ପ୍ରଧାନମନ୍ତ୍ରୀ ଗତିଶକ୍ତି ଯୋଜନା ଅଧୀନ ୫୫ତମ ନେଟୱାର୍କ ପ୍ଲାନିଂ ଗ୍ରୁପ୍ ପକ୍ଷରୁ ଛ’ଟି ଭିତ୍ତିଭୂମି ପ୍ରକଳ୍ପ ପାଇଁ ସୁପାରିସ
• ଏଥିରେ ତିନିଟି ରେଳବାଇ ଓ ତିନିଟି ସଡକ ପ୍ରକଳ୍ପ ଅନ୍ତର୍ଭୁକ୍ତ: ଏହି ଛ’ଟି ପ୍ରକଳ୍ପ ପାଇଁ ୧୪ହଜାର କୋଟି ଟଙ୍କା ବ୍ୟୟ ହେବା ଘେନି ଆକଳନ କରାଯାଇଛି
• ନେଟତ୍ତ୍ୱାର୍କ ପ୍ଲାନିଂ ଗ୍ରୁପ ଦ୍ୱାରା ଏଯାବତ୍ ୧୧ଲକ୍ଷ କୋଟି ଟଙ୍କାର ୧୦୬ ଟି ପ୍ରକଳ୍ପ ନିମନ୍ତେ ସୁପାରିସ କରାଗଲାଣି
• ନୂଆ ପ୍ରକଳ୍ପରେ ଓଡିଶାରେ ଏକ ନୂଆ ରେଳଲାଇନ୍ ନିର୍ମିତ ହେବ ଏବଂ ଆଉ ଏକ ନୂଆ ରେଳପଥ ଓଡିଶା ଦେଇ ପଶ୍ଚିମବଙ୍ଗ ଓ ଝାଡଖଣ୍ଡକୁ ସଂଯୋଗ କରିବ
ନୂଆଦିଲ୍ଲୀ, (ପିଆଇବି) : ଡିପିଆଇଆଇଟିର ସ୍ୱତନ୍ତ୍ର ସଚିବ ଶ୍ରୀମତୀ ସୁମିତ୍ରା ଦୱରାଙ୍କ ଅଧ୍ୟକ୍ଷତାରେ ଚଳିତମାସ ୧୨ତାରିଖରେ ନୂଆଦିଲ୍ଲୀଠାରେ ୫୫ତମ ନେଟୱାର୍କର୍ ପ୍ଲାନିଂ ଗ୍ରୁପ (ଏନ୍ପିିଜି)ର ଏକ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ସଡକ ପରିବହନ, ବେସାମରିକ ଉଡାଣ, ରେଳବାଇ, ବନ୍ଦର, ଜାହାଜ ଚଳାଚଳ ଓ ଜଳମାର୍ଗ, ଶକ୍ତି ଓ ଅକ୍ଷୟ ଶକ୍ତି, ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ, ଟେଲିଯୋଗାଯୋଗ ବିଭାଗ ଓ ନୀତି ଆୟୋଗର ପ୍ରତିନିଧିମାନେ ଅଂଶଗ୍ରହଣ କରିଥିଲେ ।
ଏଥିରେ ଶ୍ରୀମତୀ ଦୱରା କହିଥିଲେ ଯେ ପ୍ରକଳ୍ପ ଯୋଜନା ପ୍ରସ୍ତୁତିରେ ସରକାର ସାମୁହିକ ଆଭିମୁଖ୍ୟ ପ୍ରଦର୍ଶନ କରୁଛନ୍ତି ଏବଂ ଏଥିରେ ସବୁ ମନ୍ତ୍ରଣାଳୟ ଓ ବିଭାଗ ସବୁମନ୍ତେ ସାହାଯ୍ୟ ସହଯୋଗ ଯୋଗାଉଛନ୍ତି । ଏହା ଫଳରେ ପ୍ରକଳ୍ପ ପ୍ରସ୍ତୁତି ବା ପ୍ରୋଜେକ୍ଟ ପ୍ଲାନିଂ ଏବଂ ଏହାର କାର୍ଯ୍ୟକାରିତାରେ ନୂଆ ଦିଶା ମିଳିଛି । ସବୁ ମନ୍ତ୍ରଣାଳୟ ଓ ବିଭାଗର ସହଯୋଗରେ ପିଏମ୍ ଗତିଶକ୍ତି ଯୋଜନାର କାର୍ଯ୍ୟକାରିତା ତ୍ୱରାନ୍ୱିତ ହେଉଛି । ଏହି ବୈଠକ ଅବସରରେ ପିଏମ୍ ଗତିଶକ୍ତି ଯୋଜନାର ବିଭିନ୍ନ ଲାଭ ସମ୍ପର୍କରେ ତଥ୍ୟାବଳୀ ଉପସ୍ଥାପିତ ହୋଇଥିଲା। ଏଥିରେ ଏନ୍ଏସ୍ପିର ଡିଜିଟାଲ ସର୍ଭେ, ଡିପିଆର ପ୍ରସ୍ତୁତି ବାବଦ ସମୟ ହ୍ରାସ, ଟେକ୍ନୋଲୋଜି ସହାୟତାରେ ଦକ୍ଷ ପ୍ରକଳ୍ପର ପ୍ରଶାସନ ବ୍ୟବସ୍ଥା ତଥା ସାମାଜିକ କ୍ଷେତ୍ର ପାଇଁ ସୃଷ୍ଟି ହୋଇଥିବା ସମ୍ବଳ ଆଦି ସ୍ଥାନ ପାଇଥିଲା ।
ବୈଠକରେ ଛ’ଟି ପ୍ରକଳ୍ପକୁ ଅନୁମୋଦନ କରାଯାଇ ତାହାର କାର୍ଯ୍ୟକାରିତା ନିମନ୍ତେ ସରକାରଙ୍କୁ ସୁପାରିସ କରାଯାଇଛି । ଏଥିରେ ରହିଛି ତିନିଟି ରେଳବାଇ ଓ ତିନିଟି ସଡକ ପ୍ରକଳ୍ପ । ଏଥିରେ ଓଡିଶାରେ ଏକ ନୂଆ ରେଳପଥ ନିର୍ମାଣ ସହିତ ଓଡିଶା ଦେଇ ପଶ୍ଚିମବଙ୍ଗ ଓ ଝାଡଖଣ୍ଡକୁ ସଂଯୁକ୍ତ କରିବା ପାଇଁ ଏକ ନୂଆ ରେଳପଥ ନିର୍ମାଣ ହେବ । ଏହାକୁ ମିଶାଇ ଏନ୍ପିଜି ଦ୍ୱାରା ଏଯାଏ ମୋଟ ୧୦୬ପ୍ରକଳ୍ପକୁ କାର୍ଯ୍ୟକାରୀ କରିବାକୁ ସୁପାରିସ କରାଯାଇଥିବାବେଳେ ଏ ବାବଦରେ ମୋଟ ଖର୍ଚ୍ଚ ଆକଳନ ହୋଇଛି ୧୧ଲକ୍ଷ କୋଟି ଟଙ୍କା ।
ଯେଉଁ ତିନିଟି ରେଳ ପ୍ରକଳ୍ପକୁ ଏନ୍ପିଜି ସୁପାରିସ କରିଛି ସେଗୁଡିକ ହେଲା ଓଡିଶା, ଝାଡଖଣ୍ଡ ଓ ପଶ୍ଚିମବଙ୍ଗ ଦେଇ ଏକ ସମ୍ପୂର୍ଣ୍ଣ ନୂଆ ରେଳପଥ ନିର୍ମାଣ, କେବଳ ଓଡିଶାରେ ଏକ ସ୍ୱତନ୍ତ୍ର ରେଳପ୍ରକଳ୍ପ ନିର୍ମାଣ ଯାହା ବର୍ତ୍ତମାନର ରେଳପଥର ଭିଡ ହ୍ରାସ କରିବାକୁ ଉଦ୍ଧିଷ୍ଟ ଏବଂ ତୃତୀୟଟି ଗୁଜରାଟରେ ନିର୍ମିତ ହେବାକୁ ଥିବା ଏକ ରେଳ ପ୍ରକଳ୍ପ । ଏସବୁ ନୂଆ ରେଳପ୍ରକଳ୍ପ ଇସ୍ପାତ, ସିମେଣ୍ଟ ଓ ଶକ୍ତି ଉଦ୍ୟୋଗକୁ ଲାଭନ୍ୱିତ କରିବ । ଏହା ଦ୍ୱାରା କୋଇଲା, ଚୂନପଥର, ଲୁହାପଥର ଓ ଅନ୍ୟାନ୍ୟ ଉତ୍ପାଦିତ ସାମଗ୍ରୀ ପରିବହନ ସୁଗମ ହେବ । ଏହାଛଡା ଏହି ନୂଆ ରେଳପଥ ଯାତ୍ରୀ ପରିବହନ ବ୍ୟବସ୍ଥାରେ ମଧ୍ୟ ସହାୟକ ହେବ । ଏସବୁ ରେଳପ୍ରକଳ୍ପ ଖଣି ଓ ଶିଳ୍ପାଞ୍ଚଳ ମଧ୍ୟରେ ଦୂରତ୍ୱ ହ୍ରାସ କରିବା ସହ ବର୍ତ୍ତମାନର ରେଳପଥ ଉପରୁ ଚାପ କମାଇବ । ଏହି ତିନି ପ୍ରକଳ୍ପ ପାଇଁ ୫୩୭୪.୫କୋଟି ଟଙ୍କା ଖର୍ଚ୍ଚ ହେବ ବୋଲି ହିସାବ କରାଯାଇଛି । ରେଳବାଇ ଏହି ଅର୍ଥ ଖର୍ଚ୍ଚ କରିବ ।
ସେହିଭଳି ତିନିଟି ସଡକ ପ୍ରକଳ୍ପ ପାଇଁ ୮୭୦୬କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଛି । ସଡକ ଓ ରାଜମାର୍ଗ ମନ୍ତ୍ରଣାଳୟ ଏହାକୁ କାର୍ଯ୍ୟକାରୀ କରିବ । ଏହି ତିନିଟି ପ୍ରକଳ୍ପ ହେଲା ଧ୍ରୁବୀ ବ୍ରିଜ-ଗୋଏରାଗ୍ରେ, ଖଡଗପୁର-ମୋରେଗ୍ରାମ୍ ଓ ଦେଓଘର ବାଇପାସ୍ । ପ୍ରଥମ ପ୍ରକଳ୍ପଟି ଏହା ଏବେ ନିର୍ମାଣଧୀନ ୪ଲେନ ବିଶିଷ୍ଟ ଧ୍ରୁବ୍ରୀ-ଫୁଲବାଡି ସେତୁକୁ ସଂଯୋଗ କରି ପୂର୍ବ-ପଶ୍ଚିମ ରୋଡ କରିଡର ସହିତ ସଂଯୁକ୍ତ ହେବ । ଏହା ଫଳରେ ଉତ୍ତର ପୂର୍ବାଞ୍ଚଳ ସହିତ ଦେଶର ମୁକ୍ୟ ଭୂଖଣ୍ଡକୁ ଉତ୍ତମ ସଡ ସଂଯୋଗ ସ୍ଥାପିତ ହୋଇପାରିବ । ଭାରତ ସରକାର ଏହା ଉପରେ ସ୍ୱତନ୍ତ୍ର ଗୁରୁତ୍ୱ ଦେଉଛନ୍ତି । ଏହା ମଧ୍ୟ ଭାରତ-ବାଂଲାଦେଶ ମଧ୍ୟରେ ବାଣିଜ୍ୟ କାରବାରକୁ ସୁଗମ କରିବ । ଦୁଇ ଦେଶର ସୀମାବର୍ତ୍ତୀ ଅଞ୍ଚଳର ଲୋକେ ଏହା ଦ୍ୱାରା ବିଶେଷ ଉପକୃତ ହେବେ।
ସେହିଭଳି ଖଡଗପୁର ଓ ମୋରେଗ୍ରାମ ମଧ୍ୟରେ ଏକ ନୂଆ ରାଜପଥ ନିର୍ମାଣ ହେବ ।ଏହା ଖଡଗପୁର-ସିଲିଗୁଡି ରାଜପଥର ଅଂଶ ବିଶେଷ ପାଲଟିବ । ଏହାଫଳରେ ଖଡଗପୁର ଓ ସିଲିଗୁଡି ମଧ୍ୟରେ ଦୂରତ୍ୱ ୧୧୨କିଲୋମିଟର ଓ ଯାତ୍ରା ସମୟ ସାତଘଣ୍ଟା ହ୍ରାସ ପାଇବ । ଏହି ପ୍ରକଳ୍ପ ଦ୍ୱାରା ଏକାଧିକ ଆକାଂକ୍ଷୀ ଜିଲ୍ଲା ଏବଂ ମାସ ଅଧୁଷିତ ପଶ୍ଚିମ ମେଦିନୀପୁର ଜିଲ୍ଲାକୁ ଲାଭ ମିଳିବ । ଏହି ନୂଆ ସଡକପଥ ମଧ୍ୟ କୋଲକାତା- ହଳଦିଆ ମଧ୍ୟରେ ଆର୍ନ୍ତଜାତିକ ବାଣିଜ୍ୟ କାରବାରକୁ ସୁଗମ ହେବ । ଏହି ସଡକ ପ୍ରକଳ୍ପ ଦ୍ୱାରା ଏକାଧିକ ଅ
ତୃତୀୟ ସଡକ ପ୍ରକଳ୍ପଟି ଝାଡଖଣ୍ଡର ଦେଓଘର ଦେଇ ନିର୍ମିତ ହେବ । ଏହା ମୁଖ୍ୟତଃ ଏକ ବାଇପାସ୍ ସଡକ ହେବ ଏବଂ ଦେଓଘର ସହର ନିକଟ ଦେଇ ଯିବ । ଏହା ଦ୍ୱାରା ସେହି ସହରର ଟ୍ରାଫିକ ବୋଝ ହ୍ରାସ ପାଇବା ସହ ସ୍ଥାନୀୟ ଶିଳ୍ପ ସଂସ୍ଥା ଓ ଉଦ୍ୟୋଗ ଲାଭ ପାଇବେ ।
ଏସବୁ ପ୍ରକଳ୍ପ ସମ୍ପୃକ୍ତ ଅଞ୍ଚଳର ସାମାଜିକ-ଆର୍ଥିକ ବିକାଶ ପାଇଁ ମଲ୍ଟି ମୋଡାଲ ସଂଯୋଗ ବ୍ୟବସ୍ଥା ଯୋଗାଇବ ।