ନବରଙ୍ଗପୁର : ଘରେ କେହି ନ ଥିବା ଓ ତାଲା ପଡିଥିବାର ସୁଯୋଗ ନେଇ ରାତିରେ ଘରୁ କରିଥିଲେ ଚୋରି । ଡ଼ିସେମ୍ୱର ୧୧ ତାରିଖରେ ଏତଲା ଆଧାରରେ ପୋଲିସ ଅଭିଯୁକ୍ତଙ୍କୁ ଗିରଫ କରିଛି । ସୂଚନା ଥାଉକି, ଗତ ଡ଼ିସେମ୍ବର ୭ ତାରିଖରେ ନବରଙ୍ଗପୁର ସହର ସେନାପତି ସାହି ଅନ୍ତର୍ଗତ ନ୍ୟୁ କଲୋନୀର ଗୁପ୍ତେଶ୍ଵର ସୁବୁଦ୍ଧି ନାମକ ଜଣେ ବ୍ୟକ୍ତି ନିଜ ମା’ଙ୍କ ସହିତ ସମ୍ପର୍କୀୟଙ୍କ ବାହାଘରରେ ଯୋଗଦେବାକୁ ବ୍ରହ୍ମପୁରକୁ ଯାଇଥିଲେ । ତେବେ ଗୁପ୍ତେଶ୍ଵର ୧୧ ତାରିଖରେ ଘରକୁ ଫେରି ଦେଖିଥିଲେ ତାଙ୍କ ଘରୁ ଚୋରି ହୋଇଛି । କେହି ଦୁର୍ବୃତ୍ତ କବାଟ ଭାଙ୍ଗି ଘରୁ ଚୋରି କରିଛି । ଏନେଇ ଗତ ଡିସେମ୍ବର ୧୧ ତାରିଖରେ ନବରଙ୍ଗପୁର ଥାନାରେ ଏତଲା ଦେଇଥିଲେ । ଏତଲାରେ ୭ ଲକ୍ଷ ଟଙ୍କା ସହିତ ଦୁଇଟି ସୁନା ମୁଦି, ଗୋଟିଏ ସୁନା ଚେନ୍, ଦୁଇଟି ସୁନା କାନ ଫୁଲ ଓ ରୂପା ଥାଳିଆ ସହ ରୁପା ଗ୍ଲାସ ଭଳି ସୁନା ଓ ରୁପା ଅଳଙ୍କାର ଚୋରି ହୋଇଥିବା ନେଇ ଦର୍ଶାଇଥିଲେ । ପୋଲିସ ତଦନ୍ତ କରି ଘଟଣାରେ ଜଡିତ ଅଭିଯୋଗରେ ତିନି ଅଭିଯୁକ୍ତଙ୍କୁ ଗିରଫ କରିଛି । ନବରଙ୍ଗପୁର ମିଶନ କମ୍ପାଉଣ୍ଡର ଜିସୁଦାନ ହିଆଲ, ସେନାପତି ସାହିର କିରଣ କୁମାର ଭୂମିଆ, ତୋଟା ସାହିର କୃଷ୍ଣ ଯାନୀଙ୍କୁ ଗିରଫ କରିଛି ପୋଲିସ । ସେମାନଙ୍କ ନିକଟରୁ ୫୭ ହଜାର ଟଙ୍କା ଗୋଟିଏ ମୋବାଇଲ ଫୋନ ଉଦ୍ଧାର କରିଛି । ଅନ୍ୟ ସବୁ ଚୋରି ସାମଗ୍ରୀ ଉଦ୍ଧାର ପାଇଁ ଚେଷ୍ଟା କରୁଛି ପୋଲିସ ।