ଲୋଇସିଂହା, (ବିମଳେନ୍ଦୁ ସାହୁ) : ଆଗଲପୁର ବ୍ଲକ ଝରଣୀପାଲି ପଂଚାୟତ ସଭାଗୃହ ଠାରେ ଅଜିମ ପ୍ରେମଜୀ ଫାଉଣ୍ଡେସନ ସହାୟତାରେ ତଥା ପଲ୍ଲୀ ଆଲୋକ ପାଠାଗାର ନଅଗାଁ (ଖ) ଦ୍ୱାରା କିଶୋରୀ ମାନଙ୍କ ସଶକ୍ତି କରଣ ସକାଶେ ସାମଜିକ ପ୍ରଗତି, ନବସୃଜନ ଏବଂ ସ୍ଥିରତା ବିଷୟକୁ ନେଇ ନୂତନ କାର୍ଯ୍ୟକ୍ରମ ଉଦ୍ଘାଟିତ ହୋଇଯାଇଛି । ଏଥିରେ ବଡ଼ଟିକା, ଝରନିପାଲି ଓ ନୁନିଆଁପାଲି ପଂଚାୟତ ଅନ୍ତର୍ଗତ ଗାଁ ଗୁଡ଼ିକର କିଶୋରୀ ମାନଙ୍କ ସାମୁହିକ, ସ୍ୱାସ୍ଥ୍ୟଗତ ତଥା ଶିକ୍ଷାଗତ ଉନ୍ନତି, ବାଲ୍ୟ ବିବାହ ନିରାକରଣ, ଅନ୍ଧବିଶ୍ୱାସ ଓ କୁସଂସ୍କାର ଦୂରୀକରଣ, ଦକ୍ଷତା ବିକାଶ ସମେତ ଜୀବନ ଜୀବିକାର ଉନ୍ନତି ପାଇଁ ପ୍ରୟାସ ଆରମ୍ଭ ହୋଇଯାଇଛି । ଉଦ୍ଘାଟନ ସମାରୋହରେ ମୁଖ୍ୟ ଅତିଥି ଭାବେ ଝରନିପାଲି ସରପଞ୍ଚ ସୁନିତା ସାହୁ ଯୋଗଦେଇ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ । ସମ୍ମାନିତ ଅତିଥି ଭାବେ ପିଏପି ସମ୍ପାଦକ ପ୍ରଶାନ୍ତ ନାୟକ, ଆଗଲପୁର ସିଡିପିଓ ଶୁଭଶ୍ରୀ ମିଶ୍ର, ଆଗଲପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ବିପିଏମ୍ ସନ୍ତୋଷ ଦୋରା, ଆର୍ବିଏସ୍କେ ମେଡିକାଲ ଅଫିସର ରାଜକୁମାର ସାହୁ, ଭ୍ରାମ୍ୟମାଣ ମେଡିକାଲ ଅଫିସର ହିମାଂଶୁ ଶେଖର ମିଶ୍ର, ଆଇସିଡିଏସ୍ ସୁପରଭାଇଜର ପ୍ରଫୁଲ୍ଲ ଦୋରା ପ୍ରମୁଖ ମଞ୍ଚାସୀନ ଥିଲେ । କିଶୋରୀ ମାନଙ୍କ ନିୟମିତ ଲୌହ ବଟିକା ସେବନ, ରକ୍ତ ହୀନତା ଦୂରୀକରଣ, ସରକାରୀ ଯୋଜନା ପ୍ରଣୟନ ଉପରେ ଅବଗତ ଓ ପ୍ରାପ୍ତି ତଥା ନିୟମିତ ସ୍କୁଲରେ ଉପସ୍ଥାନ ଏବଂ ପ୍ରଗତି ଉପରେ ଉପସ୍ଥିତ ଅତିଥିଗଣ ମତବ୍ୟକ୍ତ କରିଥିଲେ । ପ୍ରକଳ୍ପ ସଂଯୋଜକ ଅଭିଜିତ ମିଶ୍ର କାର୍ଯ୍ୟକ୍ରମ ପରିଚାଳନା କରିଥିବା ବେଳେ ପ୍ରହଲ୍ଲାଦ ପଧାନ, ନମିତା ପଧାନ, ସୁଭଦ୍ରା ମହାଲିଙ୍ଗ ପ୍ରମୁଖ ସହଯୋଗ କରିଥିଲେ ।