ତୁଷୁରା, (ଲକ୍ଷ୍ମୀକାନ୍ତ ସାହୁ) : ତୁଷୁରା ଅବକାରୀ ବିଭାଗ ଦୁଇଟି ସ୍ଥାନରେ ଚଢ଼ଉ କରି ୨୭କେଜି ଗଞ୍ଜେଇ ଜବତ କରିବା ସହ ୪ଜଣକୁ ଗିରଫ କରିଛି । ପ୍ରଥମେ ଗୁଡଭେଲା ବ୍ଲକ କାଠଗାଁ ଛକଠାରେ ଚଢଉ କରି ଏକ ବାଇକରୁ ୧୫କେଜି ଗଞ୍ଜେଇ ଜବତ କରିଥିବା ବେଳେ ଏହି ଘଟଣାରେ ମୁରିବାହାଲ ଥାନା ଅନ୍ତର୍ଗତ ଗଣ୍ଡାପଦର ଗ୍ରାମର କବିରାଜ ଲୁହା ଓ ଟିଟିଲାଗଡ଼ ଥାନା ମୁନିଗାଁର ଭାଗୀରଥ ପ୍ରଧାନୀକୁ ଗିରଫ କରାଯାଇଥିଲା । ପରେ ଗୁଡ଼ଭେଲା ପଟରୁ ଗଞ୍ଜେଇ ଚାଲାଣ ହେଉଥିବା ଖବର ପାଇ ଅବକାରୀ ବିଭାଗ ଶିରାବାହାଲ ଛକଠାରେ ଏକ ବାଇକରୁ ୧୨ କେଜି ଗଞ୍ଜେଇ ଜବତ କରିଥିଲା । ଏହି ଘଟଣାରେ ମଧ୍ୟ ଦୁଇ ଜଣଙ୍କୁ ଗିରଫ କରାଯାଇଥିବା ବେଳେ ଗିରଫ ଦୁଇ ଜଣ ହେଲେ ପାଟଣାଗଡ଼ ଥାନା ଯୋଗୀମୁଣ୍ଡା ଗ୍ରାମର ଚୁଡ଼ାମଣି ସାହୁ ଓ ହୃଷୀକେଶ ବାଗ । ଏନେଇ ଅବକାରୀ ବିଭାଗ ୨ଟି ମାମଲା ରୁଜୁ କରି ତଦନ୍ତ କରୁଛି । ଗିରଫ ଅଭିଯୁକ୍ତ ମାନଙ୍କୁ କୋର୍ଟଚାଲାଣ କରାଯାଇଛି । ସମସ୍ତ ଅଭିଯୁକ୍ତଙ୍କ ଜାମିନ ନାମଞ୍ଜୁର ହେବାରୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।