ନୂଆଦିଲ୍ଲୀ, (ପିଆଇବି) : ଆର୍ମି ଏୟାର ଡିଫେନ୍ସ କଲେଜ ଗୋପାଳପୁର ପକ୍ଷରୁ ୨୧ – ୨୨ ମାର୍ଚ୍ଚ ୨୦୨୫ରେ ’ସ୍ଥଳଭିତ୍ତିକ ବାୟୁ ପ୍ରତିରକ୍ଷା ଅସ୍ତ୍ରଶସ୍ତ୍ର ପ୍ରଣାଳୀର ନିୟୋଜନରେ ବୈଷୟିକ ଏବଂ ରଣନୀତିକ ଉନ୍ନତି ଏବଂ ସାମ୍ପ୍ରତିକ ସଂଘର୍ଷରୁ ଶିକ୍ଷା’ ଶୀର୍ଷକ ଦୁଇ ଦିନିଆ ବୈଷୟିକ ଆଲୋଚନା ଚକ୍ର ଅନୁଷ୍ଠିତ ହୋଇଯାଇଛି । ସାମ୍ପ୍ରତିକ ସଂଘର୍ଷରେ ଦେଖାଯାଇଥିବା ବିମାନ, କ୍ଷେପଣାସ୍ତ୍ର ଏବଂ ରାଡାରକୁ ନେଇ ଆକାଶମାର୍ଗରେ ରହିଥିବା ବିପଦ, ମାନବବିହୀନ ଏରିଆଲ ସିଷ୍ଟମର ବିକାଶ ଏବଂ ନିଯୁକ୍ତି ଏବଂ ଅନ୍ୟାନ୍ୟ ବୈଷୟିକ ଜ୍ଞାନକୌଶଳର ଅଗ୍ରଗତି ଉପରେ ଧ୍ୟାନ ଦେବା ପାଇଁ ଏହି ସେମିନାର ଆୟୋଜନ କରାଯାଇଥିଲା । ଦେଶର ଭବିଷ୍ୟତ ପାଇଁ ପ୍ରସ୍ତୁତ ବାୟୁ ପ୍ରତିରକ୍ଷା ଲାଗି ରଣନୈତିକ ଢାଞ୍ଚା ମଧ୍ୟରେ କୌଶଳପୂର୍ଣ୍ଣ ଯୁଦ୍ଧ କ୍ଷେତ୍ରରେ ’ସ୍ଥଳଭିତ୍ତିକ ବାୟୁ ପ୍ରତିରକ୍ଷା ଅସ୍ତ୍ରଶସ୍ତ୍ର ପ୍ରଣାଳୀର ନିୟୋଜନରେ କାର୍ଯ୍ୟକ୍ଷମ ସାଂଗଠନିକ ଏବଂ ପ୍ରକ୍ରିୟାଗତ ପରିବର୍ତ୍ତନ ଆଣିବା ଏହାର ଉଦ୍ଦେଶ୍ୟ ଥିଲା । ‘ଆତ୍ମନିର୍ଭର ଭାରତ’ ଦୃଷ୍ଟିକୋଣ ସହିତ ସମନ୍ୱୟ ରକ୍ଷା କରି ପରବର୍ତ୍ତୀ ପିଢ଼ିର ବାୟୁ ପ୍ରତିରକ୍ଷା ସମାଧାନ ପାଇଁ ଉଦୀୟମାନ ବୈଷୟିକ ଜ୍ଞାନକୌଶଳକୁ ବ୍ୟବହାର କରିବା ନିମନ୍ତେ ଆର୍ମି ଏୟାର ଡିଫେନ୍ସ ପାଇଁ ଏକ ଉପଯୁକ୍ତ ରୋଡମ୍ୟାପ୍ ଏହାର ଉଦ୍ଦିଷ୍ଟ ଫଳାଫଳ ଥିଲା । ନିମ୍ନଲିଖିତ ବିଷୟବସ୍ତୁ ଉପରେ ପ୍ୟାନେଲ ଆଲୋଚନା ସହିତ ତିନୋଟି ଅଧିବେଶନରେ ସେମିନାର ଆୟୋଜନ କରାଯାଇଥିଲା :-
(କ) ଆକାଶମାର୍ଗରେ ଚଳାଚଳ ସମୟରେ ରହିଥିବା ବିପଦର ପରିଦୃଶ୍ୟରେ ସିଦ୍ଧାନ୍ତମୂଳକ ପରିବର୍ତନ ଏବଂ ବାୟୁ ପ୍ରତିରକ୍ଷା ରଣନୀତିର ବିକାଶ
(ଖ) ମୁଣ୍ଡ ଟେକୁଥୁବା ସଂଘର୍ଷ ଗତିଶୀଳତାକୁ ଦୃଷ୍ଟିରେ ରଖି ବାୟୁ ପ୍ରତିରକ୍ଷା ରଣନୀତିର ପୁନଃ ମୂଲ୍ୟାୟନ ।
(ଗ) ଶିକ୍ଷା ଓ ଶିଳ୍ପ ପରିପ୍ରେକ୍ଷୀରେ ଆତ୍ମନିର୍ଭର ଭାରତ
ଏହି କାର୍ଯ୍ୟକ୍ରମରେ ତିନି ସେନାର ବିଶିଷ୍ଟ ବ୍ୟକ୍ତି ବିଶେଷ ଏବଂ ବାୟୁ ପ୍ରତିରକ୍ଷା କ୍ଷେତ୍ରର ବିଶେଷଜ୍ଞ, ପ୍ରତିରକ୍ଷା ବିଶେଷଜ୍ଞ ଏବଂ ନୀତି ପ୍ରସ୍ତୁତି ସହିତ ବାୟୁ ପ୍ରତିରକ୍ଷା ପ୍ରଣାଳୀ ଏବଂ ସମାଧାନର ଗବେଷଣା ଏବଂ ବିକାଶ ସହିତ ଜଡିତ ଅଗ୍ରଣୀ ଶିକ୍ଷାନୁଷ୍ଠାନ ଏବଂ ଶିଳ୍ପ ସହଯୋଗୀମାନଙ୍କୁ ଏକାଠି କରାଯାଇଥିଲା । ମୁଖ୍ୟ ବକ୍ତବ୍ୟରେ ସେନା ମେଡାଲ, ପିଏଚ୍ଡି, ମହାନିର୍ଦ୍ଦେଶକ ତଥା କର୍ଣ୍ଣେଲ କମାଣ୍ଡାଣ୍ଟ ଆର୍ମି ଏୟାର ଡିଫେନ୍ସ ଲେଫ୍ଟନାଣ୍ଟ ଜେନେରାଲ ସୁମେର ଇଭାନ ଡି’କୁନହା ଯୋଗଦେଇ ରାଡାର ଟେକ୍ନୋଲୋଜି, ଇଲେକ୍ଟ୍ରୋନିକ୍ ୱାରଫେୟାର, କାଉଣ୍ଟର ଡ୍ରୋନ୍ ଷ୍ଟ୍ରାଟେଜି ଏବଂ ଇଣ୍ଟିଗ୍ରେଟେଡ୍ ଏୟାର ଡିଫେନ୍ସ ସିଷ୍ଟମରେ ଉନ୍ନତି ଉପରେ ଗୁରୁତ୍ୱାରୋପ କରିଥିଲେ । ବରିଷ୍ଠ ସାମରିକ ଅଧିକାରୀ, ପ୍ରତିରକ୍ଷା ପ୍ରଯୁକ୍ତି ବିଶେଷଜ୍ଞ ଏବଂ ଶିଳ୍ପ ପ୍ରତିନିଧିମାନେ ବାୟୁ ପ୍ରତିରକ୍ଷା ଯୁଦ୍ଧର ଭବିଷ୍ୟତ ଏବଂ ସଶସ୍ତ୍ର ବାହିନୀ ଏବଂ ଘରୋଇ କ୍ଷେତ୍ରର ଉଦ୍ଭାବକଙ୍କ ମଧ୍ୟରେ ସହଯୋଗକୁ ପ୍ରୋତ୍ସାହିତ କରିବା ଉପରେ ବିଭିନ୍ନ ପ୍ୟାନେଲ ଆଲୋଚନା କରିଥିଲେ ।
ଏହି କାର୍ଯ୍ୟକ୍ରମର ଏକ ପ୍ରମୁଖ ଆକର୍ଷଣ ଥିଲା ଅଂଶଗ୍ରହଣକାରୀ ବିକ୍ରେତାମାନଙ୍କ ଦ୍ୱାରା ବିବିଧ ବାୟୁ ପ୍ରତିରକ୍ଷା ସମାଧାନର ପ୍ରଦର୍ଶନ, ମୁଣ୍ଡଟେକୁଥିବା ଆକାଶମାର୍ଗ ବିପଦର ମୁକାବିଲା ପାଇଁ ଚିହ୍ନଟ, ଟ୍ରାକିଂ ଏବଂ ନ୍ୟୁଟ୍ରାଲାଇଜେସନ୍ ଟେକ୍ନୋଲୋଜି ପ୍ରଦର୍ଶନ କରିବା । ଏହି ସେମିନାର ବାୟୁ ପ୍ରତିରକ୍ଷା ବିଶେଷଜ୍ଞ, ପ୍ରତିରକ୍ଷା ବିଶେଷଜ୍ଞ ଏବଂ ପ୍ରତିରକ୍ଷା ପ୍ରଯୁକ୍ତି ବିଦ୍ୟା କ୍ଷେତ୍ରର ଅଂଶୀଦାରମାନଙ୍କ ମଧ୍ୟରେ ଆଲୋଚନା, ସହଯୋଗ ଏବଂ ଜ୍ଞାନ ଆଦାନ ପ୍ରଦାନକୁ ପ୍ରୋତ୍ସାହିତ କରିବା ପାଇଁ ଏକ ମଞ୍ଚ ଭାବରେ କାର୍ଯ୍ୟ କରିଥିଲା । ଯାହା ବାୟୁ ପ୍ରତିରକ୍ଷା ଆଧୁନିକୀକରଣର ବୃଦ୍ଧି ପାଉଥିବା ଗୁରୁତ୍ୱ ଏବଂ ଆତ୍ମନିର୍ଭରତା ଏବଂ ବିକଶିତ ଭାରତ ୨୦୪୭ ପରିସରରେ ଦୃଢ଼ ବାୟୁ ପ୍ରତିରକ୍ଷା କ୍ଷମତା ବିକାଶରେ ମିଳିତ ସାମରିକ-ଶିଳ୍ପ ପ୍ରୟାସର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲା । ଆର୍ମି ଏୟାର ଡିଫେନ୍ସ କଲେଜର କାର୍ଯ୍ୟକାରୀ କମାଣ୍ଡାଣ୍ଟ ମେଜର ଜେନେରାଲ ଆଇଏସ୍ ପଞ୍ଜରଥ, ଏସ୍ଏମ୍, ଭିଏସ୍ଏମ୍ ସମସ୍ତ ଅଂଶଗ୍ରହଣକାରୀଙ୍କୁ ଧନ୍ୟବାଦ ଅର୍ପଣ କରିବା ସହିତ ଏହି ବୈଷୟିକ ଆଲୋଚନା ଚକ୍ର ଶେଷ ହୋଇଥିଲା ।