ରାଉରକେଲା, (ସସ୍ମିତା ପ୍ରଧାନ) : ରକ୍ଷାବନ୍ଧନ ଆମ ଦେଶ ଓ ଜାତିର ଏକ ପବିତ୍ର ପର୍ବ । ଭାଇ ହାତରେ ରାକ୍ଷୀ ବାନ୍ଧି ଭଉଣୀ ରକ୍ଷାକବଚର ପ୍ରତିଶ୍ରୁତି ପାଇଥାଏ । ଓଏସଏପି – ଓଡ଼ିଶାର ସ୍ଵତନ୍ତ୍ର ସଶସ୍ତ୍ର ଆରକ୍ଷୀ ବାହିନୀର ଅଧିକାରୀ ଓ ଜବାନ ଭାଇମାନେ ଦେଶର ଆଭ୍ୟନ୍ତରୀଣ ସୁରକ୍ଷାର ଦାୟିତ୍ୱ ବହନ କରିଛନ୍ତି । ଆମମାନଙ୍କ ପାଇଁ ସେମାନଙ୍କ ନିଃସ୍ବାର୍ଥପର ସେବା ଓ ସର୍ବୋଚ୍ଚ ବଳିଦାନ ଅବିସ୍ମରଣୀୟ । ସେମାନଙ୍କର ଏହି ଅବଦାନ ପ୍ରତି ଶ୍ରଦ୍ଧା ଓ ସମ୍ମାନ ଜଣାଇ ଇନର ହୁଇଲ କ୍ଲବ ରାଉରକେଲା ରିଭରସାଇଡର ସଦସ୍ୟାମାନେ ଓଏସ୍ଏପି, ଚତୁର୍ଥ ବାଟାଲିୟନ, ରାଉରକେଲା ଭବନରେ ଜବାନମାନଙ୍କ ହାତରେ ରାକ୍ଷୀ ବାନ୍ଧି ଏହି ଉତ୍ସବ ପାଳନ କରିଥିଲେ । ଏହି ଉପଲକ୍ଷେ ଆୟୋଜିତ ସଭାରେ ଡେପୁଟୀ କମାଣ୍ଡାଣ୍ଟ ସଂଜୀବ ଲାକ୍ରା ସଭାପତିତ୍ୱ କରି ସ୍ଵାଗତ ଅଭିଭାଷଣ ପ୍ରଦାନ କରିବା ସହ ପୁଷ୍ପଗୁଚ୍ଛ ଦେଇ ସମସ୍ତ ଇନର ହୁଇଲ ସଦସ୍ୟାଙ୍କୁ ସ୍ଵାଗତ ଜଣାଇଥିଲେ । ଇନର ହୁଇଲ କ୍ଲବର ସଭାପତି ପ୍ରମିଳା ମିଶ୍ର, ସଚିବ ମହିମା ମହାପାତ୍ର ଓ ସମସ୍ତ ସଦସ୍ୟାମାନେ ଜବାନ ଭାଇମାନଙ୍କ ହାତରେ ରାକ୍ଷୀ ବାନ୍ଧି ବନ୍ଦାପନା କରିବା ସହ ମିଷ୍ଟାନ୍ନ ବିତରଣ କରିଥିଲେ । ଆସିଷ୍ଟାଣ୍ଟ କମାଣ୍ଡାଣ୍ଟ ଶରତ ଜାନୀ କାର୍ଯ୍ୟକ୍ରମ ପରିଚାଳନା ଓ ଆସିଷ୍ଟାଣ୍ଟ କମାଣ୍ଡାଣ୍ଟ ମାନଭଞ୍ଜନ ଛୁରା ରକ୍ଷାବନ୍ଧନ ସଂଗୀତ ପରିବେଷଣ କରିଥିଲେ ।