ମୁଁ ଏବେ ବି ଅନୁଭବ କରୁଛି ଯେ, ଶିବସେନା ବିଜେପି ସହ ରହି ୨୫ ବର୍ଷ କାଳ ବର୍ବାଦ୍ କରିଛି : ଉଦ୍ଧବ ଠାକରେ
ମୁମ୍ବାଇ : ମହାରାଷ୍ଟ୍ର ମୁଖ୍ୟମନ୍ତ୍ରୀ ତଥା ଶିବସେନା ମୁଖ୍ୟ ଉଦ୍ଧବ ଠାକରେ ରବିବାର ଦିନ ହିନ୍ଦୁତ୍ୱକୁ ରାଜନୈତିକ ସୁବିଧା ଅନୁଯାୟୀ ବ୍ୟବହାର କରୁଥିବା ଅଭିଯୋଗ କରି କହିଛନ୍ତି ଯେ, ତାଙ୍କ ଦଳ ରାଜ୍ୟ ବାହାରେ ବିସ୍ତାର ହେବାକୁ ଚେଷ୍ଟା କରିବ ଏବଂ ଜାତୀୟ ଭୂମିକା ଗ୍ରହଣ କରିବ । ସେ କହିଛନ୍ତି ଯେ, ଭାରତୀୟ ଜନତା ପାର୍ଟି (ବିଜେପି) ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନଡିଏ) ଦୁର୍ବଳ ହୋଇଛି, କାରଣ ଅକାଳୀ ଦଳ ଏବଂ ଶିବସେନା ଭଳି ପୁରୁଣା ସହଯୋଗୀମାନେ ଏଥିରୁ ବାହାରି ଆସିଛନ୍ତି । ପାର୍ଟି ପ୍ରତିଷ୍ଠାତା ତଥା ତାଙ୍କ ପିତା ବାଲ୍ ଠାକରେଙ୍କ ୯୬ତମ ଜନ୍ମ ବାର୍ଷିକୀରେ ଶିବ ସୈନିକମାନଙ୍କୁ ଡିଜିଟାଲ୍ ସମ୍ବୋଧିତ କରି ଉଦ୍ଧବ ଠାକରେ କହିଛନ୍ତି ଯେ, ସତ୍ତା ମାଧ୍ୟମରେ ହିନ୍ଦୁତ୍ୱ ଏଜେଣ୍ଡାକୁ ଆଗେଇ ନେବା ପାଇଁ ଶିବସେନା ବିଜେପି ସହ ହାତ ମିଳାଇଥିଲା । ହିନ୍ଦୁତ୍ୱକୁ ନେଇ କ୍ଷମତା ଚାହୁଁଥିବାରୁ ବିଜେପି ସହ ଶିବସେନା ବାନ୍ଧି ହୋଇ ରହିଥିଲା । କ୍ଷମତା ପାଇଁ ଶିବସେନା ହିନ୍ଦୁତ୍ୱକୁ କେବେବି ବ୍ୟବହାର କରିନଥିଲେ । ସେ କହିଛନ୍ତି, ଶିବସେନା ହିନ୍ଦୁତ୍ୱ ଛାଡି ନାହିିଁ ବରଂ ବିଜେପି ଛାଡିଛି । ମୋର ବିଶ୍ୱାସ ଯେ ବିଜେପିର ସୁବିଧାବାଦୀ ହିନ୍ଦୁତ୍ୱ କେବଳ କ୍ଷମତା ପାଇଁ । ଉଦ୍ଧବ ଠାକରେ କହିଛନ୍ତି ଯେ, ଶିବସେନା ୨୫ ବର୍ଷ ଧରି ବିଜେପି ସହ ମେଣ୍ଟ କରି ମୂଲ୍ୟବାନ ସମୟ ବର୍ବାଦ୍ କରିଛି । ୨୦୧୯ ମହାରାଷ୍ଟ୍ର ନିର୍ବାଚନ ପରେ ଶିବସେନା ବିଜେପି ଠାରୁ ଅଲଗା ହୋଇ ଏନସିପି ଏବଂ କଂଗ୍ରେସ ସହିତ ମିଶି ମହା ବିକାଶ ଆଡ଼କୁ ଅଗ୍ରଗତି କରି ସରକାର ଗଠନ କରିଛି ।