ନୂଆଦିଲ୍ଲୀ : କରୋନା ଜୀବାଣୁ ବିରୋଧରେ ଟୀକାକରଣ ଡ୍ରାଇଭ୍କୁ ନେଇ ଆଜି ସୁପ୍ରିମକୋର୍ଟ ଏକ ବଡ ନିଷ୍ପତ୍ତି ନେଇଛନ୍ତି । ସୁପ୍ରିମକୋର୍ଟ ତାଙ୍କ ଆଦେଶରେ କହିଛନ୍ତି ଯେ, ଏହି ଟୀକା ନେବାକୁ କେହି ବାଧ୍ୟ କରିପାରିବେ ନାହିଁ । ଅଦାଲତ ଏହା ମଧ୍ୟ କହିଛନ୍ତି ଯେ, ବର୍ତ୍ତମାନର ଟୀକା ନୀତିକୁ ଅଯୁକ୍ତିକ ତଥା ଖୋଲାଖୋଲି ଭାବରେ କୁହାଯାଇପାରିବ ନାହିଁ । ସରକାର ନୀତି ପ୍ରସ୍ତୁତ କରି ଲୋକଙ୍କ ହିତ ପାଇଁ କିଛି ସର୍ତ୍ତ ଲଗାଇ ପାରିବେ । ସର୍ବସାଧାରଣ ସ୍ଥାନରେ ଟୀକାକରଣ ନଥିବା ଲୋକଙ୍କ ପ୍ରବେଶ ଉପରେ ପ୍ରତିବନ୍ଧକ ଲଗାଇବା ପାଇଁ କେତେକ ରାଜ୍ୟ ସରକାର ଏବଂ ସଂଗଠନ ଦ୍ୱାରା ଧାର୍ୟ୍ୟ କରାଯାଇଥିବା ସର୍ତ୍ତ ଆନୁପାତିକ ନୁହେଁ ଏବଂ ସାମ୍ପ୍ରତିକ ପରିସ୍ଥିତିରେ ଏହାକୁ ପ୍ରତ୍ୟାହାର କରାଯିବା ଉଚିତ ବୋଲି ସୁପ୍ରିମକୋର୍ଟ କହିଛନ୍ତି । କୋଭିଡ୍ ୧୯ ଟୀକାକରଣର ପ୍ରତିକୂଳ ପ୍ରଭାବ ଉପରେ ସର୍ବସାଧାରଣ ତଥ୍ୟ ଦେବାକୁ ସୁପ୍ରିମକୋର୍ଟ କେନ୍ଦ୍ରକୁ ମଧ୍ୟ ନିର୍ଦ୍ଦେଶ ଦେଇଛନ୍ତି ।