ରାଉରକେଲା, (ସସ୍ମିତା ପ୍ରଧାନ) : ସେକ୍ଟର ୬ ସ୍ଥିତ ସରସ୍ୱତୀ ଶିଶୁ ବିଦ୍ୟା ମନ୍ଦିର ତରଫରୁ ୪୦ତମ ବାର୍ଷିକୋତ୍ସବ ବିଦ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି । ପ୍ରଥମ ପର୍ଯ୍ୟାୟ କାର୍ଯ୍ୟକ୍ରମରେ ଜର୍ଣ୍ଣାଲିଷ୍ଟ ଆସୋସିଏସନ୍ର ଉପସଭାପତି ତଥା କବି କୁଞ୍ଜବିହାରୀ ରାଉତ ଉଦ୍ଘାଟକ ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦ୍ଘାଟନ କରିବା ସହ ଶିଶୁମାନଙ୍କ ଦ୍ୱାରା ଆୟୋଜିତ ଫଟୋ ଚିତ୍ର ପ୍ରଦର୍ଶନୀକୁ ଦେଖି ଉଚ୍ଚ ପ୍ରଶଂସା କରିଥିଲେ । ଦ୍ୱିତୀୟ ପର୍ଯ୍ୟୟରେ ବିଦ୍ୟା ମନ୍ଦିରର ସଭାପତି ମିତ୍ରଭାନୁ ପଣ୍ଡାଙ୍କ ସଭାପତିତ୍ୱ ତଥା ପ୍ରଧାନ ଆଚାର୍ଯ୍ୟ ସୁରେନ୍ଦ୍ର କୁମାର ଶତପଥୀଙ୍କ ଆବାହକତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ସୁନ୍ଦରଗଡ ସାଂସଦ ଜୁଏଲ ଓରାମ ମୁଖ୍ୟ ଅତିଥି ଓ ଓଡିଶା ଶିକ୍ଷା ବିକାଶ ସମିତିର ଉପାଧ୍ୟକ୍ଷ ଡ. ପ୍ରଦୀପ କୁମାର ସାହୁ ମୁଖ୍ୟବକ୍ତା ଭାବେ ଯୋଗ ଦେଇଥିଲେ । ମୁଖ୍ୟ ଅତିଥି ଶ୍ରୀ ଓରାମ ଛାତ୍ରଛାତ୍ରୀ ଓ ଅଭିଭାବକମାନଙ୍କୁ ସମୟର ସଦୁପଯୋଗ ଓ ମନୁଷ୍ୟ କିପରି ମନଆଧାରିତ ପ୍ରାଣୀ ସେ ସଂପର୍କରେ ଆଲୋଚନା କରିଥିଲେ । ମୁଖ୍ୟବକ୍ତା ଡ. ସାହୁ ତାଙ୍କ ବକ୍ତବ୍ୟରେ କହିଲେ ଯେ, ରାଷ୍ଟ୍ର ଗଠନରେ ଶିକ୍ଷା ହେଉଛି ବଳିଷ୍ଠ ମାଧ୍ୟମ । ବିଦ୍ୟା ଭାରତୀର ଲକ୍ଷ୍ୟ ଓ ଉଦ୍ଦେଶ୍ୟ ସଂପର୍କରେ ତଥା ଦେଶବୋଧ, ସମାଜବୋଧ, ଆଧ୍ୟାତ୍ମବୋଧ ଓ ସଂସ୍କୃତିବୋଧ ସଂପର୍କରେ ଆଲୋଚନା କରିଥିଲେ । ସଂପ୍ରତି ଶିକ୍ଷା ବ୍ୟବସ୍ଥାରେ ମଣିଷ ଗଢିବା ବଦଳରେ ଅର୍ଥ ଉପାର୍ଜନର ଯନ୍ତ୍ର ଗଢୁଛି ବୋଲି ମତପ୍ରକାଶ କରିଥିଲେ । ଏହି ଅବସରରେ ଅତିଥିମାନେ ବିଦ୍ୟାଳୟର ସ୍ମରଣିକାକୁ ଉନ୍ମୋଚନ କରିଥିଲେ । ଶିଶୁ ମନ୍ଦିରର ଛାତ୍ରଛାତ୍ରୀଙ୍କ ଦ୍ୱାରା ଯୋଗାସନ, ଏକକ ସଂଗୀତ, ଓଡିଶୀ, ଡମ୍ବେଲ ଯୋଗ, ମହିଳା ସଶକ୍ତିକରଣ ନୃତ୍ୟ, ଗରବା ନୃତ୍ୟ ଓ ଗୁରୁମା ମମତା ଜେନା ରଚିତ ପ୍ରସନ୍ନ ପାତ୍ରଙ୍କ ନିର୍ଦ୍ଦେଶିତ ନାଟକ ‘ସାବଧାନ’ ମଞ୍ଚସ୍ଥ ହୋଇଥିଲା । ପ୍ରଧାନ ଆଚାର୍ଯ୍ୟ ଶ୍ରୀ ଶତପଥୀ ବାର୍ଷିକ ବିବରଣୀ ଓ ସଂପାଦକ ନିର୍ମଳ କୁମାର ମହାପାତ୍ର ଧନ୍ୟବାଦ ଅର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ଉପସଭାପତି ଶ୍ରୀକାନ୍ତ କୁମାର ଷଡଙ୍ଗୀ, ଯୁଗ୍ମ ସଂପାଦକ ଅରୁଣ କୁମାର ନାୟକ ଓ କୋଷାଧ୍ୟକ୍ଷ ଜୀତେନ କୁମାର ମହାନ୍ତି ତଥା ଗୁରୁମା ସୁମିତ୍ରା ମିଶ୍ର, ରାଧାମୋହନ ଦାସ, ସଂଧ୍ୟାରାଣୀ ସାମନ୍ତ, ସୂର୍ଯ୍ୟ ନାରାୟଣ ଦାସ, ଶଶିକାନ୍ତ ରାଉତ, ଅଳକା ମହାନ୍ତି, ଲଳିତା ବେହେରା, ମମତା ସାମଲ, ଶ୍ୟାମସୁନ୍ଦର ସେଠୀ, ସ୍ମିତାରାଣୀ ମାର୍ଥା, ଗଣେଶ ଜୟସିଂହଙ୍କ ସମେତ ବିଦ୍ୟା ମନ୍ଦିରର ସମସ୍ତ ଶିକ୍ଷକ ଶିକ୍ଷୟିତ୍ରୀ ସହଯୋଗ କରିଥିଲେ ।