ଯାଜପୁର : ଜମିବାଡ଼ିକୁ କେନ୍ଦ୍ର କରି ଭାଇକୁ ଆକ୍ରମଣ କଲା ବଡଭାଇ ।ଭାଇର ଆକ୍ରମଣରେ ଦୁଇ ସାନ ଭାଇ ଗୁରୁତର ହୋଇଛନ୍ତି । ଗୁରୁତର ଅବସ୍ଥାରେ ଦୁଇ ଭାଇଙ୍କୁ ଘର ଭିତରୁ ପୋଲିସ ଉଦ୍ଧାର କରି ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛି । ଯାଜପୁର ସଦର ଥାନା ଅନ୍ତର୍ଗତ ଖଇରାବାଦ ଗ୍ରାମରେ ଏହି ଘଟଣା ଘଟିଛି । ସୂଚନା ଅନୁସାରେ ଯାଜପୁର ସଦର ଥାନା ଅନ୍ତର୍ଗତ ଖଇରାବାଦ ଗ୍ରାମର ଜୟନ୍ତ ସାହୁ ଓ ଜୟ ଗୋପାଳ ସାହୁ ଜମିବାଡ଼ିକୁ କେନ୍ଦ୍ର କରି ନିଜର ସାନ ବାପା ପ୍ରହଲ୍ଲାଦ ସାହୁଙ୍କ ଦୁଇ ପୁଅ ଧନଞ୍ଜୟ ସାହୁ ଏବଂ ମୃତ୍ୟୁଞ୍ଜୟ ସାହୁଙ୍କୁ ଆକ୍ରମଣ କରିଥିଲେ । ଫଳରେ ଉଭୟେ ଭୟରେ ଏକ ଘରେ ପଶି ଯାଇ ପୋଲିସକୁ ଖବର ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ଦୁଇ ଭାଇଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛି । ଅନ୍ୟପକ୍ଷରେ ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି ।