ଆଠଗଡ଼ : ଆଠଗଡ଼ ପୋଲିସକୁ ମିଳିଛି ବଡ଼ ସଫଳତା । ଆଠଗଡ଼ ଥାନା ଅନ୍ତର୍ଗତ ଦୋରଡ଼ ଗାଁ ମୁଣ୍ଡରେ ଲୁଟେରାମାନେ ଗ୍ରାହକ ଅପେକ୍ଷାରେ ଥିବା ବେଳେ ଚଢାଉ କଲା ପୋଲିସ । ଚଢାଉ ବେଳେ ୪ ନାବାଳକ ଗିରଫ ହୋଇଛନ୍ତି । ସେମାନଙ୍କ ନିକଟରୁ ଚୋରା ଗାଡି ଜବତ ହୋଇଛି । ସୂଚନାନୁଯାୟୀ, ଗତ କିଛି ଦିନ ଧରି ଆଠଗଡ଼ରେ ଗାଡି ଚୋର ଗ୍ୟାଙ୍ଗ ସକ୍ରିୟ ରହି ପୋଲିସର ନିଦ ହଜାଇ ଦେଇଥିଲେ । ଲଗାତର ଭାବରେ ଆଠଗଡ଼ର ଅଶୋକ ନଗର, ବାଣିକଣ୍ଠ ନଗର, ମୈତ୍ରୀ ନଗର ଅଞ୍ଚଳରୁ ବାଇକ ସବୁ ଚୋରି କରୁଥିଲେ । ଏହି ଲୁଟେରା ଗ୍ୟାଙ୍ଗଙ୍କୁ ଧରିବା ପାଇଁ ଆଠଗଡ଼ ପୋଲିସ ଜାଲ ବିଛାଇଥିଲା । ଆଠଗଡ଼ ଥାନା ଅନ୍ତର୍ଗତ ଦୋରଡ଼ ଗାଁ ମୁଣ୍ଡରେ ଲୁଟେରାମାନେ ଗରାଖ ଅପେକ୍ଷାରେ ଥିବା ବିଶ୍ଵସ୍ତ ସୂତ୍ରରୁ ଖବର ପାଇ ଆଠଗଡ଼ ପୋଲିସ ଚଢ଼ାଉ କରି ଚାରି ନାବାଳକଙ୍କୁ ଅଟକ ରଖି ପଚରାଉଚରା କରିଥିଲା । ସେମାନଙ୍କ ସୂଚନାକୁ ଆଧାର କରି ଢେଙ୍କାନାଳ ଜିଲ୍ଲାର ତରଭା ଫାଣ୍ଡି ଅଞ୍ଚଳରୁ ଚାରୋଟି, ଆଠଗଡ଼ ଥାନା ଅନ୍ତର୍ଗତ ବାଇଧିରି ପାଟଣାରୁ ଗୋଟିଏ, ଭୋଗରାରୁ ଗୋଟିଏ ଏବଂ ଲୁଟେରାମାନେ ବ୍ୟବହାର କରୁଥିବା ଏକ ସ୍କୁଟି ଜବତ କରିଛି ପୋଲିସ । ଲୁଟ୍ ହୋଇଥିବା ଗାଡି ଭିତରେ ଦୁଇଟି ପଲସର, ଗୋଟିଏ ୟୁନିକର୍ଣ୍ଣ, ଗୋଟିଏ ସିଡି ଡିଲକ୍ସ, ଗୋଟିଏ ଆପାଚି ଏବଂ ଗୋଟିଏ ହୋଣ୍ଡା ଆକ୍ଟିଭା ରହିଛି । ଚାରି ନାବାଳକଙ୍କୁ ଗିରଫ କରି ପୋଲିସ ବାଳ ଅପରାଧି ଅଦାଲତକୁ ପଠାଇ ଦେଇଛି । ଏ ବାବଦରେ ଆଠଗଡ଼ ଥାନାରେ ପୂର୍ବରୁ ତିନୋଟି ମାମଲା ରୁଜୁ କରି ତଦନ୍ତ ଚଳାଇଥିଲା ।