- ଆଶାୟୀ ପ୍ରାର୍ଥୀଙ୍କ ଅଭିଯୋଗକୁ ନିର୍ବାଚନ ଅଧିକାରୀ ଅଣଦେଖା କରିଥିବା ନେଇ ଅସନ୍ତୋଷ
ସଇଁନ୍ତଲା, (ଅଜିତ କୁମାର ସାହୁ) : ଚଳିତ ତ୍ରିସ୍ତରୀୟ ନିର୍ବାଚନର ଗତକାଲି ଶେଷ ଦିନରେ ସଇଁନ୍ତଲା ବ୍ଳକର ଜୁରାବନ୍ଧ ପଞ୍ଚାୟତ ପାଇଁ ୧୫ ଜଣ ଆଶାୟୀ ପ୍ରାର୍ଥୀ ସରପଞ୍ଚ ପଦବୀ ପାଇଁ ନାମାଙ୍କନ ଦାଖଲ କରିଥିବା ବେଳେ ଗତକାଲି ନାମାଙ୍କନ ଯାଂଚ ପ୍ରକ୍ରିୟା ସରିବା ପରେ ୯ ଜଣ ପ୍ରାର୍ଥୀଙ୍କ ନାମାଙ୍କନ ସୁରକ୍ଷିତ ରହିଥିବା ଜଣାପଡିଛି । ଜୁରାବନ୍ଧ ପଞ୍ଚାୟତରେ ନିର୍ବାଚନ ଅଧିକାରୀ ଭାବେ ଜନାର୍ଦନ ଯୋଶୀ ରହିଥିଲେ । ସନ୍ଧ୍ୟା ପ୍ରାୟ ୬ ଘଂଟା ସମୟରେ ଆଶାୟୀ ପ୍ରାର୍ଥୀ ପବିତ୍ର ଅମାତ ନିଜର ସମର୍ଥକଙ୍କ ସହ ବ୍ଲକ କାର୍ଯ୍ୟାଳୟକୁ ଆସି ନାମାଙ୍କନ ଯାଞ୍ଚ ପ୍ରକ୍ରିୟାରେ ସଠିକ୍ ଭାବରେ ଯାଂଚ କରାଯାଇନ ଥିବା ଗୋଷ୍ଠୀ ଉନ୍ନୟନ ଅଧିକାରୀଙ୍କଠାରେ ଅଭିଯୋଗ କରିଥିଲେ । ଅଭିଯୋଗ ଅନୁସାରେ ପ୍ରାର୍ଥୀ ପତ୍ର ଦାଖଲ କରିଥିବା ରବିନ୍ଦ୍ରଙ୍କ ୫ଟି ପୁଅ ଝିଅ ଥିବା ବେଳେ ସୂଚନା ଅଧିକାର ବଳରେ ସମନ୍ୱିତ ଶିଶୁ ବିକାଶ କାର୍ଯ୍ୟାଳୟରୁ ଗତ ତା.୨୧/୧/୨୦୨୨ରେ ଆଣିଥିବା ତଥ୍ୟ ଅନୁସାରେ ରବୀନ୍ଦ୍ରଙ୍କ ଝିଅ ରେଶମା ଅମାତ(ଜନ୍ମ ତା.୧୦/୫/୧୯୯୬), ସୀମା ଅମାତ (ଜନ୍ମ୨୫.୪.୧୯୯୭), କରିସ୍ମା ନନ୍ଦ( ଜନ୍ମ ୭.୮.୧୯୯୮), ପରିତୋଷ ନନ୍ଦ (ଜନ୍ମ ତା.୫.୫.୨୦୦୧) ଓ ଜୋଷ୍ଣ। ନନ୍ଦ (ଜନ୍ମ ୭.୫.୨୦୦୪) ରହିଛି । ଭାରତ ସରକାରଙ୍କ ନିର୍ବାଚନ ନିୟମ ଅନୁସାରେ ୧୯୯୪ ପରଠାରୁ ଯାହାର ୨ରୁ ଅଧିକ ସନ୍ତାନ ଥିବେ ସେ ନିର୍ବାଚନ ପାଇଁ ଅଯୋଗ୍ୟ ଅଟନ୍ତି । କିନ୍ତୁ ରବିନ୍ଦ୍ରଙ୍କ ପାଞ୍ଚଟି ପୁଅ ଝିଅ ଥିବା ସତ୍ୱେ ତାଙ୍କ ନାମାଙ୍କନ ନାକଜ ନ ହୋଇ କିଭଳି ଭାବରେ ସୁରକ୍ଷିତ ରହିଲା ତାକୁ ନେଇ ପବିତ୍ର ପ୍ରଶ୍ନ ଉଠାଇଛନ୍ତି । ଏ ବିଷୟରେ ବିଡ଼ିଓ ଚନ୍ଦ୍ରମଣୀ ନାଗକୁ ପଚାରିବାରୁ ପଞ୍ଚାୟତ ଦାୟିତ୍ୱରେ ଥିବା ନିର୍ବାଚନ ଅଧିକାରୀ କୌଣସି କାଗଜପତ୍ର ବର୍ତ୍ତମାନ ସୁଦ୍ଧା ଦାଖଲ କରିନଥିବାରୁ ମୁଁ ଏ ବିଷୟରେ କିଛି କହିପାରିବି ନାହିଁ ବୋଲି କହିଛନ୍ତି । ଆଜି ଜୁରାବନ୍ଧ ପଞ୍ଚାୟତରେ ନିର୍ବାଚନ ଅଧିକାରୀ ଆସିଲା ପରେ ଏ ବିଷୟରେ ଜଣାପଡିବ ବୋଲି କହିଥିଲେ ।