ହିମାଚଳ : ଆଜି ହିମାଚଳ ପ୍ରଦେଶରେ ବିଧାନସଭା ନିର୍ବାଚନ ପାଇଁ ଭୋଟ୍ ଦିଆଯାଉଛି । ସକାଳ ୮ ଟାରୁ ଆରମ୍ଭ ହୋଇଥିବା ମତଦାନ ସନ୍ଧ୍ୟା ୫ ଟା ପର୍ଯ୍ୟନ୍ତ ଚାଲିବ । ରାଜ୍ୟର ୬୮ ଟି ଆସନରେ ଗୋଟିଏ ପର୍ଯ୍ୟାୟରେ ହେବାକୁ ଥିବା ନିର୍ବାଚନରେ ୪୧୨ ଜଣ ପ୍ରାର୍ଥୀ ନିର୍ବାଚନ ମଇଦାନରେ ଅଛନ୍ତି । ଡିସେମ୍ବର ୮ରେ ନିର୍ବାଚନ ଫଳାଫଳ ପ୍ରକାଶ ପାଇବ । ରାଜ୍ୟରେ ସମୁଦାୟ ୫୫,୯୨,୮୨୮ ଭୋଟର ଅଛନ୍ତି । ୨୮,୫୪,୯୪୫ ପୁରୁଷ ଏବଂ ୨୭,୩୭,୮୪୫ ମହିଳା ଭୋଟର । ପ୍ରଧାନମନ୍ତ୍ରୀ ମୋଦୀ, ଗୃହମନ୍ତ୍ରୀ ଅମିତ ଶାହା, ସିଏମ ଜୟରାମ ଠାକୁର ଏବଂ କଂଗ୍ରେସ ନେତା ପ୍ରିୟଙ୍କା ଗାନ୍ଧୀଙ୍କ ସମେତ ବହୁ ନେତା ଭୋଟ୍ ଦେବାକୁ ଜନସାଧାରଣଙ୍କୁ ନିବେଦନ କରିଛନ୍ତି ।
ହିମାଚଳ ପ୍ରଦେଶର ମୁଖ୍ୟମନ୍ତ୍ରୀ ଜୟରାମ ଠାକୁର ତାଙ୍କ ପରିବାର ସହିତ ମାଣ୍ଡିର ସିରାଜ ବିଧାନସଭା ନିର୍ବାଚନ ମଣ୍ଡଳୀ ୪୪ ରେ ମତଦାନ କେନ୍ଦ୍ରରେ ଭୋଟ୍ ଦେଇଛନ୍ତି । ଭୋଟ୍ ଦେବା ପରେ ସେ କହିଛନ୍ତି ଯେ, ଆମେ ବିଜୟ ଉପରେ ସମ୍ପୂର୍ଣ୍ଣ ନିଶ୍ଚିତ । ଭୋଟ୍ ଦେବା ପୂର୍ବରୁ ସେ ତାଙ୍କ ପରିବାର ସହିତ ମଣ୍ଡି ମନ୍ଦିରରେ ପୂଜା କରିଥିଲେ । ଏହି ସମୟରେ ତାଙ୍କ ପତ୍ନୀ ଏବଂ ଉଭୟ ଝିଅ ଉପସ୍ଥିତ ଥିଲେ ।