ରାଉରକେଲା, (ସସ୍ମିତା ପ୍ରଧାନ) : ରାଉରକେଲା ବାସୀଙ୍କ ହିତକୁ ଦୃଷ୍ଟିରେ ରଖି ରାଉରକେଲା ମହାନଗର ନିଗମ ତରଫରୁ ଏକ ଐତିହାସିକ ପଦକ୍ଷେପ ଗ୍ରହଣ କରାଯାଇଛି । ଫଳ ସ୍ଵରୂପ ଦୀର୍ଘ ବର୍ଷ ଧରି ଛେଣ୍ଡ ଠାରେ ଥିବା ଡମ୍ପିଂ ୟାର୍ଡ଼କୁ ଖୁବ୍ ଶୀଘ୍ର ତରକେରା ନିକଟକୁ ସ୍ଥାନାନ୍ତରିତ କରାଯିବ । ଏଥି ନିମନ୍ତେ ଜାଗା ଚିହ୍ନଟ କରାଯାଇଥିବା ବେଳେ ଅନ୍ୟ ସମସ୍ତ ପ୍ରକ୍ରିୟା ଶେଷ କରାଯାଇ ସ୍ଥାନାନ୍ତରଣ ପ୍ରକ୍ରିୟାକୁ ବହୁତ ଶୀଘ୍ର କାର୍ଯ୍ୟକାରୀ କରାଯିବ ବୋଲି ରାଉରକେଲା ମହାନଗର ନିଗମ ଆୟୁକ୍ତ ଆଶୁତୋଷ କୁଲକର୍ଣ୍ଣି ଗୁରୁବାର ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଗତ କିଛି ମାସ ଧରି ଡମ୍ପିଂ ୟାର୍ଡ଼ର ସ୍ଥାନାନ୍ତରଣ ପାଇଁ ମହାନଗର ନିଗମ ତରଫରୁ ଯୋଜନା ଚାଲିଥିଲା । ମହାନଗର ନିଗମ ଅଞ୍ଚଳରେ ସେଭଳି କୌଣସି ସରକାରୀ ଜାଗା ନଥିବାରୁ ଡମ୍ପିଂ ୟାର୍ଡ଼ ପାଇଁ ଏକ ଜାଗା ଯୋଗାଇ ଦେବା ନିମନ୍ତେ ଗତ ଜାନୁୟାରୀ ମାସରେ ରାଉରକେଲା ଇସ୍ପାତ କାରଖାନା ନିକଟକୁ ଚିଠି କରାଯାଇଥିଲା । ଚିଠି ପାଇବା ପରେ ଆରଏସପି ତ୍ଵରିତ ପଦକ୍ଷେପ ନେବା ସ୍ୱରୂପ, ତରକେରା ଠାରେ ଥିବା ୩ ଏକର ସରକାରୀ ଜମିକୁ ଡମ୍ପିଂ ୟାର୍ଡ଼ ନିମନ୍ତେ ବ୍ୟବହାର କରିବାକୁ ଅନୁମତି ଦେବା ସହ ଆରଏମସିକୁ ଗତ ଫେବ୍ରୁଆରୀ ମାସରେ ଏନଓସି ପ୍ରଦାନ କରିଥିଲା ବୋଲି କମିଶନର କହିଥିଲେ । ଏଥିସହ ଡମ୍ପିଂ ୟାର୍ଡ଼ ପାଇଁ ବ୍ୟବହୃତ ହେବାକୁ ଥିବା ନୂତନ ଜମି ସହର ବାହାରେ ଓ ଜନବସତି ଠାରୁ ଦୂରରେ ଥିବାରୁ ଲୋକମାନଙ୍କର କୌଣସି ସମସ୍ୟା ହେବ ନାହିଁ ବୋଲି କହିବା ସହ ଜାଗାଟି ଜାତୀୟ ରାଜପଥ ନିକଟରେ ଉକ୍ତ ସ୍ଥାନ ଥିବାରୁ ପରିବହନରେ ମଧ୍ୟ କୌଣସି ବାଧା ସ୍ରୁଷ୍ଟି ହେବ ନାହିଁ ବୋଲି କମିଶନର ମତ ଦେଇଥିଲେ । ଆସନ୍ତା କିଛି ମାସ ମଧ୍ୟରେ ତରକେରା ନିକଟକୁ ଡମ୍ପିଂ ୟାର୍ଡ଼ ସ୍ଥାନାନ୍ତରିତ କରାଯିବ । ସହର ସ୍ଵଚ୍ଛ ରହୁ ଏବଂ ବର୍ଜ୍ୟବସ୍ତୁ ଗୁଡ଼ିକୁ ପ୍ରକ୍ରିୟାକରଣ କରାଯାଉ ଏହା ଆମ ଲକ୍ଷ୍ୟ ହୋଇଥିବାରୁ ସେଠାରେ ବୃହତ୍ ବର୍ଜ୍ୟବସ୍ତୁ ପରିଚାଳନା କେନ୍ଦ୍ର ମଧ୍ୟ ସ୍ଥାପନ କରାଯିବ । ସେଠାରେ ଅତ୍ୟାଧୁନିକ ମେସିନ୍ ଜରିଆରେ ଅଧିକରୁ ଅଧିକ ବର୍ଜ୍ୟବସ୍ତୁ ପ୍ରକ୍ରିୟାକରଣ କରାଯିବ । ବର୍ତ୍ତମାନ ୨୦-୩୦ ପ୍ରତିଶତ ବର୍ଜ୍ୟବସ୍ତୁକୁ ଡମ୍ପିଂ ୟାର୍ଡ଼ରେ ଫୋପଡ଼ା ଯାଉଥିବା ବେଳେ ନୂତନ ଡମ୍ପିଂଙ୍ଖୟାର୍ଡ଼ରେ ୧୦ ପ୍ରତିଶତରୁ କମ୍ ବର୍ଜ୍ୟବସ୍ତୁ ଫୋପଡ଼ା ଯିବ ବୋଲି କହିବା ସହ ଏହି ପ୍ରକ୍ରିୟାକରଣ କେନ୍ଦ୍ରରେ ସ୍ଥାନୀୟ ସ୍ଵୟଂ ସହାୟକ ଗୋଷ୍ଠୀକୁ ନିଯୁକ୍ତି ଦିଆଯାଇ ସେମାନଙ୍କୁ ସ୍ୱାବଲମ୍ବୀ କରାଯିବ ବୋଲି ସେ ସୂଚନା ଦେଇଥିଲେ । ଏଥି ସହ ସେ କହିଥିଲେ ଯେ, ଦୀର୍ଘ ୪୦ ବର୍ଷରୁ ଅଧିକ ସମୟ ହେବ ରାଉରକେଲା ମହାନଗର ନିଗମ ଅଞ୍ଚଳରୁ ବାହାରୁଥିବା ବର୍ଜ୍ୟବସ୍ତୁ ଗୁଡ଼ିକୁ ଛେଣ୍ଡ ଠାରେ ଗଦା କରାଯାଉଛି । ଏହି ସବୁ ବର୍ଜ୍ୟବସ୍ତୁ ଗୁଡ଼ିକର ପ୍ରକ୍ରିୟାକରଣ ନିମନ୍ତେ ୨୦୨୨ରୁ ବାୟୋ ମାଇନିଂ ଆରମ୍ଭ କରାଯାଇଥିବା ବେଳେ ୨ ଲକ୍ଷ ଟନ୍ ବର୍ଜ୍ୟବସ୍ତୁର ପ୍ରକ୍ରିୟାକରଣ ଶେଷ ହୋଇଛି । ଆଉ ବଳକା ୪୦-୫୦ ହଜାର ଟନ୍ ବର୍ଜ୍ୟବସ୍ତୁର ପ୍ରକ୍ରିୟାକରଣ ଚାଲିଛି , ଯାହା ଖୁବ୍ ଶୀଘ୍ର ଶେଷ ହୋଇଯିବ । ଏଥି ନିମନ୍ତେ ଦୁର୍ଗନ୍ଧ ବାହାରୁ ଥିବାରୁ ଆମେ ରାଉରକେଲାବାସୀଙ୍କ ନିକଟରେ କ୍ଷମା ପ୍ରାର୍ଥନା କରୁଛୁ ବୋଲି ରାଉରକେଲା ମହାନଗର ନିଗମ ଆୟୁକ୍ତ ଆଶୁତୋଷ କୁଲକର୍ଣ୍ଣି କହିବା ସହ ସ୍ଥାନାନ୍ତରଣ ପ୍ରକ୍ରିୟା ସମୟସାପେକ୍ଷ ହୋଇଥିବାରୁ ସମସ୍ତ ନାଗରିକ ଧୈର୍ଯ୍ୟ ରଖି ଆବଶ୍ୟକ ସହଯୋଗ ଯୋଗାଇବା ପାଇଁ ସେ ଅନୁରୋଧ କରିଥିଲେ । ଏତଦ୍ ବ୍ୟତୀତ ଛେଣ୍ଡ ଠାରେ ଥିବା ଡମ୍ପିଂୟାର୍ଡ଼ରୁ ସମସ୍ତ ବର୍ଜ୍ୟବସ୍ତୁ ଗୁଡ଼ିକୁ ବାୟୋ ମାଇନିଂ ମାଧ୍ୟମରେ ପ୍ରକ୍ରିୟାକରଣ କରାଯିବା ପରେ ଉକ୍ତ ସ୍ଥାନଟିର ପୁନଃରୁଦ୍ଧାର କରାଯିବ । ଉକ୍ତ ସ୍ଥାନଟିକୁ ସଫା କରାଯାଇ ସହର ଉନ୍ନୟନ ଯୋଜନା ଅନୁସାରେ ରାସ୍ତା ନିର୍ମାଣ ସହ ଲୋକଙ୍କ ହିତ ସାଧନ ନିମନ୍ତେ ବ୍ୟବହାର କରାଯିବ । ଏଥିସହ ଭବିଷ୍ୟତରେ ଏହି ସ୍ଥାନଟିକୁ ଘରୋଇ ତଥା ବ୍ୟବସାୟୀକ ଉଦ୍ଦେଶ୍ୟରେ ବ୍ୟବହାର କରାଯିବ ।