ସିଆର୍ପିଏଫ୍ ଦିବସ ପରେଡ-୨୦୨୫କୁ ସମ୍ବୋଧିତ କରିଛନ୍ତି କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ
- ଦେଶର ସୁରକ୍ଷା ପାଇଁ ସେମାନଙ୍କ ସର୍ବୋଚ୍ଚ ବଳିଦାନକୁ ସ୍ମରଣ କରି କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ରାଷ୍ଟ୍ର ତରଫରୁ ୨୨୬୪ ସିଆର୍ପିଏଫ୍ ଯବାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି
- ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ସମସ୍ତ ସିଏପିଏଫ୍ ପାଇଁ ଅନେକ କଲ୍ୟାଣମୂଳକ ପଦକ୍ଷେପ ଗ୍ରହଣ କରିଛନ୍ତି
- ଦେଶର ଏକତା ଏବଂ ଅଖଣ୍ଡତା ବଜାୟ ରଖିବା ପାଇଁ ସିଆରପିଏଫ୍ ଯବାନମାନେ ସର୍ବଦା ସର୍ବୋଚ୍ଚ ବଳିଦାନ ଦେଇଛନ୍ତି
- ସିଆରପିଏଫ୍ର କୋବ୍ରା ବାଟାଲିଅନକୁ ଦେଖି ଦୁର୍ଦ୍ଦାନ୍ତ ନକ୍ସଲମାନେ ଭୟଭୀତ ହୁଅନ୍ତି
- ସିଆର୍ପିଏଫ୍ ପାଇଁ ପଶୁପତିନାଥରୁ ତିରୁପତି ପର୍ଯ୍ୟନ୍ତ ଲାଲ ଆତଙ୍କ ବିସ୍ତାର କରିବାର ସ୍ୱପ୍ନ ଦେଖିଥିବା ନକ୍ସଲମାନେ ଆଜି ୪ଟି ଜିଲ୍ଲାରେ ସୀମିତ ରହିଛନ୍ତି
- ଦେଶକୁ ନକ୍ସଲବାଦରୁ ମୁକ୍ତ କରିବାରେ ସିଆର୍ପିଏଫ୍ ସବୁଠାରୁ ବଡ଼ ଭୂମିକା ଗ୍ରହଣ କରିବ
- ସିଆର୍ପିଏଫ୍ ଗତ ୫ ବର୍ଷ ମଧ୍ୟରେ ନକ୍ସଲ ପ୍ରଭାବିତ ଅଞ୍ଚଳରେ ୪୦୦ରୁ ଅଧିକ ଫରୱାର୍ଡ ଅପରେଟିଂ ବେସ୍ ପ୍ରତିଷ୍ଠା କରିଛି, ଯେଉଁ କାରଣରୁ ୧୦ ବର୍ଷ ମଧ୍ୟରେ ନକ୍ସଲ ହିଂସା ୭୦ ପ୍ରତିଶତରୁ ଅଧିକ ହ୍ରାସ ପାଇଛି
- ଧାରା ୩୭୦ ଉଚ୍ଛେଦ ହେବା ପରେ ଜାମ୍ମୁ-କାଶ୍ମୀରରେ ବିଧାନସଭା ନିର୍ବାଚନ ଶାନ୍ତିପୂର୍ଣ୍ଣ ଭାବେ ଏବଂ ଗୋଟିଏ ବି ଗୁଳି ନ ଫୁଟି ସିଆର୍ପିଏଫ୍ ଏବଂ ଅନ୍ୟ ସୁରକ୍ଷା ବାହିନୀ ଦ୍ୱାରା ସମ୍ପନ୍ନ ହୋଇଥିଲା
- ସିଆର୍ପିଏଫ୍ କେବଳ ଭାରତରେ ନୁହେଁ, ବରଂ ବିଶ୍ୱର ସର୍ବବୃହତ୍ ପାରାମିଲିଟାରୀ ଫୋର୍ସ
ନୂଆଦିଲ୍ଲୀ, (ପିଆଇବି) : କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ ମଧ୍ୟପ୍ରଦେଶର ନିମୁଚଠାରେ କେନ୍ଦ୍ରୀୟ ରିଜର୍ଭ ପୋଲିସ୍ ଫୋର୍ସ (ସିଆର୍ପିଏଫ୍) ଦିବସ ପରେଡରେ ମୁଖ୍ୟ ଅତିଥି ଭାବେ ସମ୍ବୋଧିତ କରିଛନ୍ତି। ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଡକ୍ଟର ମୋହନ ଯାଦବ ଏବଂ ସିଆର୍ପିଏଫ୍ ମହାନିର୍ଦ୍ଦେଶକଙ୍କ ସମେତ ଅନେକ ମାନ୍ୟଗଣ୍ୟ ବ୍ୟକ୍ତି ଏହି ଅବସରରେ ଉପସ୍ଥିତ ଥିଲେ । କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ତାଙ୍କ ଅଭିଭାଷଣରେ ଦେଶର ସୁରକ୍ଷା ପାଇଁ ୨୨୬୪ ସିଆର୍ପିଏଫ୍ ଯବାନଙ୍କ ସର୍ବୋଚ୍ଚ ବଳିଦାନକୁ ସ୍ମରଣ କରିଥିଲେ ଏବଂ କୃତଜ୍ଞ ରାଷ୍ଟ୍ର ତରଫରୁ ସେମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସେ କହିଥିଲେ ଯେ ୨୦୪୭ ମସିହା ସୁଦ୍ଧା ଭାରତ ପ୍ରତ୍ୟେକ କ୍ଷେତ୍ରରେ ବିଶ୍ୱରେ ଅଗ୍ରଣୀ ହେବା ଦିଗରେ ଅଗ୍ରସର ହେଉଛି ଏବଂ ସହିଦ ସିଆର୍ପିଏଫ୍ ଯବାନଙ୍କ ବଳିଦାନ ଏହି ଲକ୍ଷ୍ୟ ହାସଲ କରିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛି। ଶ୍ରୀ ଶାହ କହିଥିଲେ ଯେ ସିଆର୍ପିଏଫ୍ ଶହୀଦମାନଙ୍କ ସାହସିକତାର ଅମର ଗାଥା ସ୍ୱାଧୀନତାର ୧୦୦ ବର୍ଷର ସୁବର୍ଣ୍ଣ ପୁସ୍ତକରେ ସ୍ୱର୍ଣ୍ଣିମ ଅକ୍ଷରରେ ଲିପିବଦ୍ଧ ହେବ। ସେ କହିଥିଲେ ଯେ ଦେଶର ଏକତା ଏବଂ ଅଖଣ୍ଡତା ବଜାୟ ରଖିବା ପାଇଁ ସିଆର୍ପିଏଫ୍ ଯବାନମାନେ ସର୍ବଦା ସର୍ବୋଚ୍ଚ ବଳିଦାନ ଦେଇଛନ୍ତି । ସେଥିପାଇଁ ଅଶାନ୍ତ ସ୍ଥାନରେ ସିଆର୍ପିଏଫ୍ ଯବାନଙ୍କ ଉପସ୍ଥିତି ଆତ୍ମବିଶ୍ୱାସ ସୃଷ୍ଟି କରେ ଯେ ସେମାନେ ନିଶ୍ଚିତ ଭାବରେ ବିଜୟୀ ହେବେ । ଅମିତ ଶାହ କହିଥିଲେ ଯେ ୨୦୧୯ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଦ୍ୱିତୀୟ ଥର ପାଇଁ ସରକାର ଗଠନ ହେବା ପରେ ନିଷ୍ପତ୍ତି ନିଆଯାଇଥିଲା ଯେ ଦେଶର ବିଭିନ୍ନ ଭାଗରେ ସମସ୍ତ ସୁରକ୍ଷା ବାହିନୀର ପ୍ରତିଷ୍ଠା ଦିବସ ପାଳନ କରାଯିବ । ଏହି ନିଷ୍ପତ୍ତି ଅନୁଯାୟୀ, ସିଆର୍ପିଏଫ୍ର ଏହି ବାର୍ଷିକ ପରେଡ ଆଜି ନୀମୁଚରେ ଆୟୋଜିତ ହେଉଛି । ସେ କହିଥିଲେ ଯେ ସିଆର୍ପିଏଫ୍ର ଯୋଗଦାନକୁ ଦେଶର ସୁରକ୍ଷାରୁ ଅଲଗା ଭାବେ ଦେଖାଯାଇପାରିବ ନାହିଁ । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ କାଶ୍ମୀରରେ ଆତଙ୍କବାଦୀଙ୍କ ସହ ଲଢ଼ିବା ହେଉ, ଉତ୍ତର-ପୂର୍ବରେ ଶାନ୍ତି ବଜାୟ ରଖିବା ହେଉ, କିମ୍ବା ଦୁର୍ଦ୍ଦାନ୍ତ ନକ୍ସାଲଙ୍କ କାର୍ଯ୍ୟକଳାପକୁ କେବଳ ଚାରୋଟି ଜିଲ୍ଲାରେ ସୀମିତ ରଖିବା ହେଉ, ଆମର ସିଆରପିଏଫ୍ ଯବାନମାନେ ଏହି ସମସ୍ତ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛନ୍ତି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ୧୯୩୯ ମସିହାରେ କ୍ରାଉନ୍ ରିପ୍ରେଜେଣ୍ଟେଟିଭ୍ ପୋଲିସ୍ ନାମରେ ସିଆର୍ପିଏଫ୍ ଗଠନ କରାଯାଇଥିଲା । ଏହି ବାହିନୀକୁ ଏହାର ବର୍ତ୍ତମାନର ନୂତନ ରୂପ ଏବଂ ପତାକା ପ୍ରଦାନ କରିବାର କାର୍ଯ୍ୟ ଦେଶର ପ୍ରଥମ ଗୃହମନ୍ତ୍ରୀ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଦ୍ୱାରା କରାଯାଇଥିଲା । ସେ କହିଥିଲେ ଯେ ସର୍ଦ୍ଦାର ପଟେଲ କେବଳ ସିଆର୍ପିଏଫ୍ ପ୍ରତିଷ୍ଠା କରି ଏହାକୁ ପତାକା ପ୍ରଦାନ କରିନଥିଲେ, ବରଂ ଏହାର ସନନ୍ଦକୁ ସ୍ପଷ୍ଟ ଭାବେ ଚିହ୍ନଟ କରିବାର କାର୍ଯ୍ୟ ମଧ୍ୟ କରିଥିଲେ । ସର୍ଦ୍ଦାର ପଟେଲଙ୍କ ଦ୍ୱାରା ପ୍ରଦର୍ଶିତ ମାର୍ଗରେ ସିଆର୍ପିଏଫ୍ ଏକ ଦୀର୍ଘ ଗୌରବମୟ ଯାତ୍ରା ସମ୍ପୂର୍ଣ୍ଣ କରିଛି । ସେ କହିଥିଲେ ଯେ ଆଜି ଦେଶର ଶାନ୍ତି ଏବଂ ସୁରକ୍ଷା ପାଇଁ ୨୪୮ ବାଟାଲିୟନ, ୪ଟି ଜୋନାଲ ମୁଖ୍ୟାଳୟ, ୨୧ଟି ସେକ୍ଟର ମୁଖ୍ୟାଳୟ, ୨ଟି କାର୍ଯ୍ୟକ୍ଷମ ସେକ୍ଟର ମୁଖ୍ୟାଳୟ, ୧୭ଟି ରେଞ୍ଜ ଏବଂ ୩୯ଟି ପ୍ରଶାସନିକ ରେଞ୍ଜରେ ପାଖାପାଖି ୩ ଲକ୍ଷ ସିଆର୍ପିଏଫ୍ ଯବାନଙ୍କୁ ନିୟୋଜିତ କରାଯାଇଛି । ଶ୍ରୀ ଶାହ କହିଥିଲେ ଯେ ସିଆର୍ପିଏଫ୍ କେବଳ ଭାରତରେ ନୁହେଁ, ବରଂ ବିଶ୍ୱର ସର୍ବବୃହତ୍ ପାରାମିଲିଟାରୀ ଫୋର୍ସ ଭାବେ ଗର୍ବିତ । ଅମିତ ଶାହ କହିଥିଲେ ଯେ ସ୍ୱାଧୀନତାର ୭୬ ବର୍ଷର ଇତିହାସରେ ଅନେକ ଥର ସିଆର୍ପିଏଫ୍ ଦେଶର ସମ୍ମାନ ଏବଂ ଗୌରବର ସୁରକ୍ଷା କରିଛି । ସେ କହିଥିଲେ ଯେ ୧୯୫୯ ମସିହା ଅକ୍ଟୋବର ୨୧ ତାରିଖରେ ଲଦାଖର ହଟ୍ ସ୍ପ୍ରିଙ୍ଗ୍ ଠାରେ ଚୀନ୍ ସେନା ସହ ଲଢ଼େଇ କରୁଥିବାବେଳେ ସିଆର୍ପିଏଫ୍ ଯବାନମାନେ ସହିଦ ହୋଇଥିଲେ ଏବଂ ସେଥିପାଇଁ ଦେଶର ସମସ୍ତ ପୁଲିସ ବାହିନୀ ପ୍ରତିବର୍ଷ ଅକ୍ଟୋବର ୨୧ ତାରିଖକୁ ପୁଲିସ ସ୍ମୃତି ଦିବସ ଭାବେ ପାଳନ କରିଥାନ୍ତି । ସେ କହିଥିଲେ ଯେ ୨୦୧୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାରା ଦେଶରେ ସହିଦ ପୋଲିସ କର୍ମଚାରୀ ଏବଂ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ (ସିଏପିଏଫ୍)ଙ୍କ ସ୍ମୃତିରେ ଜାତୀୟ ପୋଲିସ ସ୍ମାରକୀ ନିର୍ମାଣ କରି ହଟ ସ୍ପ୍ରିଙ୍ଗର ଶହୀଦଙ୍କୁ ଗର୍ବର ସହ ଅମର କରିଛନ୍ତି। କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ କହିଥିଲେ ଯେ ୧୯୬୫ ମସିହାରେ କଚ୍ଛର ରଣରେ ଥିବା ସର୍ଦ୍ଦାର ପୋଷ୍ଟରେ ସିଆର୍ପିଏଫ୍ ସୈନିକମାନଙ୍କୁ ମୁତୟନ କରାଯାଇଥିଲା, ଯେଉଁମାନେ ପାକିସ୍ତାନ ସେନାକୁ ଉପଯୁକ୍ତ ଜବାବ ଦେଇଥିଲେ ଏବଂ ସେଥିପାଇଁ ପ୍ରତିବର୍ଷ ଏପ୍ରିଲ ୯ ତାରିଖରେ ସମଗ୍ର ଦେଶ ଶୌର୍ଯ୍ୟ ଦିବସ ପାଳନ କରିଥାଏ । ସେ କହିଥିଲେ ଯେ ୨୦୦୧ରେ ଆମ ଗଣତନ୍ତ୍ରର ପ୍ରତୀକ ସଂସଦ ଭବନ ଉପରେ ଆତଙ୍କବାଦୀମାନେ ଆକ୍ରମଣ କରିଥିଲେ, ଯାହାକୁ ସିଆର୍ପିଏଫ୍ ବିଫଳ କରିଥିଲା । ସେହିଭଳି, ୨୦୦୫ ମସିହାରେ ଶ୍ରୀରାମ ଜନ୍ମଭୂମି ଉପରେ ଆତଙ୍କବାଦୀ ଆକ୍ରମଣ ହୋଇଥିଲା ଏବଂ ସିଆର୍ପିଏଫ୍ ଏହି ଆକ୍ରମଣକୁ ବିଫଳ କରି ମନ୍ଦିରକୁ ସୁରକ୍ଷିତ ରଖିଥିଲା । ଶ୍ରୀ ଶାହ କହିଥିଲେ ଯେ ପଶୁପତିନାଥରୁ ତିରୁପତି ପର୍ଯ୍ୟନ୍ତ ଲାଲ ଆତଙ୍କ ବିସ୍ତାର କରିବାର ସ୍ୱପ୍ନ ଦେଖିଥିବା ନକ୍ସଲମାନେ ଆଜି ୪ଟି ଜିଲ୍ଲାରେ ସୀମିତ ରହିଛନ୍ତି, ଏଥିରେ ସବୁଠାରୁ ବଡ଼ ଯୋଗଦାନ ହେଉଛି ସିଆର୍ପିଏଫ୍ର । ସେ କହିଥିଲେ ଯେ ଦେଶକୁ ନକ୍ସଲବାଦରୁ ମୁକ୍ତ କରିବାରେ ସିଆର୍ପିଏଫ୍ର ସବୁଠାରୁ ବଡ଼ ଭୂମିକା ଏବଂ ଯୋଗଦାନ ରହିବ । ସିଆର୍ପିଏଫ୍ର କୋବ୍ରା ବାଟାଲିଅନ୍ ଆସିବା ଦେଖି ଦୁର୍ଦ୍ଦାନ୍ତ ନକ୍ସଲମାନେ ଭୟରେ କମ୍ପିଥାନ୍ତି । ସେ କହିଥିଲେ ଯେ କୋବ୍ରା ବାଟାଲିଅନର ନେତୃତ୍ୱରେ ଅନ୍ୟ ସିଆର୍ପିଏଫ୍ ଯବାନମାନେ ନକ୍ସଲବାଦର ମୂଳୋତ୍ପାଟନ ଦିଗରେ ବ୍ୟାପକ ଯୋଗଦାନ ଦେଇଛନ୍ତି । ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ମାର୍ଚ୍ଚ ୩୧,୨୦୨୬ ସୁଦ୍ଧା ଦେଶରୁ ନକ୍ସଲବାଦ ସବୁଦିନ ପାଇଁ ସମାପ୍ତ ହୋଇଯିବ ଏବଂ ସିଆର୍ପିଏଫ୍ର ଶକ୍ତି ବଳରେ ଏହି ଲକ୍ଷ୍ୟ ଧାର୍ଯ୍ୟ କରାଯାଇଛି । ଅମିତ ଶାହ କହିଥିଲେ ଯେ ଧାରା ୩୭୦ ଉଚ୍ଛେଦ ହେବା ପରେ କାଶ୍ମୀରରେ ଶାନ୍ତି ବଜାୟ ରଖିବା ହେଉ କିମ୍ବା ପ୍ରତ୍ୟେକ ନିର୍ବାଚନ ଶାନ୍ତିପୂର୍ଣ୍ଣ ଭାବେ କରିବା ହେଉ, ସିଆର୍ପିଏଫ୍ ଯବାନମାନେ ସର୍ବତ୍ର ନିଜ କର୍ତ୍ତବ୍ୟ ନିଷ୍ଠାର ସହ ପାଳନ କରିଛନ୍ତି । ସେ କହିଥିଲେ ଯେ ଧାରା ୩୭୦ ଉଚ୍ଛେଦ ହେବା ପରେ କାଶ୍ମୀରରେ ବିଧାନସଭା ନିର୍ବାଚନ ହୋଇଥିଲା ଏବଂ ସେହି ସମୟରେ ଲୋକଙ୍କ ମନରେ ଅନେକ ପ୍ରକାରର ଆଶଙ୍କା ରହିଥିଲା, କିନ୍ତୁ ଆମର ସିଆର୍ପିଏଫ୍ ଏବଂ ଅନ୍ୟ ସୁରକ୍ଷା ବାହିନୀ ସୁରକ୍ଷା ସୁନିଶ୍ଚିତ କରିଥିଲେ ଏବଂ ଗୋଟିଏ ବି ବୁଥ ଲୁଟ ହେବାର କିମ୍ବା ଗୋଟିଏ ବି ଗୁଳି ଚଳାଇବାର ଖବର ନଥିଲା । ଶ୍ରୀ ଶାହ କହିଥିଲେ ଯେ ଏହା ଏକ ବହୁତ ବଡ଼ ସଫଳତା । ସେ କହିଥିଲେ ଯେ ଗତ ୫ ବର୍ଷ ମଧ୍ୟରେ ସିଆର୍ପିଏଫ୍ ନକ୍ସଲ ପ୍ରଭାବିତ ଅଞ୍ଚଳରେ ୪୦୦ରୁ ଅଧିକ ଫରୱାର୍ଡ ଅପରେଟିଙ୍ଗ୍ ବେସ୍ ପ୍ରତିଷ୍ଠା କରିଛି ଏବଂ ଏହି କାରଣରୁ ୧୦ ବର୍ଷ ମଧ୍ୟରେ ନକ୍ସଲ ହିଂସା ୭୦ ପ୍ରତିଶତରୁ ଅଧିକ ହ୍ରାସ ପାଇଛି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ସିଆର୍ପିଏଫ୍ ଯବାନମାନେ ଶ୍ରୀଲଙ୍କା, ହାଇତି, କୋସୋଭୋ ଏବଂ ଲାଇବେରିଆ ସମେତ ଅନେକ ସ୍ଥାନରେ ମିଳିତ ଜାତିସଂଘର ଶାନ୍ତିରକ୍ଷା ମିଶନ ଅଧୀନରେ ଶାନ୍ତି ପ୍ରତିଷ୍ଠା ପାଇଁ କାର୍ଯ୍ୟ କରିଛନ୍ତି । ସେ କହିଥିଲେ ଯେ ଆଜି ପର୍ଯ୍ୟନ୍ତ ସିଆର୍ପିଏଫ୍ ମୋଟ ୨୭୦୮ଟି ଭିନ୍ନ ଭିନ୍ନ ପଦକ ହାସଲ କରିଛି, ଯାହା ସମସ୍ତ ସିଏପିଏଫ୍ ମଧ୍ୟରେ ସର୍ବାଧିକ । ସେ କହିଥିଲେ ଯେ ଅମରନାଥ ଯାତ୍ରା ହେଉ, ମାତା ବୈଷ୍ଣୋଦେବୀ ଯାତ୍ରା ହେଉ, ରାମଜନ୍ମଭୂମିର ସୁରକ୍ଷା ହେଉ, କୃଷ୍ଣ ଜନ୍ମଭୂମିର ସୁରକ୍ଷା ହେଉ, କିମ୍ବା ମହାକୁମ୍ଭ ଉତ୍ସବ ହେଉ, ସିଆର୍ପିଏଫ୍ ଯବାନମାନେ ସର୍ବତ୍ର ଆଇନ ଶୃଙ୍ଖଳା ବଜାୟ ରଖିବା ପାଇଁ ପୂର୍ଣ୍ଣ ପ୍ରୟାସ କରିଛନ୍ତି । ଅମିତ ଶାହ କହିଥିଲେ ଯେ ସିଆର୍ପିଏଫ୍ ସ୍ୱଚ୍ଛ ଭାରତ, ହର ଘର ତ୍ରିରଙ୍ଗା, ଏକ ଭାରତ ଶ୍ରେଷ୍ଠ ଭାରତ, ସ୍ୱଚ୍ଛତା ହି ସେବା, ଏକ ପେଡ୍ ମା କେ ନାମ ଭଳି ଅନେକ ଅଭିଯାନକୁ ଖୁବ ଭଲ ଭାବେ କାର୍ଯ୍ୟକାରୀ କରିଛି ଏବଂ ଏହା ମଧ୍ୟ ପ୍ରମାଣିତ କରିଛି ଯେ ସିଆର୍ପିଏଫ୍ ଦେଶ ତଥା ସମାଜ ପାଇଁ ସର୍ବଦା ସତର୍କତାର ସହ କାର୍ଯ୍ୟ କରୁଛି । ସେ କହିଥିଲେ ଯେ ଗତ ୫ ବର୍ଷ ମଧ୍ୟରେ ସମସ୍ତ ସିଏପିଏଫ୍. ଦ୍ୱାରା ୫ କୋଟି ଚାରା ରୋପଣ କରିବାର ଲକ୍ଷ୍ୟ ଧାର୍ଯ୍ୟ କରାଯାଇଥିଲା । ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ଏହି ଅଭିଯାନ ଅଧୀନରେ ସେ ନିଜେ ଗୁରୁଗ୍ରାମର ସିଆର୍ପିଏଫ୍ ଗ୍ରୁପ୍ ସେଣ୍ଟରରେ ପ୍ରଥମ ଚାରା ରୋପଣ କରିଥିଲେ, ସିଆର୍ପିଏଫ୍ ନାନ୍ଦେଡ଼ କ୍ୟାମ୍ପସରେ ଏକ କୋଟିତମ ଚାରା ରୋପଣ କରାଯାଇଥିଲା, ଉତ୍ତରପ୍ରଦେଶର ସିଆର୍ପିଏଫ୍ କ୍ୟାମ୍ପରେ ଚାରି କୋଟିତମ ଚାରା ରୋପଣ କରାଯାଇଥିଲା ଏବଂ ଆଜି ୬ କୋଟିରୁ ଅଧିକ ଚାରା ରୋପଣ କରି ସମସ୍ତ ସିଏପିଏଫ୍ ପରିବେଶ ବିଷୟରେ ସଚେତନତା ସୃଷ୍ଟି କରିବା ପାଇଁ କାର୍ଯ୍ୟ କରିଛନ୍ତି । କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ସରକାର ସମସ୍ତ ସିଏପିଏଫ୍ର କଲ୍ୟାଣ ପାଇଁ ଅନେକ ପଦକ୍ଷେପ ନେଇଛନ୍ତି । ସେ କହିଥିଲେ ଯେ ଦେଶର ୭ଟି ଦୁର୍ଗମ ଅଞ୍ଚଳରେ ଏୟାର କୁରିୟର ସେବା ଆରମ୍ଭ କରାଯାଇଥିଲା ଏବଂ ନିକଟରେ ଭାରତ ସରକାର ମଧ୍ୟ ଦରମା ଏବଂ ଭତ୍ତାରେ ନିରନ୍ତର ଉନ୍ନତି ପାଇଁ ଅଷ୍ଟମ ବେତନ ଆୟୋଗ ଘୋଷଣା କରିଛନ୍ତି । ସେ କହିଥିଲେ ଯେ ୪୨ ଲକ୍ଷରୁ ଅଧିକ ଆୟୁଷ୍ମାନ ସିଏପିଏଫ୍ କାର୍ଡ ପ୍ରଦାନ କରାଯାଇଛି, ଯାହା ଅଧୀନରେ ଆଜି ସିଏପିଏଫ୍ କର୍ମୀ ଏବଂ ସେମାନଙ୍କ ପରିବାର ପାଇଁ ହଜାର ହଜାର ଡାକ୍ତରଖାନା ଉପଲବ୍ଧ ରହିଛି । ସେ କହିଥିଲେ ଯେ ଆବାସ ଯୋଜନା ଅଧୀନରେ ସନ୍ତୋଷଜନକ ଗୃହ ଅନୁପାତ ପାଖାପାଖି ୯.୫ ପ୍ରତିଶତ ବୃଦ୍ଧି ପାଇଛି, ସିଏପିଏଫ୍ ଇ-ହାଉସିଂ ୱେବ୍ ପୋର୍ଟାଲର ଶୁଭାରମ୍ଭ କରି ୬.୫ ଲକ୍ଷ ସିଏପିଏଫ୍ କର୍ମଚାରୀଙ୍କୁ ଖାଲି ଘର ଯୋଗାଇ ଦେବା ପାଇଁ ପ୍ରୟାସ କରାଯାଇଛି ଏବଂ ଏକ ଲକ୍ଷରୁ ଅଧିକ ଘର ମଧ୍ୟ ଆବଣ୍ଟନ କରାଯାଇଛି । ସେ କହିଛନ୍ତି ଯେ ବର୍ତ୍ତମାନ ବାହିନୀରେ ମହିଳାମାନଙ୍କୁ ମଧ୍ୟ ନିଯୁକ୍ତି ଦିଆଯାଉଛି ଏବଂ ସେମାନଙ୍କ ପାଇଁ ୧୨୪ଟି ବାରାକ୍ ଅନୁମୋଦିତ ହୋଇଛି, ଯେଉଁଥିରୁ ୧୦୯ଟି ନିର୍ମାଣ କରାଯାଇଛି ଏବଂ ଗୃହ ମନ୍ତ୍ରଣାଳୟ ଆହୁରି ୪୫୦ଟି ବାରାକ୍ ନିର୍ମାଣ କରିବାକୁ ନିଷ୍ପତ୍ତି ନେଇଛି । ଶ୍ରୀ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ଛାତ୍ରବୃତ୍ତି ଯୋଜନା ଅଧୀନରେ ସିଏପିଏଫ୍ ଯବାନଙ୍କ ପିଲାମାନଙ୍କୁ ଶିକ୍ଷା ସୁବିଧା ପ୍ରଦାନ କରାଯାଇଛି, କେନ୍ଦ୍ରୀୟ ଅନୁକମ୍ପା ରାଶିକୁ ବୈଜ୍ଞାନିକ ପଦ୍ଧତିରେ କରାଯାଇଛି, ଭିନ୍ନକ୍ଷମଙ୍କ ଅନୁକମ୍ପା ରାଶିକୁ ୫୦ ପ୍ରତିଶତ ବୃଦ୍ଧି କରାଯାଇଛି ଏବଂ କେନ୍ଦ୍ରୀୟ ପୋଲିସ କଲ୍ୟାଣ ଷ୍ଟୋରଗୁଡ଼ିକୁ ମଧ୍ୟ ୧୧୯ଟି ମାଷ୍ଟର ଷ୍ଟୋର ଏବଂ ୧୭୯୪ଟି ସବ୍-ଷ୍ଟୋର ଜରିଆରେ ଅଧିକ ଲୋକାଭିମୁଖୀ କରାଯାଇଛି ।