ବଲାଙ୍ଗିର, (କେପିଏନ୍ଏସ୍) : ନିରୀହ ପଶୁପକ୍ଷୀଙ୍କ ବନ୍ଧୁ ସାଜିଛନ୍ତି କାହ୍ନା । ଆଜିର ଯାନ୍ତ୍ରିକ ସମୟରେ ମଣିଷ ପାଇଁ ମଣିଷ ଭିତରେ ଦରଜ ରହୁନଥିବା ବେଳେ ବିପଦରେ ପଡ଼ିଥିବା ପଶୁପକ୍ଷୀଙ୍କ ପାଇଁ କର୍ତ୍ତବ୍ୟ ଫାଉଣ୍ଡେସନ୍ର ପ୍ରତିଷ୍ଠାତା କାହ୍ନା ଶତପଥୀ ଦେବଦୂତ ସାଜିଛନ୍ତି । ତାଳୁଫଟା ଖରାରେ ହେଉ କି ହାଡ଼ଭଂଗା ଶୀତରେ ହେଉ, ବେଳ ଅବେଳରେ ରାତି ଅଧରେ ବି କୌଣସି ପଶୁପକ୍ଷୀ ବଲାଙ୍ଗିର ସହର ମଧ୍ୟରେ ଦୁର୍ଘଟଣାଗ୍ରସ୍ତ ହୋଇ ପଡ଼ି ରହିଥିଲେ ଖବର ପାଉ ପାଉ ପହଂଚି ଆସନ୍ତି କାହ୍ନା ନିଜ ଟିମ୍ ସହ । ଆବଶ୍ୟକ ଅନୁସାରେ ଯଥୋଚିତ ଚିକିତ୍ସା ପ୍ରଦାନ କରନ୍ତି ନିରୀହ ପଶୁପକ୍ଷୀଙ୍କୁ । ଯଦି ଅଧିକ ଚିକିତ୍ସା ଦରକାର ପଡେ଼, ତେବେ ‘ଏନିମଲ୍ ରେସ୍କ୍ୟୁ ଭ୍ୟାନ୍’ ତୁରନ୍ତ ପହଂଚିଯାଏ । ଆହତ ପଶୁଙ୍କୁ ନିଜ ପାଖରେ ରଖି ସୁସ୍ଥ ହେବା ପର୍ୟ୍ୟନ୍ତ ଚିକିତ୍ସା କରିବା ପରେ ପୁଣି ତାକୁ ଛାଡ଼ି ଦିଅନ୍ତି କାହ୍ନା ।
ସୂଚନାଯୋଗ୍ୟ ଯେ, ବଲାଙ୍ଗିର ସହରରେ ମୁଖ୍ୟରାସ୍ତାଗୁଡ଼ିକରେ ଗାଈଗୋରୁ ମାଳ ମାଳ ବୁଲୁଥିବା ବେଳେ ଏମାନେ ଅଧିକ ପରିମାଣରେ ଦୁର୍ଘଟଣାର ଶିକାର ହୁଅନ୍ତି । ଏତିକି ବେଳେ ଗାଈଗୋରୁଙ୍କ ମାଲିକମାନେ ବି ପାଖ ମାଡ଼ନ୍ତିନାହିଁ । କିନ୍ତୁ ଖବର ପାଉ ପାଉ ପହଂଚି ଆସନ୍ତି କାହ୍ନା ତାଙ୍କ ଟିମ୍ ସହ ଓ ଆରମ୍ଭ କରି ଦିଅନ୍ତି ତୁରନ୍ତ ଚିକିତ୍ସା ।
ତେବେ କାହ୍ନା ତାଙ୍କର ଏଭଳି ହୃଦୟବାନ୍ କାମ ପାଇଁ ଅନେକ ସମ୍ମାନ, ସମ୍ବର୍ଦ୍ଧନାର ଅଧିକାରୀ ହୋଇପାରିଛନ୍ତି । ସମସ୍ତଙ୍କ ମୁହଁରେ ଫୁଟି ଉଠେ, ‘ସାବାସ୍ କାହ୍ନା’ ।
