ସଇଁତଲା, (ଲକ୍ଷ୍ମୀକାନ୍ତ ସାହୁ) : ବଲାଙ୍ଗିର ଜିଲ୍ଲା ସଇଁତଲା ବଡ଼ମାଳ ଗୋଳାବାରୁଦ କାରଖାନାରେ ସର୍ବ ଭାରତୀୟ ହକି ଚାମ୍ପିୟାନ ସିପ୍ ଉଦ୍ଘାଟିତ ହୋଇଯାଇଛି । ବଡ଼ମାଳ ଗୋଳାବାରୁଦ କାରଖାନା ସ୍ପୋର୍ଟ ଷ୍ଟାଡିୟମ ପରିସରରେ ମିୟୁନିସନ ଇଣ୍ଡିଆ ଲିମିଟେଡ଼ ସହାୟତାରେ ଓ ବଡ଼ମାଳ ଆୟୁଧ ନିର୍ମାଣୀ ଆନୁକୂଲ୍ୟରେ ହକି ଚାମ୍ପିୟାନ ସିପ୍ ଉଦ୍ଘାଟନ ହୋଇ ଥିବାବେଳେ ଉକ୍ତ ଚାମ୍ପିୟାନ ସିପ୍କୁ ବଡ଼ମାଳ ଆୟୁଧ ନିର୍ମାଣୀ ମୁଖ୍ୟ ମହାପ୍ରବନ୍ଧକ ପ୍ରଦୀପ କୁମାର ଦାଶ ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ । ଏହି ଉତ୍ସବରେ ଅନ୍ୟତମ ସମ୍ମାନିତ ଅତିଥି ଭାବରେ ବରିଷ୍ଠ ଗୁଣବତ୍ତା ଅଧିକାରୀ କର୍ଣ୍ଣେଲ ଅମିତାହ ରାଠୀ, ମହାପ୍ରବନ୍ଧକ ପିଏଲ୍. ଲିସେକର, ସଇଁତଲା ତହସିଲଦାର ଆଶିଷ ଏକ୍କା, କନସଲଟେଣ୍ଡ ଏଜିଏମ ଓ. ଏସ. ମୁଣ୍ଡେ ଓ କାରଖାନାର ବରିଷ୍ଠ ସୁରକ୍ଷା ଅଧିକାରୀ ଜନ୍ମେଜୟ ମିଶ୍ର ପ୍ରମୁଖ ଯୋଗଦାନ କରି ଉଭୟ ଖେଳାଳିମାନଙ୍କୁ ଉତ୍ସାହିତ କରିଥିଲେ । ଏଥିରେ ତାମିଲନାଡୁ, ମହାରାଷ୍ଟ୍ର, ମଧ୍ୟପ୍ରଦେଶ, ଓଡିଶା, ଜବଦଳପୁରର ୭ ଗୋଟି ଦଳ ଅଂଶ ଗ୍ରହଣ କରି ଥିବାବେଳେ ପ୍ରଥମ ଦିନରେ ମହାରାଷ୍ଟ୍ର (ଚାନ୍ଦା) ଓ ଓଡିଶା (ବଡ଼ମାଳ) ମଧ୍ୟରେ ଖେଳ ଅନୁଷ୍ଠିତ ହୋଇଥିଲା । ପ୍ରଥମ ଥର ପାଇଁ ଏହି ଅଂଚଳରେ ଖେଳ ଅନୁଷ୍ଠିତ ହୋଇ ଥିବାବେଳେ ଖେଳାଳି ମାନଙ୍କ ମଧ୍ୟରେ ଅନେକ ଉତ୍ସାହ ଦେଖିବାକୁ ମିଳିଛି ।