ଭୁବନେଶ୍ୱର : କୋଶଳୀ ଭାଷାକୁ ରାଜ୍ୟ ଭାଷାର ସ୍ଵୀକୃତି ଦେବାକୁ ଶୂନ୍ୟକାଳରେ ଦାବି ଉଠାଇଲେ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ । ପ୍ରସନ୍ନ ଆଚାର୍ଯ୍ୟ କହିଥିଲେ ସଂକଳ୍ପକୁ ଦିବସରେ ପାଳନ କଲେ ହେବନି । ଓଡ଼ିଶା କହିଲେ ସମଗ୍ର ଅଞ୍ଚଳ । ଭାଷା ଓ ଭୂଷଣକୁ ଛାଡି ଜାତି ବଞ୍ଚି ପାରିବନି । ଓଡ଼ିଶାର ୧୧ ଜିଲ୍ଲାର ଦେଢ଼ କୋଟି ଲୋକ ସମ୍ବଲପୁରୀ, କୋଶଳୀ ଭାଷା, ସମ୍ବଲପୁରୀ କୋଶଳୀ ଭାଷା ବ୍ୟବାହର କରନ୍ତି । ଏହି ଭାଷାକୁ ସରକାରୀ ସ୍ଵୀକୃତି ପାଇଁ ଅନେକ ଦିନ ଧରି ଦାବି ଉଠିଛି । ଏହି ଭାଷାରେ ଅନେକ କ୍ଷୁଦ୍ର ଗଳ୍ପ, କବିତା, ପୁସ୍ତକ ରଚନା ହୋଇଛି । ନିଜସ୍ଵ ଅଭିଧାନ ବି ରହିଛି ଏହି ଭାଷାରେ । ରଙ୍ଗବତୀ ଗୀତ ସମ୍ବଲପୁର, ଓଡ଼ିଶା, ଭାରତ ଅତିକ୍ରମ କରି ସାରିଛି । ଛି.. ଛି.. ରେ.. ନନୀ ଗୀତକୁ ନେଇ ସାରା ଭାରତ ବର୍ଷରେ ଚର୍ଚ୍ଚା । ଅନେକ କୁହନ୍ତି ଏହି ଭାଷାର ଲିପି ନାହିଁ । ଅନେକ ଭାଷାରେ ଲିପି ନାହିଁ କିନ୍ତୁ ସ୍ଵୀକୃତି ମିଳିଛି । ପୂର୍ବରୁ ଅନେକ ଥର ସଂସଦରେ ଉଠିଛି ଏହି ଭାଷାକୁ ଅଷ୍ଟମ ଅନୁଚ୍ଛେଦରେ ସାମିଲ କରିବାକୁ । ରାଜ୍ୟ ସରକାର ଏ ନେଇ କେନ୍ଦ୍ର ସରକାରଙ୍କୁ ପୁନର୍ବାର ପ୍ରସ୍ତାବ ପଠାଇବାକୁ ଦାବି କଲେ ପ୍ରସନ୍ନ । ରାଜ୍ୟ ସରକାର ମଧ୍ୟ ଏହାକୁ ରାଜ୍ୟ ଭାଷା ଭାବେ ସ୍ଵୀକୃତି ଦିଅନ୍ତୁ । ହାଲକା ଭାବେ ନ ନେଇ ଲୋକଙ୍କ ଆତ୍ମାର ଭାଷାକୁ ରାଜ୍ୟର ଦ୍ୱିତୀୟ ରାଜଭାଷା ଭାବେ ମାନ୍ୟତା ଦିଅନ୍ତୁ ବୋଲି ପ୍ରସନ୍ନ କହିଛନ୍ତି ।