରଫ କରିଥିବା ଏସ୍ପି ଜି.ଆର୍ ରାଘବେନ୍ଦ୍ର ସୂଚନା ଦେଇଛନ୍ତି । ଗତ ମାର୍ଚ୍ଚ ୨୪ରେ ନୂଆପଡ଼ା ଥାନା ହଳଦୀ ଗାଁର ଗୋବିନ୍ଦ ପାଣ୍ଡେଙ୍କ ସ୍ତ୍ରୀ ଅସୁସ୍ଥ ହେବାରୁ ଚିକିତ୍ସା ପାଇଁ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ୨୫ ତାରିଖ ସକାଳୁ ଗୋବିନ୍ଦଙ୍କ ବାଇକ ହସ୍ପିଟାଲ ପରିସରରୁ ଚୋରି ହୋଇଥିଲା । ଏନେଇ ଗୋବିନ୍ଦ ନୂଆପଡ଼ା ଥାନାରେ ଲିଖିତ ଅଭିଯୋଗ ପରେ ପୁଲିସ ତଦନ୍ତ ଆରମ୍ଭ କରିଥିଲା । ଗତ ୨୬ ତାରିଖ ସନ୍ଧ୍ୟାରେ ଜିଲ୍ଲା ମୁଖ୍ୟ ଚିକିତ୍ସାଳୟର ଜଣେ ବ୍ୟକ୍ତିଙ୍କ ବାଇକ ଚୋରି କରୁଥିବା ବେଳେ ହସ୍ପିଟାଲ କର୍ତ୍ତୃପକ୍ଷ ପର୍ଶୁଙ୍କୁ କାବୁ କରି ପୁଲିସ ଜିମା ଦେଇଥିଲେ । ପର୍ଶୁକୁ ପୁଲିସ ଅଧିକ ପଚରାଉଚୁରା କରି ତଦନ୍ତ ପ୍ରକ୍ରିୟା ଆଗକୁ ବଢିଥିଲା । ହଳଦୀମୁଣ୍ଡା ଗାଁର ମୁଖ୍ୟ ଅଭିଯୁକ୍ତ ବନମାଳିଙ୍କ ନେତୃତ୍ଵରେ ଛତିଶଗଡ଼ ସମେତ ନୂଆପଡ଼ା, କଳାହାଣ୍ଡି ଓ ନବରଙ୍ଗପୁର ଜିଲ୍ଲାରେ ବାଇକ ଚୋରି ରାକେଟ କାମ କରୁଥିବା ପୁଲିସକୁ ସୂଚନା ମିଳିଥିଲା । ନୂଆପଡ଼ା ଏସ୍ପି ରାଘବେନ୍ଦ୍ରଙ୍କ ନିର୍ଦ୍ଦେଶକ୍ରମେ ନୂଆପଡ଼ା ଆଇଆଇସି ଗଙ୍ଗାଧର ମେହେରଙ୍କ ନେତୃତ୍ଵରେ ଏକ ସ୍ଵତନ୍ତ୍ର ପୁଲିସ ଟିମ୍ ଛାନ୍ଭିନ୍ ଆରମ୍ଭ କରିଥିଲା । ଗତକାଲି ସିନାପାଲି ଅଞ୍ଚଳରେ ସ୍ଵତନ୍ତ୍ର ପୁଲିସ ଟିମ୍ ଚଢାଉ କରି ବାଇକ ଚୋର ଗ୍ୟାଙ୍ଗର ମୁଖ୍ୟ ଅଭିଯୁକ୍ତ ବନମାଳି ଓ ବାସୁଦେବଙ୍କୁ ଗିରଫ କରିଥିଲା । ସେମାନଙ୍କ ଠାରୁ ପୁଲିସ ୧୭ଟି ବାଇକ ଜବତ କରିଥିଲେ । ସନ୍ଧ୍ୟାରେ ପୁଲିସ ହଳଦୀ ଗାଁର ଗୋବିନ୍ଦଙ୍କୁ ଚୋରି ବାଇକ ଫେରାଇ ଦେଇଥିଲା । ଆନ୍ତଃରାଜ୍ୟ ବାଇକ ଚୋର ଗ୍ୟାଙ୍ଗ ଜନଗହଳି ସ୍ଥାନରୁ ଚୋରିକରି ଖସି ଯାଉଥିଲା । ଓଡ଼ିଶାରୁ ବାଇକ ଚୋରି କରି ଛତିଶଗଡ଼ରେ ବିକ୍ରି କରୁଥିଲେ । ଛତିଶଗଡ଼ରେ ବାଇକ ଚୋରି କରି ଓଡ଼ିଶାରେ ବିକ୍ରି କରୁଥିଲେ । ଚୋରମାନେ ତାର ଓ ଟ୍ରାନ୍ଜିଷ୍ଟର ସଂଯୋଗ କରି ବାଇକକୁ ଷ୍ଟାଟ କରି ନେଇଯାଉଥିଲେ । ଯେଉଁ ବାଇକରେ ହେଣ୍ଡଲ ଲକ୍ ହେଉନଥିଲା, ତାକୁ ଆରାମରେ ଚୋରି କରୁଥିଲେ । ଜବତ ୧୭ଟି ବାଇକର ମାଲିକଙ୍କ ନାଁ ଚିହ୍ନଟ କରି ଆଖପାଖ ଅଞ୍ଚଳର ଥାନାକୁ ସୂଚନା ଦିଆଯାଇଛି । ପରବର୍ତ୍ତି ସମୟରେ ଚୋରି ବାଇକକୁ ସମ୍ପୃକ୍ତ ମାଲିକଙ୍କୁ ହସ୍ତାନ୍ତର କରାଯିବ ବୋଲି ଏସ୍ପି କହିଛନ୍ତି । ସନ୍ଧ୍ୟାରେ ସମସ୍ତ ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇ ଥିବାବେଳେ ଜାମିନ ନାମଞ୍ଜୁର ହେବାରୁ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।