ସଇଁତଲା, (କେପିଏନ୍ଏସ୍) : ସଇଁତଲା ବନ ବିଭାଗ ପକ୍ଷରୁ ଚଢ଼ାଉ କରାଯାଇ ୪ ସାଗୁଆନ ଗଣ୍ଡି ସହ ଅର୍ଦ୍ଧ ନିର୍ମିତ କାଠ ସାମଗ୍ରୀ ଜବତ କରାଯାଇଥିବା ସୂଚନା ମିଳିଛି । ଗତକାଲି ପୂର୍ବାହ୍ନରେ ସଇଁତଲା ରେଞ୍ଜର କର୍ମଚାରୀମାନେ ୪ ଟି ଶାଗୁଆନ ଗଣ୍ଡି ସହିତ ଅଧା ତିଆରି ସୋଫା ସେଟ୍, ଅଧା ତିଆରି ପଲଙ୍କ ଏବଂ ଅଧା ତିଆରି ଡାଇନିଂ ସେଟ୍ ଜବତ କରିଥିଲେ । କନ୍ଧକେଲଗାଁ ବିଭାଗର ବାହାଲି ଗ୍ରାମ ନିବାସୀ ଅରୁଣ ସାହୁଙ୍କ ଘର ପରିସରରୁ ଏହିସବୁ ସାମଗ୍ରୀ ଜବତ ହୋଇଛି । ଅଧିକ ଅନୁସନ୍ଧାନ ପାଇଁ ଜବତ ସାମଗ୍ରୀ ରେଞ୍ଜ ଅଫିସ୍ କ୍ୟାମ୍ପସକୁ ଅଣାଯାଇଥିଲା । ରେଞ୍ଜ ଅଫିସର ଶ୍ରୀମତୀ ସଂଘମିତ୍ରା ଭୋଇଙ୍କ ନିର୍ଦ୍ଦେଶନାରେ ଫରେଷ୍ଟର ସୁଶୀଲ ପୁଟା, ଫରେଷ୍ଟ ଗାର୍ଡ ଛନ୍ଦାଚରଣ ଜାନି, ଶ୍ରୀମତୀ ମଧୁସ୍ମିତା ବେହେରା, ଶ୍ରୀମତୀ ପ୍ରଜ୍ଞା ମହାରଣା ତଥା ସଇଁତଲା ରେଞ୍ଜର ପାରା ଷ୍ଟାଫ୍ ଏହି ଚଢ଼ାଉରେ ସାମିଲ୍ ଥିଲେ ।