ବାରିପଦା, (ଦେବସ୍ମିତ ଚୌଧୁରୀ) : ଦିନକୁ ଦିନ ଗ୍ରୀଷ୍ମ ପ୍ରବାହ ବୃଦ୍ଧି ହେତୁ ଓସ୍ୱାନ ହଲଠାରେ ଆଭାସୀ ମାଧ୍ୟମରେ ଜିଲ୍ଲାପାଳ ତଥା ଜିଲ୍ଲା ବିପର୍ଯ୍ୟୟ ପରିଚାଳନା କର୍ତୃପକ୍ଷ ଅଧ୍ୟକ୍ଷ ହେମକାନ୍ତ ସୟଙ୍କ ଅଧ୍ୟକ୍ଷତାରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ଗ୍ରୀଷ୍ମ ପ୍ରବାହରେ ଯେପରି ଜନ ଜୀବନ ପ୍ରଭାବିତ ନହୁଏ ସେଥିପାଇଁ ସ୍ୱାସ୍ଥ୍ୟ ସେବା, ପାନୀୟ ଜଳ ଯୋଗାଣ, ବିଦ୍ୟୁତ ଯୋଗାଣ, ଶ୍ରମ, ପରିବହନ, ପ୍ରାଣୀ ସମ୍ପଦ ଓ କୃଷି କ୍ଷେତ୍ରରେ ଆବଶ୍ୟକ ସତର୍କତା ଅବଲମ୍ବନ କରିବା ପାଇଁ ଜିଲ୍ଲାପାଳ ପରାମର୍ଶ ଦେଇଥିଲେ । ଏସ ଆର ସି ଏବଂ ଓଡିଶା ବିପର୍ଯ୍ୟୟ ପରିଚାଳନା କର୍ତୃପକ୍ଷଙ୍କ ଦ୍ୱାରା ଜାରି ହୋଇଥିବା ପ୍ରତିଷେଧାତ୍ମକ ପଦକ୍ଷେପ କଡାକଡ଼ି ଭାବେ ଅନୁପାଳନ କରିବା ପାଇଁ ବିଭିନ୍ନ ବିଭାଗ ଅଧିକାରୀଙ୍କୁ ଜିଲ୍ଲାପାଲ ନିର୍ଦ୍ଦେଶ ଦେଇଛନ୍ତି । ଦିନକୁ ଦିନ କ୍ରମଶଃ ଖରା ବଢୁ ଥିବାରୁ ଗ୍ରାମାଞ୍ଚଳରୁ ସହରାଞ୍ଚଳ ପର୍ଯ୍ୟନ୍ତ ବିଭିନ୍ନ ସ୍ଥାନରେ ଅଧିକରୁ ଅଧିକ ଜଳଛତ୍ର ଖୋଲିବ ସହ ପର୍ଯ୍ୟାପ୍ତ ପରିମାଣରେ ଓଆରଏସ ପ୍ୟାକେଟ ମହଜୁଦ ରଖିବା ପାଇଁ ନିର୍ଦ୍ଦେଶ ଦେଇଛନ୍ତି । ବିଶେଷ କରି ଜାତୀୟ ରାଜପଥ ଓ ରାଜପଥ ପାର୍ଶ୍ୱବର୍ତ୍ତୀ ଅଂଚଳ ଯେଉଁ ଜାଗାରେ ପାଣିର ସହଜ ଉପଲବ୍ଧ ନାହିଁ ସେଇ ସବୁ ସ୍ଥାନ ରେ ସ୍ଥାନେ ସ୍ଥାନେ ଜଳଛତ୍ର ଖୋଲିବା ସହ ପର୍ଯ୍ୟାପ୍ତ ପରିମାଣର ଓଆରଏସ ପ୍ୟାକେଟ ଓ ବରଫ ବାକ୍ସ ରଖିବା ପାଇଁ ନିର୍ଦ୍ଦେଶ ଦେଇଛନ୍ତି । ରାସ୍ତାରେ ଯାନବାହନରେ ଯାଉଥିବା ଲୋକ ବା ପଥିକ ଜଳଛତ୍ର ସ୍ଥାନ ସମ୍ବନ୍ଧରେ ସହଜରେ ଜାଣିବା ପାଇଁ ଦୂରରୁ ଦୃଶ୍ୟମାନ ହେଉଥିବା ବଡ଼ ସାଇନ ବୋର୍ଡ ଲଗାଇବା ପାଇଁ ପରାମର୍ଶ ଦେଇଛନ୍ତି । ଲୋକମାନଙ୍କ ସୁବିଧା ପାଇଁ ରାସ୍ତା ପାର୍ଶ୍ୱବର୍ତ୍ତୀ ପ୍ରତ୍ୟେକ ଜଳଛତ୍ର କେନ୍ଦ୍ରରେ ନିକଟବର୍ତ୍ତୀ ପି ଏଚ ସି/ସି ଏଚ ସି /ଏସ ଡି ଏଚ /ଡି ଡି ଏଚ ର ଦୂରତା ସମ୍ବନ୍ଧିତ ସୂଚନା ସହିତ ରଜ୍ଞରକ୍ସଶରଦ୍ଭମଚ୍ଚ ନମ୍ବର ସମ୍ପର୍କରେ ସୂଚନା ଫଳକ ଲଗାଇବା ପାଇଁ ନିର୍ଦ୍ଦେଶ ଦେଇଛନ୍ତି । ଜିଲ୍ଲା, ଉପଖଣ୍ଡ ଓ ବ୍ଲକ ସଦର ମହକୁମାର କାର୍ଯ୍ୟାଳୟ ପରିସରରେ ଥଣ୍ଡା ପିଇବା ପାଣି ଉପଲବ୍ଧ କରାଇବା ସହିତ କାର୍ଯ୍ୟାଳୟ ସମ୍ମୁଖ ଓ ବିଭିନ୍ନ ପ୍ରମୁଖ ଅଂଚଳ ମାନଙ୍କରେ ଉନ୍ନତ ମାନର ଜଳଛତ୍ର ଖୋଲିବା ପାଇଁ ନିର୍ଦ୍ଦେଶ ଦେଇଛନ୍ତି ଏତଦ ବ୍ୟତୀତ ଜିଲ୍ଲାର ପ୍ରତ୍ୟେକ ସ୍ୱାସ୍ଥ୍ୟକେନ୍ଦ୍ରରେ ପର୍ଯ୍ୟାପ୍ତ ପରିମାଣ ଓଆରଏସ, ଫାଷ୍ଟ ଏଡ଼ ଓ ଜୀବନ ରକ୍ଷାକାରୀ ଔଷଧ ମହଜୁଦ ରଖିବା ସହିତ ଅଂଶୁଘାତ ପ୍ରକୋଷ୍ଠକୁ କାର୍ଯ୍ୟକ୍ଷମ କରିବା ପାଇଁ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ପରାମର୍ଶ ଦେଇଛନ୍ତି । ଜିଲ୍ଳାର ସ୍ୱାସ୍ଥ୍ୟ କେନ୍ଦ୍ର ମାନଙ୍କରେ ୨୪ଢ୭ ନିୟନ୍ତ୍ରଣ କକ୍ଷ ଖୋଲିବା ସହ ଜିଲ୍ଲା ନିୟନ୍ତ୍ରଣ କକ୍ଷ, ଜ଼ିଲ୍ଲା ପରିଷଦ, ବ୍ଲକ, ତହସିଲ, ପୌରପାଳିକା, ବିଜ୍ଞାପିତ ଅଂଚଳ ପରିଷଦ ଆର ଡବ୍ଲ୍ୟୁ ଏସ ଏସ ଇତ୍ୟାଦି ସରକାରୀ କାର୍ଯ୍ୟାଳୟରେ ୨୪ଙ୍ଘ୭ ନିୟନ୍ତ୍ରଣ କକ୍ଷ କାର୍ଯ୍ୟକ୍ଷମ କରିବା ପାଇଁ ନିର୍ଦ୍ଦେଶ ଦିଆଯାଇଛି । ସେହିପରି ଗ୍ରାମାଞ୍ଚଳରେ ଅଚଳ ନଳକୂପ ଗୁଡିକ ଯଥାଶୀଘ୍ର ପୁନଃ କାର୍ଯ୍ୟକ୍ଷମ କରିବା ପାଇଁ ଗ୍ରାମ୍ୟ ଜଳ ଯୋଗାଣ ଯନ୍ତ୍ରୀଙ୍କୁ ପରାମର୍ଶ ଦିଆଯାଇଛି । ଗ୍ରାମ୍ୟ ଜଳ ଯୋଗାଣ ଓ ବ୍ଲକ କତୃପକ୍ଷ ମିଳିତ ଭାବେ ଗ୍ରାମ୍ୟ ଜଳ ଯୋଗାଣ ବ୍ୟବସ୍ଥା ଅନୁଧ୍ୟାନ କରିବା ସହ ଜିଲ୍ଲାର ବିଭିନ୍ନ ଗ୍ରାମାଞ୍ଚଳକୁ ଯାଇ ପାଇପ ଜଳ ଯୋଗାଣ ତଦାରଖ କରିବାକୁ ନିର୍ଦ୍ଦେଶ ଦିଆଯାଇଛି । ଜଳକ୍ଲୀଷ୍ଟ ଅଂଚଳ ଗୁଡିକ ଚିହ୍ନଟ କରି ଉକ୍ତ ଅଂଚଳର ଲୋକଙ୍କୁ ଟ୍ୟାଙ୍କର ଯୋଗେ ପିଇବା ପାଣି ଯୋଗାଇ ଦେବା ପାଇଁ ବୈଠକରେ ସ୍ଥିର ହୋଇଥିଲା । ନିର୍ଧାରିତ ସମୟ ନିର୍ଘଣ୍ଟ ଅନୁପାଳନ ପୂର୍ବକ ଶ୍ରମିକ ମାନଙ୍କୁ ଯେପରି ପ୍ରଚଣ୍ଡ ଦ୍ୱିପହରରେ ଦିବା ୧୧-୦୦ ଘଟିକା ଠାରୁ ଅପରାହ୍ନ ୩-୦୦ ଘଟିକା ପର୍ଯ୍ୟନ୍ତ କୌଣସି ନିର୍ମାଣ କାର୍ଯ୍ୟ ତଥା ଅନ୍ୟାନ୍ୟ ଅଧିକ ପରିଶ୍ରମ କାର୍ଯ୍ୟରେ ଶ୍ରମିକ ନିୟୋଜିତ କରାନଯାଏ ସେ ସମ୍ଭନ୍ଧରେ ଜିଲ୍ଲା ଶ୍ରମ ଅଧିକାରୀଙ୍କୁ ଅନୁଧ୍ୟାନ କରିବାକୁ ନିର୍ଦ୍ଦେଶ ଦିଆଯାଇଛି । ଯାତ୍ରୀବାହୀ ବସଗୁଡିକ ରେ ପାନୀୟ ଜଳ, ଓଆରଏସ ପ୍ୟାକେଟ, ଆଇସ ବାକ୍ସ ଏବଂ ଆଶୁ ଚିକିତ୍ସା ସାମଗ୍ରୀ ମହଜୁଦ ରଖିବା ପାଇଁ ବସ ମାଲିକ ତଥା ବସ ମାଲିକ ସଙ୍ଘର କର୍ମକର୍ତ୍ତାଙ୍କୁ ପରାମର୍ଶ ଦିଆଯାଇଛି । ଆବଶ୍ୟକ ସ୍ଥଳେରେ ଦିବା ୧୧ ଘଟିକା ଠାରୁ ଅପରାହ୍ନ ୩ ଘଟିକା ମଧ୍ୟରେ କେବଳ ଶୀତତାପ ନିୟନ୍ତ୍ରିତ (ଏସି )ବସ ଚଳାଚଳ କରାଇ ସାଧାରଣ ବସ ଚଳାଚଳକୁ ବନ୍ଦ ରଖିବା ଏବଂ ଖୋଲା ଗାଡ଼ିରେ ଯାତ୍ରୀ ପରିବହନ ତଥା ଓଭର ଲୋଡିଂ ରୋକିବା ପାଇଁ ଆର.ଟି.ଓ/ଏ.ଆର.ଟି.ଓ ଙ୍କୁ ନିର୍ଦ୍ଦେଶ ଦିଆଯାଇଛି । ଟ୍ରକ ଡ୍ରାଇଭର ଓ ଅନ୍ୟାନ୍ୟ ଗାଡି ଚାଳକଙ୍କ ବିଶ୍ରାମ ପାଇଁ ଜାତୀୟ ରାଜପଥ ପାର୍ଶ୍ଵବର୍ତ୍ତୀ ଜାଗାରେ ସ୍ଥାନେ ସ୍ଥାନେ ଚାଳିଆ (ସେଡ) ନିର୍ମାଣ କରାଇବା ପାଇଁ ଆର ଟି ଓଙ୍କୁ ନିର୍ଦ୍ଦେଶ ଦିଆଯାଇଛି । ଅତ୍ୟନ୍ତ ଜରୁରୀ ଆବଶ୍ୟକତା ନଥିଲେ ବିଦ୍ୟୁତ ନକାଟିବାକୁ ଟାଟା ପାୱାର କତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି । ବିଦ୍ୟୁତ କାଟ ପାଇଁ ପାନୀୟ ଜଳ ଯୋଗାଣରେ ଯେମିତି କୌଣସି ପ୍ରକାର ବ୍ୟାଘାତ ସୃଷ୍ଟି ନହୁଏ ସେଥିପ୍ରତି ଧ୍ୟାନ ଦେବା ସହିତ ଅନ୍ତତଃ ପକ୍ଷେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ସମୟରେ ବିଦ୍ୟୁତ କାଟ ନକରିବାକୁ ଟାଟା ପାୱାର କତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି । ବାରିପଦା ଓ ରାଇରଙ୍ଗପୁର ପୌରପାଳିକା ସହିତ ଉଦଳା ଓ କରଞ୍ଜିଆ ବିଜ୍ଞାପିତ ଅଂଚଳ ପରିଷଦ ଅଧିନସ୍ଥ ବିଭିନ୍ନ ସ୍ଥାନରେ ଯଥା ବସ ଷ୍ଟାଣ୍ଡ, ରେଳ ଷ୍ଟେସନ, ହାଟ, ବଜାର ଇତ୍ୟାଦି ଜନଗହଳି ସ୍ଥାନ ମାନଙ୍କରେ ଜଳ ଛତ୍ର ଖୋଲିବା ସହିତ ଓ ଆର ଏସ ପ୍ୟାକେଟ, ଆଇସ ବକ୍ସ ଫାଷ୍ଟ ଏଡ଼ ରଖିବା ପାଇଁ ସମ୍ପୃକ୍ତ କାର୍ଯ୍ୟ ନିର୍ବାହୀ ଅଧିକାରୀଙ୍କୁ ପରାମର୍ଶ ଦିଆଯାଇଛି । ତହସିଲଦାର, ଗୋଷ୍ଠୀ ଉନ୍ନୟନ ଅଧିକାରୀ ଓ ସରପଞ୍ଚ ମାନେ ନିଜସ୍ୱ ପାଣ୍ଠିରେ ଜଳଛତ୍ର ଖୋଲି ପାରିବେ ଏବଂ ଏଥିରେ ଏନ ଜି ଓ ଏବଂ ସିଭିଲ ସୋସାଇଟି ମାନଙ୍କୁ ମଧ୍ୟ ସାମିଲ କରିବା ପାଇଁ ଜିଲ୍ଲାପାଳ ପରାମର୍ଶ ଦେଇଥିଲେ । ଦିବା ୧୧ ଘଟିକାରୁ ଅପରାହ୍ନ ୩ ଘଟିକା ପର୍ଯ୍ୟନ୍ତ ହାଟ, କୌଣସି ସଭା, ଶୋଭାଯାତ୍ରା ଇତ୍ୟାଦିର ଆୟୋଜନ କରିବା ପାଇଁ ଅନୁମତି ନଦେବାକୁ ସମ୍ପୃକ୍ତ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ସେହିପରି ଆକସ୍ମିକ ଅଗ୍ନିକାଣ୍ଡକୁ ପ୍ରତିରୋଧ କରିବା ଦିଗରେ ଅଗ୍ନିଶମ ସେବା ଅଧିକାରୀଙ୍କୁ ସମସ୍ତ ଆନୁସଙ୍ଗିକ ଅଗ୍ନି ନିର୍ବାପକ ଉପକରଣ ପ୍ରସ୍ତୁତ ରଖିବା ସହିତ ବଡ ବଡ ହୋଟେଲ, ମଲ ଇତ୍ୟାଦିରେ ଅଗ୍ନି ନିରାପତ୍ତା ପ୍ରମାଣ ପତ୍ର ଯାଞ୍ଚ କରିବା ପାଇଁ ନିର୍ଦ୍ଦେଶ ଦିଆହେଇଛି । ବନାଗ୍ନିକୁ ରୋକିବା ପାଇଁ ଜଙ୍ଗଲ ପାର୍ଶ୍ଵବର୍ତ୍ତୀ ଅଂଚଳରେ ବସବାସ କରୁଥିବା ଲୋକମାନଙ୍କୁ ସଚେତନ କରାଇ ଜଙ୍ଗଲ ସମ୍ପଦକୁ ସୁରକ୍ଷିତ ରଖିବା ପାଇଁ ବନଖଣ୍ଡ ଅଧିକାରୀ ମାନଙ୍କୁ ପରାମର୍ଶ ଦିଆଯାଇଛି । ଅତ୍ୟନ୍ତ ଆବଶ୍ୟକତା ନଥିଲେ ଖରାରେ ବାହାରକୁ ନବାହାରିବା, ଅତ୍ୟାବଶ୍ୟକ କ୍ଷେତ୍ରରେ ବାହାରକୁ ଯିବାର ଥିଲେ ପ୍ରଚୁର ପରିମାଣ ପାଣି, ଘୋଳ ଦହି, ଲେମ୍ବୁ ପାଣି ଇତ୍ୟାଦି ପିଇବା ଏବଂ ସଙ୍ଗରେ ପିଇବା ପାଣି ନେବା, ଛତା, କଳା ଚଷମା, ଟୋପି ବ୍ୟବହାର କରିବା ତଥା ଗ୍ରୀଷ୍ମ ପ୍ରବାହ ସମୟରେ କ’ଣ କ’ଣ କରିବା ଉଚିତ ଏବଂ କ’ଣ କ’ଣ ନକରିବା ଇତ୍ୟାଦି ବିଷୟରେ ଜନସାଧାରଣଙ୍କୁ ନିୟମିତ ବ୍ୟବଧାନରେ ଡାକବାଜି ଯନ୍ତ୍ର ଯୋଗେ ସଚେତନ କରିବା ପାଇଁ ନିର୍ଦ୍ଦେଶ ଦେଇଛନ୍ତି । ଏତଦ ବ୍ୟତୀତ ଖରାଦିନେ ଅନେକ ସମୟରେ କାଳ ବୈଶାଖୀ ସହ ବଜ୍ରପାତ ହେବାର ଆଶଙ୍କା ଥିବାରୁ ସେଇ ସମୟରେ ବାହାରକୁ ନବାହାରିବା ପାଇଁ ଲୋକ ମାନଙ୍କୁ ସଚେତନ କରିବା ପାଇଁ ମଧ୍ୟ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଛନ୍ତି । ଅଂଶୁଘାତ ଲକ୍ଷଣ ଦେଖା ଦେଲେ ତୁରନ୍ତ ଚିକିତ୍ସିତ ହେବାକୁ ଲୋକମାନଙ୍କୁ ପରାମର୍ଶ ଦିଆଯାଇଛି । ସେହିପରି ଗୃହପାଳିତ ପଶୁ ଗୁଡିକୁ ଖରାରେ ବାହାରକୁ ନଛାଡିବା ତଥା ଅନ୍ୟାନ୍ୟ ପଶୁ ପକ୍ଷୀ ଙ୍କ ପାଇଁ ନିଜ ନିଜ ଘର ପାଖରେ ଓ ଛାତ ଉପରେ ପାତ୍ରରେ ପାଣି ରଖିବା ପାଇଁ ପରାମର୍ଶ ଦେଇଛନ୍ତି । ସମସ୍ତ ଅଙ୍ଗନବାଡି କେନ୍ଦ୍ର ସକାଳ ୭ଟା ରୁ ୯ଟା ମଧ୍ୟରେ ଖୋଲିବା ସହିତ ପିଇବା ପାଣି, ଓଆରଏସ ପ୍ୟାକେଟ ଓ ଫାଷ୍ଟ ଏଡ଼ ରଖିବା ପାଇଁ ନିଦ୍ଦେର୍ନଶ ଦିଆଯାଇଛି ଏବଂ ସକାଳୁଆ ସ୍କୁଲ ସମ୍ପର୍କ ରେ ବିଦ୍ୟାଳୟ ଓ ଗଣ ଶିକ୍ଷା ବିଭାଗ ଦ୍ୱାରା ଜାରି ହୋଇଥିବା ନିର୍ଦେଶନାମାର ଉପଯୁକ୍ତ କାର୍ଯ୍ୟକାରିତା ପାଇଁ ଜିଲ୍ଲା ଶିକ୍ଷାଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ଶିକ୍ଷକ ଶିକ୍ଷୟତ୍ରୀ ମାନେ ସ୍କୁଲ ଆସୁଥିବା ପିଲା ମାନଙ୍କୁ ସଙ୍ଗରେ ପାଣି ବୋତଲ ଆଣିବା ପାଇଁ ପରାମର୍ଶ ଦେବା ସହିତ ଛାତ୍ର ଛାତ୍ରୀ ମାନଂକୁ ଅଂଶୁଘାତରୁ ଉପଶମ ପାଇବା ପାଇଁ ଟିପ୍ସ ସମ୍ଭନ୍ଧରେ ଅବଗତ କରାଇବେ । ସେହିପରି ଜନ ଶୁଣାଣି ଦିନ ମାନଙ୍କରେ ଲୋକମାନଙ୍କ ସୁବିଧା ପାଇଁ ସେଡ , ଥଣ୍ଡା ପିଇବା ପାଣି, ଓଆରଏସ, ଫାଷ୍ଟ ଏଡ଼ ଇତ୍ୟାଦି ର ବ୍ୟବସ୍ଥା କରିବା ପାଇଁ ସମ୍ପୃକ୍ତ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଛନ୍ତି । ଉକ୍ତ ବୈଠକରେ ଅତରିକ୍ତ ଜିଲ୍ଲାପାଳ ବିଭୁତି ଭୂଷଣ ନାୟକ, ଅତିରିକ୍ତ ଜିଲ୍ଲାପାଳ ନେତ୍ରାନନ୍ଦ ମଲ୍ଲିକ , ଅତିରିକ୍ତ ଜିଲ୍ଲାପାଳ ଈଶ୍ୱର ଚନ୍ଦ୍ର ନାୟକ, ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ, ଧର୍ମାନନ୍ଦ ବେହେରା ଜିଲ୍ଲା ମୁଖ୍ୟ ଚିକିତ୍ସା ଓ ଜନ ସ୍ୱାସ୍ଥ୍ୟ ଅଧିକାରୀ ଡ଼କ୍ଟର ପ୍ରଭାତ କୁମାର ବେହେରା,ଏ ଡି ଏମ ଓ ଡାକ୍ତର ବିଜୟ କୁମାର ଦାଶ, ବାରିପଦା ଉପଜିଲ୍ଲାପାଳ ଡ଼. ଦୟାସିନ୍ଧୁ ପରିଡା,ଏପିଡି ଶ୍ରୀ ଶାନ୍ତନୁ କୁମାର ନାୟକ, ଜିଲ୍ଲା ଜରୁରୀ ବିଭାଗ ଡେପୁଟି କଲେକଟର ଶ୍ରଦ୍ଧା ସୁମନଙ୍କ ସମେତ ବିଭିନ୍ନ ଜିଲ୍ଲା ସ୍ତରୀୟ ବିଭାଗୀୟ ପଦାଧିକାରୀ ଯୋଗ ଦେଇଥବା ବେଳେ ଜିଲ୍ଳାର ଅନ୍ୟାନ୍ୟ ଉପଖଣ୍ଡର ଉପଜିଲ୍ଲାପାଳ,ବିଡିଓ, ତହସିଲଦାର, ପୌରପାଳିକା ବିଜ୍ଞାପିତ ଅଂଚଳ ପରିଷଦ ର କାର୍ଯ/୍ୟନିର୍ବାହୀ ଅଧିକାରୀ, ସିଡିପିଓ ଓ ବିଭିନ୍ନ ଲାଇନ ବିଭାଗର ଅଧିକାରୀ ମାନେ ଆଭାସୀ ମାଧ୍ୟମରେ ସାମିଲ ହୋଇ ଆଲୋଚନାରେ ଅଂଶଗ୍ରହଣ କରିଥିଲେ ।