ଅମରନାଥ ଯାତ୍ରା ପାଇଁ ସ୍ୱାସ୍ଥ୍ୟ ସେବାର ସମୀକ୍ଷା କରିଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟ
- ଭକ୍ତମାନଙ୍କ ପାଇଁ ଚିକିତ୍ସା ସେବା ଏବଂ ସ୍ୱାସ୍ଥ୍ୟ ସୁବିଧା ପାଇଁ ଜାମୁ ଏବଂ କାଶ୍ମୀରକୁ ସମସ୍ତ ସହାୟତା ପ୍ରଦାନ ନିଶ୍ଚିତ କରିଛନ୍ତି
- ଯାତ୍ରା ସମୟରେ ସମସ୍ତ ଭକ୍ତଙ୍କୁ ସର୍ବୋତ୍ତମ ସ୍ୱାସ୍ଥ୍ୟ ସେବା ଏବଂ ଚିକିତ୍ସା ସୁବିଧା ଯୋଗାଇ ଦିଆଯିବା ସୁନିଶ୍ଚିତ କରାଯିବ: ଡକ୍ଟର ମନସୁଖ ମାଣ୍ଡଭୀୟ
- ବାଲଟାଲ ଏବଂ ଚନ୍ଦନୱାରୀରେ ୧୦୦ ଶଯ୍ୟା ବିଶିଷ୍ଟ ଡାକ୍ତରଖାନା ପ୍ରତିଷ୍ଠା ; ୨୪ଘଣ୍ଟିଆ କାର୍ଯ୍ୟ କରିବ
- ଡାକ୍ତର ଏବଂ ସ୍ୱାସ୍ଥ୍ୟ ସେବା କର୍ମଚାରୀଙ୍କ ଦଳକୁ ନିୟୋଜିତ କରାଯାଉଛି
ନୂଆଦିଲ୍ଲୀ, (ପିଆଇବି) : କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟ ଆଜି ଏଠାରେ ସ୍ୱାସ୍ଥ୍ୟ ମନ୍ତ୍ରଣାଳୟ ଏବଂ ଡିଜିଏଚଏସର ବରିଷ୍ଠ ଅଧିକାରୀଙ୍କ ସହ ଅମରନାଥ ଯାତ୍ରା କରୁଥିବା ଭକ୍ତଙ୍କ ପାଇଁ ସ୍ୱାସ୍ଥ୍ୟ ସେବା ତଥା ପର୍ଯ୍ୟାପ୍ତ ଗୁଣାତ୍ମକ ସ୍ୱାସ୍ଥ୍ୟ ସୁବିଧା ପ୍ରଦାନର ସମୀକ୍ଷା କରିଛନ୍ତି ।
ବେସ୍ କ୍ୟାମ୍ପରେ ଏବଂ ଯାତ୍ରା ପଥରେ ଦିଆଯାଉଥିବା ଚିକିତ୍ସା ସେବା ତଥା ଅନ୍ୟାନ୍ୟ ସ୍ୱାସ୍ଥ୍ୟ ସୁବିଧା ବିଷୟରେ ତାଙ୍କୁ ସୂଚନା ଦିଆଯାଇଥିଲା । ଜାମୁ କାଶ୍ମୀରର କେନ୍ଦ୍ରଶାସିତ ଅଞ୍ଚଳକୁ ସହାୟତା କରିବାକୁ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଅଧିକାରୀମାନଙ୍କୁ ନିର୍ଦ୍ଦେଶ ଦେଇ କହିଛନ୍ତି ଯେ ଯାତ୍ରୀମାନଙ୍କୁ ଆବଶ୍ୟକ ସ୍ୱାସ୍ଥ୍ୟ ସୁବିଧା ତଥା ଚିକିତ୍ସା ସେବା ଯୋଗାଇ ଦିଆଯାଉ ଯାହା ଦ୍ୱାରା କଠିନ ଯାତ୍ରା ସମୟରେ ସେମାନେ ଶାରୀରିକ ଭାବେ ସୁସ୍ଥ ରହିପାରିବେ । ମନ୍ତ୍ରୀ କହିଛନ୍ତି ଯେ ଯାତ୍ରା ସମୟରେ ଭକ୍ତମାନଙ୍କୁ ସର୍ବୋତ୍ତମ ସ୍ୱାସ୍ଥ୍ୟ ସେବା ଏବଂ ଚିକିତ୍ସା ସୁବିଧା ଯୋଗାଇ ଦିଆଯିବ ।
ଭୌଗୋଳିକ ଆହ୍ୱାନ, ବିଶେଷକରି ଉଚ୍ଚତା ପ୍ରସଙ୍ଗରେ ଅମରନାଥ ଯାତ୍ରା ବ୍ୟତିକ୍ରମ । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କ ନିର୍ଦ୍ଦେଶ ଅନୁଯାୟୀ ସ୍ୱାସ୍ଥ୍ୟ ମନ୍ତ୍ରଣାଳୟ ଜାମ୍ମୁ କାଶ୍ମୀରର କେନ୍ଦ୍ରଶାସିତ ଅଞ୍ଚଳ ସରକାରଙ୍କୁ ପର୍ଯ୍ୟାପ୍ତ ସ୍ୱାସ୍ଥ୍ୟ ଆବଶ୍ୟକତାକୁ ବଢାଇବା ଏବଂ ପୂର୍ବାନୁମାନ କରିବା ସହିତ ଯାତ୍ରା ପାଇଁ ସ୍ୱାସ୍ଥ୍ୟ ସେବା ବ୍ୟବସ୍ଥା ଲାଗି ସହାୟତା କରୁଛନ୍ତି ।
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ବେସ୍ କ୍ୟାମ୍ପରେ ଚିକିତ୍ସା ସୁବିଧା ସ୍ଥାପନ କରାଯାଇଛି ଏବଂ ଆବଶ୍ୟକ ଭିତ୍ତିଭୂମି ସହିତ ସଂଯୁକ୍ତ କରାଯାଇଛି ।
ବାଲଟାଲ ଏବଂ ଚନ୍ଦନୱାରୀରେ ୧୦୦ ଶଯ୍ୟା ବିଶିଷ୍ଟ ଡାକ୍ତରଖାନା ପ୍ରତିଷ୍ଠା ।
କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଦୁଇଟି ଅକ୍ଷ ମାର୍ଗ ବାଲଟାଲ ଏବଂ ଚନ୍ଦନୱାରୀରେ ଡିଆରଡିଓ ଦ୍ୱାରା କାର୍ଯ୍ୟକ୍ଷମ ହୋଇଆସୁଥିବା ଦୁଇଟି ୧୦୦ ଶଯ୍ୟା ବିଶିଷ୍ଟ ଡାକ୍ତରଖାନା ପ୍ରତିଷ୍ଠା ପାଇଁ ସମ୍ପୂର୍ଣ୍ଣ ଅର୍ଥ ପ୍ରଦାନ ଏବଂ ସହାୟତା କରିଛି । ଏହି ଡାକ୍ତରଖାନାଗୁଡ଼ିକରେ ଯାତ୍ରୀଙ୍କ ପାଇଁ ନିୟୋଜିତ କର୍ମଚାରୀଙ୍କ ରହିବା ସୁବିଧା ଅନ୍ତର୍ଭୁକ୍ତ ହେବ । ଏହି ଡାକ୍ତରଖାନାଗୁଡ଼ିକରେ ପରୀକ୍ଷାଗାର ସୁବିଧା, ରେଡିଓ ଡାଏଗ୍ନୋସିସ୍, ସ୍ତ୍ରୀ ରୋଗ, ଆଇସିୟୁ, ହାଇପରବାରିକ୍ ଅମ୍ଳଜାନ ଚାମ୍ବର ସହିତ ନିରାକରଣ ଏବଂ ଚିକିତ୍ସା ପାଇଁ ସମସ୍ତ ସୁବିଧା ରହିବ ।
ଏହି ଡାକ୍ତରଖାନାଗୁଡ଼ିକ ୨୪ଘଣ୍ଟିଆ କାର୍ଯ୍ୟ କରିବ ଏବଂ ଏକ ସ୍ୱତନ୍ତ୍ର ଟ୍ରମା ୟୁନିଟ୍ ସହିତ ବିଶେଷଜ୍ଞ ଡାକ୍ତରଙ୍କ ଦ୍ୱାରା ପରିଚାଳିତ ହେବ ।
ସ୍ୱାସ୍ଥ୍ୟ ସେବା କର୍ମଚାରୀଙ୍କ ଡେପୁଟେସନ
ଡିଜିଏଚଏସ (ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ) ମଧ୍ୟ ୧୧ ଟି ରାଜ୍ୟ / କେନ୍ଦ୍ରଶାସିତ ଅଞ୍ଚଳ ଏବଂ କେନ୍ଦ୍ର ସରକାରୀ ଡାକ୍ତରଖାନାରୁ ନାମାଙ୍କନ ମାଗି ସ୍ୱାସ୍ଥ୍ୟସେବା କର୍ମଚାରୀଙ୍କ ଡେପୁଟେସନ ଆରମ୍ଭ କରିଛି । ଏହି ଦଳଗୁଡିକ ୪ ଟି ବ୍ୟାଚ୍ / ସିଫ୍ଟରେ ମୁତୟନ ହେବେ । ଡେପୁଟେସନ୍ ପାଇଁ ମନୋନୀତ ଡାକ୍ତର / ପାରାମେଡିକ୍ସର ଦକ୍ଷତା ବଢାଇବା ସହିତ ଉଚ୍ଚ ସ୍ଥାନରେ ରୋଗ ଏବଂ ଜରୁରୀକାଳୀନ ପରିସ୍ଥିତିରେ କିଭଳି ସ୍ୱାସ୍ଥ୍ୟସେବା ପ୍ରଦାନ କରାଯିବ ସେ ସଂକ୍ରାନ୍ତରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଦ୍ୱାରା କେନ୍ଦ୍ରଶାସିତ ଅଞ୍ଚଳ ସହିତ ସମନ୍ୱୟ ରକ୍ଷା କରାଯାଉଛି । ଡିଟିଇଜିଏଚ୍ଏସର ଜରୁରୀକାଳୀନ ମେଡିକାଲ ରିଲିଫ ଡିଭିଜନର ଏକ ଟିମ୍ ଚଳିତବର୍ଷର ଯାତ୍ରା ପ୍ରସ୍ତୁତିର ସମୀକ୍ଷା ପାଇଁ ଉପଲବ୍ଧ ସ୍ଥାନୀୟ ଚିକିତ୍ସା ଭିତ୍ତିଭୂମି / ସୁବିଧା ଏବଂ ଅସ୍ଥାୟୀ ଡାକ୍ତରଖାନାର ମୂଲ୍ୟାଙ୍କନ କରୁଛି ।
ୱେବ୍ ପୋର୍ଟାଲ୍ / ଆଇଟି ଆପ୍ଲିକେଶନ
ଉତ୍ତମ ଜରୁରୀକାଳୀନ ପ୍ରସ୍ତୁତି, ରୋଗର କାରଣକୁ ବୁଝିବା ଏବଂ ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ୟାଗୁଡ଼ିକର ତଦାରଖ ପାଇଁ ଏକ କଷ୍ଟୋମାଇଜ୍ ହୋଇଥିବା ୱେବ୍-ଆଧାରିତ ରିଅଲ୍-ଟାଇମ୍ ତଥ୍ୟ ସଂଗ୍ରହ ମଡ୍ୟୁଲ୍ ଇଣ୍ଟିଗ୍ରେଟେଡ୍ ଡିଜିଜ୍ ସର୍ଭିଲାନ୍ସ ପ୍ରୋଗ୍ରାମ୍ (ଆଇଡିଏସପି) ସମନ୍ୱିତ ସ୍ୱାସ୍ଥ୍ୟ ସୂଚନା ପ୍ଲାଟଫର୍ମ (ଆଇଏଚଆଇପି) ନେସନାଲ ସେଣ୍ଟର ଫର ଡିଜିଜ୍ କଣ୍ଟ୍ରୋଲ (ଏନସିଡିସି)ର ପୋର୍ଟାଲ ଦ୍ୱାରା ବିକଶିତ କରାଯାଉଛି ।
ସଚେତନତା ପରାମର୍ଶ
ତୀର୍ଥଯାତ୍ରୀମାନଙ୍କ ସଚେତନତା ବୃଦ୍ଧି ପାଇଁ କ’ଣ କରାଯିବ ଏବଂ କ’ଣ କରାନଯିବ ସେଥିନେଇ ସ୍ୱାସ୍ଥ୍ୟ ମନ୍ତ୍ରଣାଳୟ ମାର୍ଗଦର୍ଶିକା ପ୍ରସ୍ତୁତ କରିଛି । ଉଚ୍ଚ ସ୍ଥାନରେ ଜରୁରୀକାଳୀନ ପରିସ୍ଥିତିର ଚିକିତ୍ସା ପରିଚାଳନା ପାଇଁ ଏସଓପି ଗୁଡିକ ପ୍ରସ୍ତୁତ କରାଯାଇଛି ।