ଖପ୍ରାଖୋଲ, (ଅଶୋକ କୁମାର ବାଗ) : ସମାଜ ସେବାକୁ ପରମ ଧର୍ମ ମନେ କରି ନିଜ ମାଟି ମାଆର ସେବାରେ ନିଜକୁ ନିୟୋଜିତ କରି ସଫଳତାର ପାହାଚରେ ପାଦ ଦେଇଥିବା ବିଶିଷ୍ଟ ପରିବେଶକର୍ମୀ ତଥା ସାମ୍ବାଦିକ ଅଭୟ ତ୍ରିପାଠୀଙ୍କୁ ଡକ୍ଟରେଟ ଉପାଧିରେ ଭୂଷିତ କରାଯାଇଛି । ପ୍ରାକୃତିକ କୃଷି, ପରିବେଶ ସଚେତନତା ଏବଂ ସାମ୍ବାଦିକତା କ୍ଷେତ୍ରରେ ଅଗ୍ରଣୀ ଭୂମିକା ନିର୍ବାହ କରି ଆସୁଥିବା ଅଭୟ ତ୍ରିପାଠୀ ଏବେ ପରିଶ୍ରମର ସଫଳ ସ୍ଵାଦ ପାଇବାରେ ସକ୍ଷମ ହୋଇଛନ୍ତି । ଉତ୍ତରପ୍ରଦେଶ ରାଜ୍ୟ ମଥୁରା ସ୍ଥିତ ପଣ୍ଡିତ ଦିନଦୟାଲ ଉପାଧ୍ୟାୟଙ୍କ ହିନ୍ଦୀ ବିଦ୍ୟାପୀଠ ତରଫ ପକ୍ଷରୁ ତାଙ୍କୁ ଇନ୍ଦୋର ସହର ସ୍ଥିତ ହୋଟେଲ ଶୟାଜୀ ଠାରେ ଏକ ବର୍ଣ୍ଣାଢ଼୍ୟ ସମାରୋହରେ ଡକ୍ଟରେଟ ଉପାଧିରେ ଭୂଷିତ କରାଯାଇଛି । ମଧ୍ୟପ୍ରଦେଶ ଶିଶୁ ସୁରକ୍ଷା ଆୟୋଗ ସଚିବ ତଥା ବିଦ୍ୟାପୀଠର କୁଳପତି ଡ଼ା. ଇନ୍ଦୁ ଭୂଷଣ ମିଶ୍ରଙ୍କ ପୌରାହିତରେ ମୁଖ୍ୟ ଅତିଥିଭାବେ ଅବସରପ୍ରାପ୍ତ ନ୍ୟାୟାଧୀଶ ଦେବେନ୍ଦ୍ର କୁମାର ଜୈନ ପ୍ରମୁଖ ଯୋଗଦେଇ ଶ୍ରୀ ତ୍ରିପାଠୀଙ୍କୁ ଡକ୍ଟରେଟ ଉପାଧିରେ ସମ୍ମାନିତ କରିଥିଲେ । ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଳକ ଅନ୍ତର୍ଗତ ବୁଢ଼ୀବାହାଲ ନିବାସୀ ଅଭୟ ତ୍ରିପାଠୀଙ୍କୁ ଏବେ ବିଭିନ୍ନ ମହଲରୁ ଅନେକ ଶୁଭେଚ୍ଛାର ସୁଅ ଛୁଟିବାରେ ଲାଗିଛି ।