ଲୋଇସିଂହା, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ଲୋଇସିଂହା ବ୍ଲକ ସରଗାଡ଼ ପଞ୍ଚାୟତ ଠାକୁରପାଲି ଗାଁରେ ଆଜି ସାନି ମତଦାନ ଅନୁଷ୍ଠିତ ହୋଇଥିବା ଜଣାପଡିଛି । ଗତ ୧୮ ତାରିଖରେ ଏହି ବ୍ଲକରେ ଦ୍ଵିତୀୟ ପର୍ଯ୍ୟାୟ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ମତଦାନ ହୋଇଥିଲା । ଠାକୁରପାଲି ଗାଁରେ ୬ ଜଣ ସରପଞ୍ଚ ପ୍ରାର୍ଥୀ ରହିଥିବା ବେଳେ ପ୍ରିଜାଇଡିଂ ଅଫିସରଙ୍କ ତ୍ରୁଟି ଯୋଗୁଁ ୩ ଜଣ ପ୍ରାର୍ଥୀଙ୍କ ବାଲାଟ ପେପର ଭୁଲ ମୋଡ଼ିଥିବା ଓ ଅନ୍ୟାନ୍ୟ ଅନିୟମିତତା ଅଭିଯୋଗ ହେବାରୁ ସରପଞ୍ଚ ଭୋଟକୁ ସ୍ଥଗିତ ରଖାଯାଇଥିଲା । ଆଜି ଏହି ବୁଥ୍ରେ ପୁନଃ ମତଦାନ ହୋଇଥିଲା । ଏହି ବୁଥରେ ମୋଟ ୩୦୪ ଭୋଟର ଥିବାବେଳେ ଅପରାହ୍ନ ୩ ଟା ପର୍ୟ୍ୟନ୍ତ ୮୦ ରୁ ଅଧିକ ପ୍ରତିଶତ ମତଦାନ ହୋଇ ପ୍ରାୟ ୨୪୮ ଜଣ ଭୋଟର ନିଜ ମତାଧିକାର ସାବ୍ୟସ୍ତ କରିଥିଲେ । ରାଜ୍ୟ ନିର୍ବାଚନ ପର୍ଯ୍ୟବେକ୍ଷକ ମଧୁସୂଦନ ମିଶ୍ର, ଲୋଇସିଂହା ଜିପିଇଓ କିଶୋର ମାନସିଂ ପ୍ରମୁଖ ଘଟଣାସ୍ଥଳରେ ଉପସ୍ଥିତ ରହି ପୁନଃ ମତଦାନ କାର୍ଯ୍ୟକ୍ରମ ତଦାରଖ କରିଥିଲେ ।
