ମହାକୁମ୍ଭ ୨୦୨୫ : ବିଶ୍ୱର ସର୍ବବୃହତ ଆଧ୍ୟାତ୍ମିକ ସମାବେଶ ନେଇ ନୂଆଦିଲ୍ଲୀରେ ବିଦେଶୀ ସାମ୍ୱାଦିକଙ୍କୁ ସୂଚନା ଦେଲେ ବୈଦେଶିକ ବ୍ୟାପାର ମନ୍ତ୍ରଣାଳୟ ଓ ଉତ୍ତରପ୍ରଦେଶ ସରକାର
- ୧.୫ ଲକ୍ଷ ବିଦେଶୀ ପର୍ଯ୍ୟଟକଙ୍କ ସମେତ ୪୫ କୋଟିରୁ ଅଧିକ ଶ୍ରଦ୍ଧାଳୁ ମହାକୁମ୍ଭରେ ଯୋଗ ଦେବାର ସମ୍ଭାବନା
- ୨୦୨୫ ମହାକୁମ୍ଭରେ କିନ୍ନର ଆଖଡ଼ା ସହିତ ୧୩ ଆଖଡ଼ା ଯୋଗ ଦେବେ
- ଏହି ମହାକୁମ୍ଭ ଭାରତୀୟ ଅର୍ଥନୀତିକୁ ଆହୁରି ସମୃଦ୍ଧ କରିବ ଦେଶର ଅର୍ଥନୀତିରେ ଏହାର ଯୋଗଦାନ ପ୍ରାୟ ୨ ଲକ୍ଷ କୋଟି ଟଙ୍କା ହେବ
ଏହା ସହିତ ବିଭିନ୍ନ ଜାତି, ଧର୍ମ ଓ ସାଂସ୍କୃତିକ ବିବିଧତା ମଧ୍ୟରେ ଏକତା ଆଣିବ ଏହି ମହାକୁମ୍ଭ
ନୂଆଦିଲ୍ଲୀ, (ପିଆଇବି) : ମହାକୁମ୍ଭର ଆଧ୍ୟାତ୍ମିକ, ସାଂସ୍କୃତିକ ଓ ଅର୍ଥନୈତିକ ଗୁରୁତ୍ୱ ସଂପର୍କରେ ନୂଆଦିଲ୍ଲୀରେ ବୈଦେଶିକ ବ୍ୟାପାର ମନ୍ତ୍ରଣାଳୟର ଜବାହରଲାଲ ନେହରୁ ଭବନରେ ବିଦେଶୀ ସାମ୍ବାଦିକମାନଙ୍କୁ ଅବଗତ କରାଯାଇଛି । ଏଥିରେ ଯୋଗ ଦେଇଥିଲେ ବୈଦେଶିକ ବ୍ୟାପାର ମନ୍ତ୍ରଣାଳୟ ଓ ଉତ୍ତର ପ୍ରଦେଶ ସରକାରଙ୍କ ବରିଷ୍ଠ ଅଧିକାରୀ । ସାରା ବିଶ୍ୱରୁ ୧୦ଲକ୍ଷରୁ ଅଧିକ ବିଦେଶୀ ଶ୍ରଦ୍ଧାଳୁ ମହାକୁମ୍ଭରେ ଯୋଗ ଦେବାର ଆଶା କରାଯାଉଥିବା ବେଳେ ଏହି ମହାକୁମ୍ଭ ୨୦୨୫ ହେଉଛି ଆତ୍ମ-ଅନ୍ୱେଷଣ, ଧାର୍ମିକ ଓ ସାଂସ୍କୃତିକ ପ୍ରତୀକ । ଉତ୍ତରପ୍ରଦେଶ ସରକାରଙ୍କ ଅଧିକାରୀମାନେ ମହାକୁମ୍ଭ ୨୦୨୫ କେତେ ବଡ଼ ସେ ସଂପର୍କରେ ସମସ୍ତ ସୂଚନା ଦେଇ କହିଥଲେ, ଏହା ହେଉଛି ବିଶ୍ୱର ସବୁଠୁ ବଡ଼ ଧାର୍ମିକ ସମାବେଶ । ବୈଦେଶିକ ମନ୍ତ୍ରଣାଳୟ ଓ ଉତ୍ତର ପ୍ରଦେଶ ସରକାରଙ୍କ ଦ୍ୱାରା ମିଳିତ ଭାବେ ଆୟୋଜିତ ଏହି କାର୍ଯ୍ୟକ୍ରମରେ ମହାକୁମ୍ଭର ଆଧ୍ୟାତ୍ମିକ ଓ ସାଂସ୍କୃତିକ ଗୁରୁତ୍ୱ ସଂପର୍କରେ ଆଲୋକପାତ କରାଯାଇଥଲା । ମହାକୁମ୍ଭ ୨୦୨୫ ଜାନୁଆରି ୧୩ରୁ ଆରମ୍ଭ ହୋଇଥିବା ବେଳେ ଫେବ୍ରୁଆରି ୧୩ ତାରିଖରେ ଶେଷ ହେବ । ପୁରାଣର ସମୁଦ୍ର ମନ୍ଥନ ସହିତ ଏହି ମହାକୁମ୍ଭ ଜଡ଼ିତ । ସମୁଦ୍ର ମନ୍ଥନରୁ ବାହାରିଥିବା ଅମୃତ ପ୍ରୟାଗରାଜ, ହରିଦ୍ୱାର, ଉଜ୍ଜୟିନୀ ଓ ନାସିକ ପଡ଼ିଥିବାର ବିଶ୍ୱାସ କରାଯାଏ । ତେଣୁ ଏହି ୪ଟି ପବିତ୍ର ଧର୍ମପୀଠରେ ମହାକୁମ୍ଭ ଅବସରରେ ପବିତ୍ର ସ୍ନାନ କରିବାର ପରମ୍ପରା ଅଛି । ଏହା ହେଉଛି ଆତ୍ମାର ପବିତ୍ରକରଣ ଓ ନିଜକୁ ନିଜେ ଚିହ୍ନିବାର ପ୍ରତୀକ । ସରକାରଙ୍କ ଆକଳନ ଅନୁସାରେ ୧୫ ଲକ୍ଷ ବିଦେଶୀ ପର୍ଯ୍ୟଟକଙ୍କ ସମେତ ୪୫ କୋଟିରୁ ଅଧିକ ଶ୍ରଦ୍ଧାଳୁଙ୍କ ସମାଗମ ହେବ ମହାକୁମ୍ଭ ୨୦୨୫ରେ । ଏହା ତୁଳନାରେ ୨୦୧୯ କୁମ୍ଭମେଳାରେ ପ୍ରାୟ ୨୫ କୋଟି ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ମହାକୁମ୍ଭକୁ ଏକତା ଓ ସମାନତାର ସଂଗମସ୍ଥଳୀ ଭାବେ ଦେଖା ଯାଉଛି ଯାହାକି ବିଭିନ୍ନ ସଂସ୍କୃତି, ବିଭିନ୍ନ ପରମ୍ପରାର କୋଟି କୋଟି ଲୋକଙ୍କୁ ଗୋଟିଏ ସ୍ଥାନରେ ସମବେତ କରିଛି । ବିଦେଶୀ ସାମ୍ବାଦିକଙ୍କ ସହିତ କଥାବାର୍ତ୍ତା ବେଳେ ଉତ୍ତରପ୍ରଦେଶ ସରକାରଙ୍କ ଅଧିକାରୀ କହିଥିଲେ ଯେ, ମହାକୁମ୍ଭରେ ଯୋଗ ଦେଉଥିବା ଶ୍ରଦ୍ଧାଳୁଙ୍କ ସଂଖ୍ୟାକୁ ଦେଖିଲେ, ଏହା ବିଶ୍ୱର ଅନ୍ୟ ସମସ୍ତ କାର୍ଯ୍ୟକ୍ରମକୁ ଟପିଯିବ । ରିଓ କାର୍ନିଭଲରେ ୭୦ ଲକ୍ଷ ଲୋକ ଯୋଗ ଦେଇଥିବା ବେଳେ ହଜ୍ରେ ଯୋଗ ଦେଇଥିଲେ ୨୫ ଲକ୍ଷ ଶ୍ରଦ୍ଧାଳୁ । ସେହିପରି ଅକ୍ଟୋବର ଫେଷ୍ଟରେ ୭୨ ଲକ୍ଷ ଲୋକ ଯୋଗ ଦେଇଥିଲେ । ମହାକୁମ୍ଭର ଜନସମାଗମକୁ ଦେଖିଲେ, ଏସବୁ କିଛି ନୁହେଁ । କାରଣ ମହାକୁମ୍ଭ ୨୦୨୫ରେ ୪୫ କୋଟିରୁ ବି ଅଧିକ ଶ୍ରଦ୍ଧାଳୁ ଯୋଗ ଦେବାର ଆକଳନ କରାଯାଇଛି । ଏହା ଦର୍ଶାଉଛି ଯେ, ମହାକୁମ୍ଭ ହେଉଛି ଅତୁଳନୀୟ ଓ ବିଶ୍ୱର ସର୍ବବୃହତ ଜନସମାଗମ ସ୍ଥଳୀ ଭାବେ ଏହା ଗୁରୁତ୍ୱ ବହନ କରୁଛି । ମହାକୁମ୍ଭ ୨୦୨୫ ଦେଶର ଅର୍ଥନୀତିକୁ ମଧ୍ୟ ଅନେକାଂଶରେ ସମୃଦ୍ଧ କରିବ । ମହାକୁମ୍ଭ ପାଇଁ ଭାରତର ଅର୍ଥନୀତିରେ ୨ ଲକ୍ଷ କୋଟି ଟଙ୍କାର କାରବାର ହେବ । ଉତ୍ତରପ୍ରଦେଶର ଜିଡିପି ୧ ପ୍ରତିଶତ ବୃଦ୍ଧି ହେବାର ସମ୍ଭାବନା ଅଛି । ୧୭, ୩୧୦ କୋଟି ଟଙ୍କାର ଅତ୍ୟାବଶ୍ୟକ ସାମଗ୍ରୀର ବ୍ୟବସାୟ ହେବ ବୋଲି ଆଶା କରାଯାଉଥିବା ବେଳେ ହୋଟେଲ ଓ ଟ୍ରାଭେଲ କ୍ଷେତ୍ରରେ ୨୮୦୦ କୋଟି ଟଙ୍କାର ବ୍ୟବସାୟ ହେବ । ୨୦୦୦ କୋଟିର ପୂଜା ସାମଗ୍ରୀ ବ୍ୟବସାୟ ଓ ୮୦୦ କୋଟି ଟଙ୍କାର ଫୁଲ ବ୍ୟବସାୟ ହେବ ବୋଲି ଆକଳନ କରାଯାଇଛି । ସୁରକ୍ଷିତ ଭାବେ ଓ ସୁରୁଖୁରୁରେ ମହାକୁମ୍ଭ ସଂପନ୍ନ କରିବା ପାଇଁ ପ୍ରୟାଗରାଜରେ ବ୍ୟାପକ ଭିତ୍ତିଭୂମି ପ୍ରସ୍ତୁତ କରାଯାଇଛି । ପ୍ରମୁଖ ନିର୍ମାଣ ମଧ୍ୟରେ ରହିଛି ୧୪ଟି ନୂଆ ଫ୍ଲାଏଓଭର, ୯ଟି ସ୍ଥାୟୀ ଘାଟ, ୭ଟି ନୂଆ ବସଷ୍ଟାଣ୍ଡ ଓ ୧୨ କିଲୋମିଟରର ଅସ୍ଥାୟୀ ଘାଟ । ସୁରକ୍ଷା ପାଇଁ ୩୭, ୦୦୦ ପୋଲିସ କର୍ମଚାରୀ, ୧୪,୦୦୦ ହୋମଗାର୍ଡ ମୁତୟନ ହେବା ସହିତ ୨,୭୫୦ ଆର୍ଟିଫିସିଆଲ୍ ଇଣ୍ଚିଲିଜେନସ ସିସିଟିଭି କ୍ୟାମେରା ଲଗାଯାଇଛି । ସ୍ୱାସ୍ଥ୍ୟସେବାକୁ ଦେଖିଲେ ୬,୦୦୦ ଶଯ୍ୟା, ୪୩ଟି ହସପିଟାଲ ଓ ଏୟାର ଆମ୍ୱୁଲାନସର ବ୍ୟବସ୍ଥା କରାଯାଇଛି । ଏହା ସହିତ ମହାକୁମ୍ଭ ସମୟରେ ପରିଷ୍କାର ପରିଚ୍ଛନ୍ନତା ବଜାୟ ରଖିବା ପାଇଁ ୧୦,୨୦୦ ସଫେଇ କର୍ମଚାରୀ ଓ ୧୮୦୦ ଗଙ୍ଗା ସେବା ଦୂତ ନିୟୋଜିତ ହୋଇଛନ୍ତି । କିନ୍ନର ଆଖଡ଼ା ଦଶନମ୍ ସନ୍ୟାସିନୀ ଆଖଡ଼ା ଓ ମହିଳା ଆଖଡ଼ା ସମେତ ୧୩ଟି ଆଖଡ଼ା ମହାକୁମ୍ଭ ୨୦୨୫ରେ ଯୋଗ ଦେଉଛନ୍ତି । ଲିଙ୍ଗଗତ ସମାନତା ଓ ପ୍ରଗତିଶୀଳ ଆଭିମୁଖ୍ୟକୁ ଦର୍ଶାଉଛନ୍ତି ଏହି ସବୁ ଆଖଡ଼ା । ବିଭିନ୍ନ ଜାତି, ଧର୍ମ ଓ ସାଂସ୍କୃତିକ ବିବିଧତା ମଧ୍ୟରେ ଏକତାର ମନୋଭାବ ସୃଷ୍ଟି କରିବ ଏହି ମହାକୁମ୍ଭ । ଆଧ୍ୟାତ୍ମିକ ମହତ୍ୱ ସହିତ ଦେଶର ସମୃଦ୍ଧ ସାଂସ୍କୃତିକ ଐତିହ୍ୟ ଓ ଅର୍ଥନୈତିକ ବୈଭବକୁ ବିଶ୍ୱ ଦରବାରରେ ପ୍ରଦର୍ଶନ କରିବାକୁ ଏକ ମଞ୍ଚ ପ୍ରଦାନ କରୁଛି ଏହି ମହାକୁମ୍ଭ । ପ୍ରୟାଗରାଜ ସଂଗମରେ ମହାକୁମ୍ଭ ସଂପର୍କରେ ଖବର ସଂଗ୍ରହ କରିବା ବେଳେ ବିଦେଶୀ ସାମ୍ୱାଦିକମାନେ ସମ୍ମୁଖୀନ ହେଉଥିବା ସମସ୍ୟାର ସମାଧାନ କରିବାକୁ, ବିଦେଶୀ ସାମ୍ୱାଦିକମାନେ ଯେମିତି ସୁରୁଖୁରୁରେ ସବୁ ସ୍ଥାନକୁ ଯାଇ ଖବର ସଂଗ୍ରହ କରିପାରିବେ, ସେଥିପାଇଁ ସବୁ ପ୍ରକାର ସହାୟତା ପ୍ରଦାନ କରାଯିବ ବୋଲି ସେମାନଙ୍କୁ ଆଶ୍ୱାସନା ଦିଆଯାଇଛି ।