- ୨ ଦିନ ଆବିର୍ଭାବ ପରେ ପୀଠ ପ୍ରତ୍ୟାବର୍ତ୍ତନ
ଲୋଇସିଂହା, (ଶ୍ୟାମ ସୁନ୍ଦର ମେହେର) : ବଲାଙ୍ଗିର ଜିଲ୍ଲା ଲୋଇସିଂହା ବ୍ଲକ ଅନ୍ତର୍ଗତ କୁଶଙ୍ଗରେ ପୂଜା ପାଉଛନ୍ତି ମାଁ କୁଶଙ୍ଗାଇ । ଯାହା ଫଳରେ କୁଶମେଲ ଗ୍ରାମର ଇଷ୍ଟଦେବୀ ଭାବରେ ଅନୁଷ୍ଠିତ ସମସ୍ତ ପ୍ରତିଷ୍ଠା କାର୍ଯ୍ୟରେ ମାଁ କୁଶଙ୍ଗାଇଙ୍କୁ ସ୍ଵତନ୍ତ୍ର ଭାବେ ଆବାହନ କରାଯାଇ କୌଣସି ଧର୍ମାନୁଷ୍ଠାନର ଶୁଭାରମ୍ଭ ହୋଇଥାଏ । ଏହି କ୍ରମରେ ଗତକାଲି ସନ୍ଧ୍ୟାରେ ଏକ ବିରାଟ ଶୋଭାଯାତ୍ରାରେ ମାଁ କୁଶଙ୍ଗାଇଙ୍କ ଛାତ୍ର ବାଉତୀ ସହିତ ଖଣ୍ଡା, ତ୍ରିଶୂଲ ମାଁଙ୍କ ମନ୍ଦିରରୁ ବାହାରି କୁଶମେଲ ଯାଇଛି । ହଜାର ହଜାର ଶ୍ରଦ୍ଧାଳୁଙ୍କ ଭିଡରେ ମାଁ କୁଶଙ୍ଗାଇଙ୍କ ଏହି ଅପୂର୍ବ ଯାତ୍ରା ଅନୁଷ୍ଠିତ ହୋଇଥିବା ବେଳେ ଶୁକ୍ରବାର ଓ ଶନିବାର ଦୁଇ ଦିନ ଧରି ବରୁଆ ଦେହରେ ଆବିର୍ଭାବ ହୋଇ କୁଶମେଲ ଗ୍ରାମରେ ଦର୍ଶନ ଦେଇ ରବିବାର ପୁଣି ପୀଠ ପ୍ରତ୍ୟାବର୍ତ୍ତନ କରିବେ । ସୂଚନା ଅନୁଯାୟୀ, ଚଳିତ ମାସ ୩ ତାରିଖରୁ ୧୦ ତାରିଖ ପର୍ଯ୍ୟନ୍ତ କୁଶମେଲ ଗ୍ରାମରେ ନବ ନିର୍ମିତ ଶ୍ରୀ ଶ୍ରୀ ଜଗନ୍ନାଥ ମନ୍ଦିର ପ୍ରତିଷ୍ଠା ମହୋତ୍ସବ ଅନୁଷ୍ଠିତ ହେଉଛି । କିମ୍ବଦନ୍ତୀ ଅନୁସାରେ, ମାଁ କୁଶଙ୍ଗାଇ କୁଶମେଲ ଗ୍ରାମରେ ଆବିର୍ଭାବ ହୋଇ କୁଶଙ୍ଗ ଗ୍ରାମରେ କେଉଁ ଆବହମାନ କାଳରୁ ପୂଜା ପାଉଛନ୍ତି । କୁଶମେଲ ଗ୍ରାମର ଇଷ୍ଟଦେବୀ ଭାବରେ ମାଁ କୁଶଙ୍ଗାଇ ପୂଜା ପାଉଥିବାବେଳେ ମାଁଙ୍କ ମନ୍ଦିର ମଧ୍ୟ ରହିଛି । ଯାହାକି ଦୀର୍ଘ ୩୦ ବର୍ଷ ପୂର୍ବରୁ ପ୍ରତିଷ୍ଠା ହୋଇ ଆଜି ପରି ଏକ ବିଶାଳ ଶୋଭାଯାତ୍ରାରେ ଯାଇ ଫେରିଥିଲେ । ସେହିପରି ଶ୍ରୀ ଶ୍ରୀ ଜଗନ୍ନାଥ ମନ୍ଦିର ପ୍ରତିଷ୍ଠା ପାଇଁ ଗ୍ରାମବାସୀ ମାଁ କୁଶଙ୍ଗାଇଙ୍କୁ ଆବାହନ କରିଛନ୍ତି । ଗୁରୁବାର ସଂଧ୍ୟାରେ ମାଁଙ୍କ ପୂଜାର୍ଚ୍ଚନା ପରେ ଛତ୍ର ବାଉତୀ ସହ ଖଣ୍ଡା ଓ ତ୍ରିଶୂଲ ମନ୍ଦିରରୁ ବାହାରି କୁଶମେଲକୁ ଯାଇଛି । ହଜାର ହଜାର ଶ୍ରଦ୍ଧାଳୁଙ୍କ ହୁଳହୁଳି ହରିବୋଲ ମଧ୍ୟରେ ଏହି ଅପୂର୍ବ ଯାତ୍ରା ଅନୁଷ୍ଠିତ ହୋଇଛି । ଏନେଇ ଶୁକ୍ରବାର ଓ ଶନିବାର ବରୁଆ ଦେହରେ ଆବିର୍ଭାବ ହୋଇ ଦର୍ଶନ ଦେବେ । ଯାହା ଫଳରେ କୁଶମେଲ ଗ୍ରାମରେ ଏକ ଆଧ୍ୟାତ୍ମିକ ପରିବେଶ ଦେଖା ଦେଇଛି । ଦୁଇ ଦିନ ଆବିର୍ଭାବ ପରେ ପୁଣି କୁଶଙ୍ଗକୁ ଅନୁରୂପ ଭାବରେ ପ୍ରତ୍ୟାବର୍ତ୍ତନ କରି ମନ୍ଦିରରେ ପ୍ରବେଶ ହେବେ । ଏହି ଶୋଭାଯାତ୍ରାରେ ମାଁଙ୍କ ମୁଖ୍ୟ ପୂଜକ ଖଗେଶ୍ୱର ଦେହେରୀ, ଦେବଦତ୍ତ ଦେହେରୀ, ଲୋକନାଥ ଦେହେରୀଙ୍କ ସମେତ ମନ୍ଦିର କମିଟିର ଗୌନ୍ତିଆ ବୃନ୍ଦାବନ ପଟେଲ, ଦୟା ସାଗର ସାହୁ, ସୁଦାମ ପଟେଲ, କରୁଣା କର ପଟେଲ, ସୁଶାନ୍ତ ପଟେଲ, ଗୋବିନ୍ଦ ଅଗ୍ରୱାଲ, ହେମନ୍ତ ରାଉତ, ଉମେଶ ବେହେରା, ପ୍ରକାଶ ପଟେଲ, ଅଜିତ ପୃଷ୍ଟି, ସୁବାସ ପୃଷ୍ଟି ସମେତ ବହୁ ସଂଖ୍ୟାରେ ଶ୍ରଦ୍ଧାଳୁ ସାମିଲ ହୋଇଥିଲେ ।