ଖପ୍ରାଖୋଲ, (ଅଶୋକ କୁମାର ବାଗ) : ବଲାଙ୍ଗିର ଜିଲ୍ଲା ପାଟଣାଗଡ଼ ଥାନା ବଥର୍ଲା ପାଣିଟାଙ୍କି ନିକଟରେ ଗତକାଲି ସନ୍ଧ୍ୟା ସମୟରେ ବାଇକ ଧକ୍କାରେ ଜଣଙ୍କ ମୃତ୍ୟୁ ଘଟିଛି । ମୃତକ ଜଣକ ବଥର୍ଲା ଗ୍ରାମର ଗଙ୍ଗା ବଛା ବୋଲି ଜଣାପଡ଼ିଛି । ଗଙ୍ଗା ପାଟଣାଗଡ଼ରୁ ନିଜ ଘରକୁ ଯାଉଥିବା ବେଳେ ଯୋଗିମୁଣ୍ଡା ଗାଁର ଡୋଲାମଣି ପୁଟେଲ ଓ ବିଜୁ ପୁଟେଲ ପାଟଣାଗଡ଼ରୁ ବାଇକରେ ଫେରୁଥିବା ସମୟରେ ବଥର୍ଲା ପାଣିଟାଙ୍କି ନିକଟରେ ପଛପଟୁ ଧକ୍କା ଦେବା ଦ୍ୱାରା ଗଙ୍ଗା ବଛାଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଡୋଲାମଣି ଓ ବିଜୁ ଗୁରୁତର ହୋଇଥିଲେ । ଘଟଣାସ୍ଥଳରେ ପାଟଣାଗଡ଼ ପୋଲିସ ପହଞ୍ଚି ଗୁରୁତର ମାନଙ୍କୁ ଉଦ୍ଧାର କରି ପାଟଣାଗଡ଼ ଡାକ୍ତରଖାନାକୁ ପଠାଇ ଦେଇଥିଲେ । ଗ୍ରାମବାସୀ କ୍ଷତିପୂରଣ ଦାବିରେ ପାଟଣାଗଡ଼ ଖପ୍ରାଖୋଲ ମୁଖ୍ୟରାସ୍ତା ଅବରୋଧ କରିଥିଲେ । ପାଟଣାଗଡ଼ ପୋଲିସ ଓ ତହସିଲଦାର ଘଟଣାସ୍ଥଳରେ ପହଞ୍ଚି ସମସ୍ତଙ୍କୁ ବୁଝାସୁଝା କରିଥିବା ବେଳେ ଗ୍ରାମବାସୀ ରାସ୍ତା ଅବରୋଧରୁ ହଟିଥିଲେ ।