ଗୁଜୁରାଟର ମେହେସାନା ଠାରେ ଶ୍ରୀ କେ. କେ. ପଟେଲ ଏବଂ ମଧୁବେନ କେ. ପଟେଲ ନର୍ସିଂ କଲେଜର ନବନିର୍ମିତ ସୌଧକୁ ଉଦଘାଟନ କରିଛନ୍ତି କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ
- ଏହି ନର୍ସିଂ କଲେଜ ବିଗତ ୬୫ ବର୍ଷ ଧରି ନର୍ସିଂ ଶିକ୍ଷାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଆସୁଛି
- ବକ୍ତୃତା କକ୍ଷ, ପରୀକ୍ଷାଗାର, ପାଠାଗାର ଏବଂ କାର୍ଯ୍ୟାଳୟ ଭଳି ସୁବିଧାଗୁଡ଼ିକ ସହିତ ସଜ୍ଜିତ ଏହି କୋଠାଟି ସ୍ଥାନୀୟ ଅଞ୍ଚଳର ଯୁବକମାନଙ୍କୁ ସହଜ ଏବଂ ସୁଲଭ ଡାକ୍ତରୀ ଶିକ୍ଷା ପ୍ରଦାନ କରିବ
- ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୀ ଦେଶରେ ସ୍ୱାସ୍ଥ୍ୟସେବା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଆୟୁଷ୍ମାନ ଭାରତ ଯୋଜନା ଆଣିଥିଲେ, ଆଜି ଦେଶର ୬୦ ଲକ୍ଷ ଲୋକଙ୍କ ପାଖରେ ଆୟୁଷ୍ମାନ କାର୍ଡ ରହିଛି
- ମୋଦୀ ସରକାର ପ୍ରତ୍ୟେକ ଗରିବଙ୍କୁ ତାଙ୍କ ଘର ନିକଟରେ ଉପଯୁକ୍ତ ସ୍ୱାସ୍ଥ୍ୟ ସେବା ଯୋଗାଇବା ପାଇଁ ପ୍ରୟାସ କରୁଛନ୍ତି
- ୨୦୧୪ ପୂର୍ବରୁ ଦେଶର ସ୍ୱାସ୍ଥ୍ୟ ବଜେଟ୍ ୩୭ ହଜାର କୋଟି ଟଙ୍କା ଥିଲା, ମୋଦିଜୀ ୨୦୨୫-୨୬ରେ ଏହାକୁ ୧ ଲକ୍ଷ ୩୭ ହଜାର କୋଟି ଟଙ୍କାକୁ ବୃଦ୍ଧି କରିଛନ୍ତି
୨୦୧୪ ମସିହାରେ ଦେଶରେ ମାତ୍ର ୭ଟି ଏମସ୍ ଏବଂ ୩୮୭ଟି ମେଡ଼ିକାଲ କଲେଜ ଥିଲା, ଆଜି ୨୩ଟି ଏମସ୍ ଏବଂ ୭୮୦ଟି ମେଡ଼ିକାଲ କଲେଜ ରହିଛି
ଜନଔଷଧି ଯୋଜନା ଅଧୀନରେ ଗତ ୧୦ ବର୍ଷ ମଧ୍ୟରେ ନାଗରିକମାନଙ୍କୁ ୨୫ ହଜାର କୋଟି ଟଙ୍କାର ଶସ୍ତା ଔଷଧ ଉପଲବ୍ଧ କରାଯାଇଛି
ନୂଆଦିଲ୍ଲୀ, (ପିଆଇବି) : କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ ଆଜି ଗୁଜରାଟର ମେହସାନାରେ ଥିବା କେ. କେ. ପଟେଲ ଏବଂ ମଧୁବେନ୍ କେ. ପଟେଲ ପଟେଲ ନର୍ସିଂ କଲେଜର ନବନିର୍ମିତ କୋଠାକୁ ଉଦଘାଟନ କରିଛନ୍ତି । ଏହି ଅବସରରେ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।ଉଦଘାଟନୀ କାର୍ଯ୍ୟକ୍ରମକୁ ସମ୍ବୋଧିତ କରି କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ କହିଛନ୍ତି, ଏହି ନର୍ସିଂ କଲେଜ ଗତ ୬୫ ବର୍ଷ ଧରି ନର୍ସିଂ ଶିକ୍ଷାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଆସୁଛି । ସେ କହିଥିଲେ, ବକ୍ତୃତା କକ୍ଷ, ପରୀକ୍ଷାଗାର, ପାଠାଗାର ଏବଂ କାର୍ଯ୍ୟାଳୟ ଭଳି ସୁବିଧାଗୁଡ଼ିକ ସହିତ ସଜ୍ଜିତ ଏହି କୋଠାଟି ଏହି ଅଞ୍ଚଳର ଯୁବକମାନଙ୍କୁ ସହଜ ଏବଂ ସୁଲଭ ଡାକ୍ତରୀ ଶିକ୍ଷା ପ୍ରଦାନ କରିବ । ଅମିତ ଶାହ କହିଥିଲେ ଯେ ଦେଶର ପୂର୍ବରୁ ଦୁର୍ବଳ ଥିବା ସ୍ୱାସ୍ଥ୍ୟସେବା ବ୍ୟବସ୍ଥାକୁ ସୁଦୃଢ଼ କରିବା ଉଦ୍ଦେଶ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆୟୁଷ୍ମାନ ଭାରତ ଯୋଜନା ଆରମ୍ଭ କରିଛନ୍ତି । ଏହି ଯୋଜନା ଲାଗୁ ହେବା ପରଠାରୁ ଦେଶର ପ୍ରତ୍ୟେକ ଗରିବ ନାଗରିକଙ୍କ ପାଖରେ ଏବେ ଆୟୁଷ୍ମାନ କାର୍ଡ ରହିଛି, ଯାହା ମାଧ୍ୟମରେ ସେମାନେ ପାଞ୍ଚ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ପାଇପାରିବେ । ସେ ଆହୁରି ମଧ୍ୟ କହିଛନ୍ତି ଯେ ବର୍ତ୍ତମାନ ପ୍ରତ୍ୟେକ ଡାକ୍ତରଖାନାକୁ ଆୟୁଷ୍ମାନ ଭାରତ ଯୋଜନାର ମାନଦଣ୍ଡ ପୂରଣ କରିବା ପାଇଁ ଉନ୍ନତିକରଣ କରାଯାଉଛି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ରାଜ୍ୟ ଡାକ୍ତରଖାନାଗୁଡ଼ିକୁ ସେମାନଙ୍କ ସୁବିଧାଗୁଡ଼ିକୁ ଆୟୁଷ୍ମାନ ଭାରତ ଯୋଜନାର ମାନକ ସହିତ ଯୋଡ଼ିବା ପାଇଁ ନିବେଦନ କରିଛନ୍ତି ଯାହା ଦ୍ୱାରା ଉଭୟ ସାଧାରଣ ଜନତା ଏବଂ ଡାକ୍ତରଖାନା ପରିଚାଳନା ଉପକୃତ ହୋଇପାରିବେ । ସେ କହିଥିଲେ ଯେ ପ୍ରତ୍ୟେକ ଗରିବ ବ୍ୟକ୍ତି ଯେପରି ନିଜ ଘର ନିକଟରେ ଉପଯୁକ୍ତ ସ୍ୱାସ୍ଥ୍ୟସେବା ପାଇପାରିବେ, ତାହା ସୁନିଶ୍ଚିତ କରିବା ସରକାରଙ୍କ ପ୍ରୟାସ । ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଦେଶ ୨୦୧୪ରୁ ୨୦୨୫ ମଧ୍ୟରେ ସ୍ୱାସ୍ଥ୍ୟସେବା କ୍ଷେତ୍ରରେ ଆମୂଳଚୂଳ ପରିବର୍ତ୍ତନ ଆଣିଛି । ସେ କହିଥିଲେ ଯେ ଆଜି ୬୦ ଲକ୍ଷ ଲୋକଙ୍କ ପାଖରେ ଆୟୁଷ୍ମାନ କାର୍ଡ ରହିଛି । ୭୦ ବର୍ଷରୁ ଅଧିକ ବୟସର ଭାରତର ପ୍ରତ୍ୟେକ ନାଗରିକଙ୍କ ପାଇଁ ପାଞ୍ଚ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ପାଇଁ ବ୍ୟବସ୍ଥା କରାଯାଇଛି, ଯେଉଁଥିରେ ହିତାଧିକାରୀଙ୍କ ପାଇଁ କୌଣସି ନିର୍ଦ୍ଦିଷ୍ଟ ଆୟ ସୀମା ନାହିଁ । ଶ୍ରୀ ଶାହ ଆହୁରି ମଧ୍ୟ କହିଛନ୍ତି ଯେ ଆୟୁଷ୍ମାନ ଭାରତ ଯୋଜନା ବ୍ୟତୀତ ମୋଦୀ ଜୀ ସ୍ୱଚ୍ଛ ଭାରତ ମିଶନ, ଫିଟ୍ ଇଣ୍ଡିଆ ଆନ୍ଦୋଳନ, ହର ଘର ଜଳ (ପ୍ରତ୍ୟେକ ଘରକୁ ପାଣି), ପ୍ରତ୍ୟେକ ଘରେ ଶୌଚାଳୟ, ପ୍ରତ୍ୟେକ ପିଲାକୁ ଟୀକାକରଣ ପାଇଁ ମିଶନ ଇନ୍ଦ୍ରଧନୁଷ, ପୁଷ୍ଟିସାଧନ ଅଭିଯାନ ଭଳି ପଦକ୍ଷେପ ମାଧ୍ୟମରେ ଦେଶର ସ୍ୱାସ୍ଥ୍ୟସେବା କ୍ଷେତ୍ରକୁ ଆହୁରି ମଜବୁତ କରିଛନ୍ତି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଛନ୍ତି ଯେ ୨୦୧୪ ପୂର୍ବରୁ ଦେଶର ସ୍ୱାସ୍ଥ୍ୟ ବଜେଟ୍ ୩୭ ହଜାର କୋଟି ଟଙ୍କା ଥିଲା, ମୋଦି ଜୀ ଏହାକୁ ୨୦୨୫-୨୬ରେ ୧ ଲକ୍ଷ ୩୭ ହଜାର କୋଟି ଟଙ୍କାକୁ ବୃଦ୍ଧି କରିଥିଲେ । ସେ କହିଥିଲେ ଯେ ସ୍ୱାସ୍ଥ୍ୟ କ୍ଷେତ୍ରର ବଜେଟ୍ ବୃଦ୍ଧି କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାତୀୟ ଡିଜିଟାଲ ସ୍ୱାସ୍ଥ୍ୟ ଇକୋସିଷ୍ଟମ୍ ପ୍ରତିଷ୍ଠା କରିଥିଲେ, ଆୟୁଷ୍ମାନ ଭାରତ ଯୋଜନା ଆରମ୍ଭ କରିଥିଲେ ଏବଂ ଆୟୁଷ୍ମାନ ଆରୋଗ୍ୟ ମନ୍ଦିର ନିର୍ମାଣ କରିଥିଲେ । ଶ୍ରୀ ଶାହା କହିଥିଲେ ଯେ ୨୦୧୪ ମସିହାରେ ଦେଶରେ ମାତ୍ର ୭ଟି ଏମସ୍ ଥିଲା, ଆଜି ୨୩ଟି ଏମସ୍ ରହିଛି । ୨୦୧୪ ମସିହାରେ ୩୮୭ଟି ମେଡ଼ିକାଲ କଲେଜ ଥିଲା, ଯାହା ଏବେ ୭୮୦କୁ ବୃଦ୍ଧି ପାଇଛି । ପୂର୍ବରୁ ଏମ୍.ବି.ବି.ଏସ୍. ର ୫୧ ହଜାର ସିଟ୍ ଥିଲା, ଆଜି ସେହି ସଂଖ୍ୟା ୧ ଲକ୍ଷ ୧୮ ହଜାରକୁ ବୃଦ୍ଧି ପାଇଛି । ପୂର୍ବରୁ ୩୧ ହଜାର ପିଜି/ଏମ୍. ଡି./ଏମ୍. ଏସ୍. ସିଟ୍ ଥିଲା, ଯାହା ଏବେ ୭୪ ହଜାରକୁ ବୃଦ୍ଧି ପାଇଛି । ସେ କହିଥିଲେ ଯେ ଟେଲିମେଡିସିନ୍ ସୁବିଧାକୁ ସ୍ୱାସ୍ଥ୍ୟ କ୍ଷେତ୍ରର ସମଗ୍ର ଇକୋସିଷ୍ଟମ ସହିତ ସମ୍ପ୍ରସାରିତ କରାଯାଇଛି । ପ୍ରଧାନମନ୍ତ୍ରୀ ଜନଔଷଧି ଯୋଜନାକୁ ଫଳପ୍ରଦ କରିଛନ୍ତି, ଯେଉଁଥିପାଇଁ ଗତ ୧୦ ବର୍ଷ ମଧ୍ୟରେ ନାଗରିକମାନଙ୍କୁ ୨୫ ହଜାର କୋଟି ଟଙ୍କାର ଶସ୍ତା ଔଷଧ ଉପଲବ୍ଧ କରାଯାଇଛି । ଅମିତ ଶାହ କହିଥିଲେ ଯେ ଆୟୁଷ୍ମାନ ଭାରତ ସ୍ୱାସ୍ଥ୍ୟ ଭିତ୍ତିଭୂମି ମିଶନ ଅଧୀନରେ ୭୩୦ଟି ବୃହତ ଜନସ୍ୱାସ୍ଥ୍ୟ ପ୍ରତିଷ୍ଠାନ ଏବଂ ୩୩୮୨ଟି ତହସିଲ ସ୍ତରୀୟ ଜନସ୍ୱାସ୍ଥ୍ୟ ପ୍ରତିଷ୍ଠାନ ନିର୍ମାଣ କରାଯାଇଛି । ଯଦି ଆମେ ସମସ୍ତ ସଫଳତାକୁ ସାମଗ୍ରିକ ଭାବରେ ଦେଖିବା, ତେବେ ଗୁଜରାଟର ପୁଅ ନରେନ୍ଦ୍ର ମୋଦୀ ଭାରତର ୧୩୦ କୋଟି ନାଗରିକଙ୍କ ଉନ୍ନତ ସ୍ୱାସ୍ଥ୍ୟ ପାଇଁ ଏକ ବହୁତ ବଡ଼ ଅଭିଯାନ ଆରମ୍ଭ କରିଛନ୍ତି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ କହିଛନ୍ତି ଯେ ଆଜି ଉଦଘାଟିତ ହୋଇଥିବା ନର୍ସିଂ କଲେଜ ୩୭୦୦ ବର୍ଗ ମିଟର ଅଞ୍ଚଳରେ ବ୍ୟାପ୍ତ ଏବଂ ବି.ଏସ୍.ସି ସମେତ ପ୍ରାୟ ସମସ୍ତ ନର୍ସିଂ ସମ୍ବନ୍ଧୀୟ ପାଠ୍ୟକ୍ରମ ରହିଛି । ଏହି ଅନୁଷ୍ଠାନରେ ବିଏସ୍ସିଅ ନର୍ସିଂ ଆରମ୍ଭ ହୋଇସାରିଛି । ମହିଳା ଛାତ୍ରାବାସ ନିର୍ମାଣ କାର୍ଯ୍ୟ ମଧ୍ୟ ଚାଲିଛି । ଏକ କର୍କଟ ଚିକିତ୍ସା ଡାକ୍ତରଖାନା ପ୍ରତିଷ୍ଠା କାର୍ଯ୍ୟ ଶୀଘ୍ର ଆରମ୍ଭ ହେବ ବୋଲି ଆଶା କରାଯାଉଛି, ଯାହା ଆଗାମୀ ଦିନରେ ଏହି ଅଞ୍ଚଳର ଲୋକଙ୍କୁ, ବିଶେଷ କରି ଗରିବ ନାଗରିକମାନଙ୍କୁ ବହୁତ ଉପକୃତ କରିବ । ସେ କହିଥିଲେ ଯେ ଦାନରୁ ଆରମ୍ଭ ହୋଇଥିବା ଏହି ଡାକ୍ତରଖାନାକୁ ଚଳାଇବା ଏବଂ ଏହାକୁ ଅତ୍ୟାଧୁନିକ କରିବା ସମାଜର ଦାୟିତ୍ୱ ।