ଖପ୍ରାଖୋଲ, (ଅଶୋକ କୁମାର ବାଗ) : ଓଡିଶା ସରକାରଙ୍କ ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ଏବଂ ବଲାଙ୍ଗିର ସାଂସଦ ସଙ୍ଗୀତା କୁମାରୀ ସିଂହଦେଓ ଆଜି ପାଟଣାଗଡ଼ ନିର୍ବାଚନମଣ୍ଡଳୀ ଗସ୍ତରେ ଆସିଛନ୍ତି । ଉପ ମୁଖ୍ୟମନ୍ତ୍ରୀ ଶ୍ରୀ ସିଂହଦେଓ ଏବଂ ସାଂସଦ ଶ୍ରୀମତୀ ସିଂହଦେଓ ବଲାଙ୍ଗିର ଏବଂ ସୁବର୍ଣ୍ଣପୁର ଜିଲ୍ଲାକୁ ତିନିଦିନିଆ ଗସ୍ତରେ ଆସିଥିବା ବେଳେ ଏହି ପରିପ୍ରେକ୍ଷୀରେ ବିରାଟ ରୋଡ଼ ସୋରେ ତାଙ୍କୁ ପାଟଣାଗଡ଼ରେ ସ୍ଥାନୀୟ ବାସିନ୍ଦା ପାଛୋଟି ଆଣି ଭବ୍ୟ ସ୍ୱାଗତ କରିଥିଲେ । ଏହାପରେ ପାଟଣାଗଡ଼ର ବିଭିନ୍ନ ମନ୍ଦିରକୁ ଯାଇ ଦର୍ଶନ କରି ଆଶୀର୍ବାଦ ନେଇ ଉପ ମୁଖ୍ୟମନ୍ତ୍ରୀ ଶ୍ରୀ ସିଂହଦେଓ ଏବଂ ସାଂସଦ ଶ୍ରୀମତୀ ସିଂହଦେଓ ଖପ୍ରାଖୋଲ ଅଞ୍ଚଳକୁ ଗସ୍ତ କରିଥିଲେ । ଏଠାରେ ରେ ମଧ୍ୟ ତାଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା । ନିର୍ବାଚନ ପରେ ନିଜ ନିର୍ବାଚନ ମଣ୍ଡଳୀକୁ ପ୍ରଥମେ ଆସିଥିବାରୁ ବିଭିନ୍ନ ଅନୁଷ୍ଠାନ ପକ୍ଷରୁ ଭବ୍ୟ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା । ଅଞ୍ଚଳର ବିଭିନ୍ନ ଗ୍ରାମର ଦଳୀୟ କର୍ମୀମାନେ ତାଙ୍କୁ ସ୍ୱାଗତ ଜଣାଇଥିବା ବେଳେ ଓଡିଶାର ବିକାଶ ଦିଗରେ କାମ କରିବାକୁ ପ୍ରତିଶୃତିବଦ୍ଧ ଏବଂ ଅଞ୍ଚଳବାସୀଙ୍କ ପାଇଁ ଉପ ମୁଖ୍ୟମନ୍ତ୍ରୀ ପଦ ପାଇଛି ବୋଲି ଶ୍ରୀ ସିଂହଦେଓ ଅଞ୍ଚଳବାସୀଙ୍କୁ ଧନ୍ୟବାଦ ଅର୍ପଣ କରିଥିଲେ ।