ବାଲିଗୁଡା, (ସୁରେନ୍ଦ୍ର କୁମାର ପାଣିଗ୍ରାହୀ) : କନ୍ଧମାଳ ଜିଲ୍ଲା ବାଲିଗୁଡା ଉପଖଣ୍ଡ ଅନ୍ତର୍ଗତ ତୁମୁଡିବନ୍ଧ ବ୍ଲକ ସିର୍ଲା ପଞ୍ଚାୟତର ପସରଡ଼ି ଗ୍ରାମରେ ଏକ ଦୁଃଖଦ ଘଟଣା ଦେଖିବାକୁ ମିଳିଛି । ତୀରଜ ପାଟମାଝି ନାମକ ଏକ ବାଳକ ସିର୍ଲା ମୁଖ୍ୟ ବଜ଼ାରର ଦୋକାନରୁ କିଛି ଜିନିଷ କିଣିସାରିବା ପରେ ନିଜ ଦାଦା ସହିତ ନିଜ ଗ୍ରାମ ପସରଡ଼ିକୁ ଫେରୁଥିବା ବେଳେ ତଳେ ଭୂମି ତଳେ ପଡ଼ିଥିବା ବିଦ୍ୟୁତ ତାର ସଂସ୍ପର୍ଶରେ ଆସି ମୃତ୍ୟୁବରଣ କରିଥିଲେ । ପ୍ରକାଶ ଯେ, ଗତ ଗୁରୁବାର ଦିନ ପ୍ରବଳ ବର୍ଷା ଏବଂ ପବନ ହେବା ଫଳରେ ବିଦ୍ୟୁତ ତାର ପୋଲରୁ ଖସି ତଳେ ପଡିଥିଲା । ତାର ଖସିବା ପରେ ଗ୍ରାମବାସୀ ବିଦ୍ୟୁତ ବିଭାଗରେ କାର୍ୟ୍ୟ କରୁଥିବା ବୁଲୁ ମାଝୀଙ୍କୁ ଜଣାଇଥିଲେ ମଧ୍ୟ ସେ ପଇସା ଦେଲେ କାମ କରିବି, ନହେଲେ ନାହିଁ ବୋଲି କହିଥିଲେ । ଯାହା ଫଳରେ ସେହି ତାରର ସଂସ୍ପର୍ଶରେ ଆସି ବାଳକର ମୃତ୍ୟୁ ଘଟିଛି । ବିଦ୍ୟୁତ ବିଭାଗର ଅବହେଳା ଏବଂ ଦୁର୍ବଳତା ଯୋଗୁ ଏପରି ଘଟଣା ଘଟିଛି ବୋଲି ଗ୍ରାମବାସୀ କ୍ଷତି ପୂରଣ ଦାବୀରେ ଶବକୁ ବ୍ୟବଛେଦ ପାଇଁ ନେବାକୁ ମନା କରିଥିଲେ । ଘଟଣା ପରେ ଗ୍ରାମବାସୀ ସ୍ଥାନୀୟ ପୋଲିସ ଥାନାରେ ଅଭିଯୋଗ କରିଥିଲେ ଏବଂ ତୁମୁଡିବନ୍ଧ ବିଦ୍ୟୁତ ବିଭାଗକୁ ଜଣାଇଥିଲେ ଘଟଣା ସ୍ଥଳରେ ପୋଲିସ ଏବଂ ବିଦ୍ୟୁତ ବିଭାଗ କର୍ମଚାରୀ ଆସି ସ୍ଥିତି ପରଖିଥିଲେ ଏବଂ ଶବ ଉଠାଇବାକୁ ବର୍ତ୍ତମାନ ୨୦ ହଜାର ଦେବାକୁ କହିଥିଲେ ଏବଂ ଆଗାମୀ ଦିନରେ ସରକାରୀ ନିୟମାବଳୀ ଦ୍ଵାରା ଦାବୀ ପୂରଣ କରିବାକୁ ପ୍ରତିଶୃତି ଦେଇ ଶବକୁ ଘଟଣା ସ୍ଥଳରୁ ଉଠାଇଥିଲେ । ଲାଞ୍ଚ ନଦେଲେ କାମ କରିବିନି କହୁଥିବା ବୁଲୁ ମାଝିଙ୍କ ପାଖକୁ ଯାଇ ସାମ୍ବାଦିକମାନେ ତାଙ୍କ ତଥ୍ୟ ସଂଗ୍ରହ କରିଥିଲେ, ସେ ତାକୁ ମିଥ୍ୟା ପ୍ରକାଶ କରିଥିଲେ । କିନ୍ତୁ ଅନ୍ୟପଟେ ଗ୍ରାମବାସୀ ବୁଲୁ ମାଝୀଙ୍କ ବିରୋଧରେ କାର୍ୟ୍ୟାନୁଷ୍ଠାନ ନେବାକୁ ବାଲିଗୁଡା ଉପଖଣ୍ଡ ବିଦ୍ୟୁତ ବିଭାଗ ଏସଡିଓଙ୍କୁ ଅନୁରୋଧ କରିଥିଲେ ।