ଗଞ୍ଜାମ, (ପ୍ରଦୀପ କୁମାର ପଣ୍ଡା) : ଗଞ୍ଜାମ ଥାନା ଅଗସ୍ତି ନୂଆଗାଁ ସ୍ଥିତ ଷୋହଳ ନଂ ଜାତୀୟ ରାଜପଥଠାରେ ଗତକାଲି ରାତିରେ ଏକ କାର ସହ ସ୍କୁଟି ମୁହାଁମୁହିଁ ଧକ୍କା ହୋଇଥିବା ଜଣାପଡିଛି । ଏଥିରେ ସ୍କୁଟି ଚାଳକ ଅଷ୍ଟମ ବାଟାଲିୟନ ସିପାହୀ ବିଶ୍ୱନାଥ ଦଳବେହେରା (୩୦) ଗୁରୁତର ଆହତ ହୋଇଥିବା ଜଣାପଡିଛି । ଗଞ୍ଜାମ ଥାନା ଏସ୍ଆଇ ଅଜିତ କୁମାର ପରିଡାଙ୍କ ସୂଚନା ଅନୁଯାଇ ସ୍କୁଟି ଚାଳକ ଅଷ୍ଟମ ବାଟାଲିୟନ ପୁରୁଣା ରୋଡ଼ରୁ ବାହାରି ଛତ୍ରପୁର ଯିବା ସମୟରେ ବ୍ରହ୍ମପୁର ପଟୁ ଦୃତ ଗତିରେ ଆସୁଥିବା କାର ସହ ଧକ୍କା ହୋଇଥିଲା । ଫଳରେ ସିପାହୀ ଜଣକ ରାସ୍ତାରେ ଛିଟିକି ପଡ଼ିଥିଲେ । ସ୍ଥାନୀୟ ଲୋକେ ସେଠାରୁ ତାଙ୍କୁ ଉଦ୍ଧାର କରି ପ୍ରଥମେ ଛତ୍ରପୁର, ବ୍ରହ୍ମପୁର ଓ ପରେ ଅବସ୍ଥା ସଙ୍କଟାପର୍ଣ୍ଣ ହେବାରୁ ତାଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଛି ବୋଲି ତଦନ୍ତ କରୁଥିବା ମହିଳା ଏସ୍ଆଇ ସୁପ୍ରଭା ସାହୁ ସୂଚନା ଦେଇଛନ୍ତି । ଏଥିସହ ଦୁର୍ଘଟଣା ଗ୍ରସ୍ତ କାର ଓ ସ୍କୁଟି ଜବତ କରାଯାଇଛି ଏବଂ କେସ ନଂ ୧୭୨/୨୧ ମାମଲା ରୁଜୁ ମଧ୍ୟ କରାଯାଇଥବା ସେ କହିଛନ୍ତି । ଗୁରୁତର ଆହତ ସିପାହୀଙ୍କ ମୁଣ୍ଡରେ ଗଭୀର କ୍ଷତ ସୃଷ୍ଟି ହୋଇଥିବା ଜଣାପଡିଛି ।