ପାଟଣାଗଡ଼, (କେପିଏନ୍ଏସ୍) : ପାଖେଇ ଆସୁଛି ସାଧାରଣ ନିର୍ବାଚନ । ପାଟଣାଗଡ଼ରେ ଦେଖିବାକୁ ମିଳିଛି ଘମାଘୋଟ ପ୍ରଚାର । ଏତିକି ବେଳେ ପାଟଣାଗଡ଼ ବିଜେଡ଼ିକୁ ମିଳିଛି ଆହୁରି ବଳ । ଖପ୍ରାଖୋଲ ବ୍ଲକର ଲକ୍ଷେ ଘର ଗଣ୍ଡା ସମାଜରୁ ୨୦୦ରୁ ଅଧିକ ପୁରୁଷ ମହିଳା ଆଜି ବ୍ଲକ ସଭାପତି ଛିନୁ ଟାକରି, ସମ୍ପାଦକ ମୋହନ ସୁନା ଓ ବ୍ଲକ ସଭାନେତ୍ରୀ ରଂଜିତା ସୁନାଙ୍କ ନେତୃତ୍ୱରେ ବିଜୁ ଜନତା ଦଳରେ ସାମିଲ ହୋଇଛନ୍ତି । ପାଟଣାଗଡ଼ ବିଧାୟକ ପ୍ରାର୍ଥୀ ସରୋଜ ମେହେରଙ୍କ କାର୍ଯ୍ୟଦକ୍ଷତା ଓ ବିକାଶମୁଖୀ ପଦକ୍ଷେପ ଦ୍ୱାରା ଅନୁପ୍ରାଣିତ ହୋଇ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ୱଚ୍ଛ ଓ ନିର୍ମଳ ଶାସନ ପ୍ରତି ଆକୃଷ୍ଟ ହୋଇ ସେମାନେ ବିଜେଡ଼ିରେ ସାମିଲ୍ ହୋଇଥିବା କହିଛନ୍ତି । ପାଟଣାଗଡ଼ ବିଧାୟକ ପ୍ରାର୍ଥୀ ସରୋଜ ମେହେର ସମସ୍ତ ନୂତନ ସଦସ୍ୟଙ୍କୁ ଉତ୍ତରୀୟ ପ୍ରଦାନ କରି ସ୍ୱାଗତ ଜଣାଇଛନ୍ତି ।