ଦେଓଗାଁ, (ମନୀଷ କୁମାର ସାହୁ) : ସରକାରଙ୍କ ନିର୍ଦ୍ଦେଶ ମୁତାବତ ଭୋଟ ଦାନ କେନ୍ଦ୍ରରେ ନିଯୁକ୍ତି ହୋଇଥିଲେ ଜଣେ ପ୍ରିଜାଇଡିଂ ଅଫିସର । ସେ ନିର୍ଦ୍ଦେଶ ଅନୁସାରେ ବ୍ଲକରେ ଯୋଗଦେଇ ଭୋଟଦାନ କେନ୍ଦ୍ରରେ ମଧ୍ୟ ପହଞ୍ଚିଥିଲେ । ହେଲେ ରାତିରେ ଅସୁସ୍ଥ ହେବାରୁ ତାଙ୍କୁ ଡ଼ାକ୍ତରଖାନାକୁ ନିଆଯାଇଥିଲା । ଖାଲି ହୋଇଥିବା ଏହି ପ୍ରିଜାଇଡ଼ିଂ ଅଫିସରଙ୍କ ସ୍ଥାନରେ ଯୁଦ୍ଧକାଳୀନ ଭିତ୍ତିରେ ରିଜର୍ଭରେ ଥିବା ଜଣେ ପ୍ରିଜାଇଡ଼ିଂ ଅଫିସରଙ୍କୁ ନିଯୁକ୍ତି ଦେଇଥିବା ଜଣାପଡ଼ିଥିଲା ।
ଦେଓଗାଁ ବ୍ଲକ ଉପରଝର ପଞ୍ଚାୟତ ରେଙ୍ଗାଳୀ ବୁଥ ନଂ. ୫ରେ ପ୍ରିଜାଇଡ଼ିଂ ଅଫିସର ଭାବେ ନିଯୁକ୍ତି ହୋଇଥିଲେ ନନ୍ଦିକିଶୋର ମାଝୀ । ସୋମବାର ରାତିରେ ଅସୁସ୍ଥତା ଅନୁଭବ କରିବାରୁ ତାଙ୍କ ସ୍ଥାନରେ ରିଜର୍ଭରେ ଥିବା ପାଟଣାଗଡ଼ କେନ୍ଦୁମୁଣ୍ଡିର ରାଧାକାନ୍ତ ମେହେରଙ୍କୁ ପ୍ରିଜାଇଡ଼ିଂ ଅଫିସରଙ୍କ ଦାୟିତ୍ୱ ଦେଇଥିଲେ ତହସିଲଦାର ଯୁଗଳ କିଶୋର ବିଶ୍ୱାଲ । ନିର୍ବାଚନକୁ ମାତ୍ର ୧୦ଘଣ୍ଟା ଥିବା ବେଳେ ନୂତନ ପ୍ରିଜାଇଡ଼ିଂ ଅଫିସର୍ ନିଯୁକ୍ତି ହୋଇ ଠିକଭାବେ ନିର୍ବାଚନ ପରିଚାଳନା କରିଥିବାରୁ ମଙ୍ଗଲବାର ଦିନ ବ୍ଲକ କାର୍ଯ୍ୟାଳୟରେ ଉକ୍ତ ଅଫିସରଙ୍କୁ ସମ୍ମାନିତ କରିଛି ବ୍ଲକ ପ୍ରଶାସନ । ଏହି ଉତ୍ସବରେ ବଲାଙ୍ଗିର ଉପଜିଲ୍ଲାପାଳ ଲମ୍ବୋଦର ଧରୁଆ, ବିଡ଼ିଓ ମୂରଳୀଧର ନାୟକ, ତହସିଲଦାର ଯୁଗଳକିଶୋର ବିଶ୍ୱାଳ ସହ କର୍ମଚାରୀମାନେ ଉପସ୍ଥିତ ରହି ଶ୍ରୀ ମେହେରଙ୍କୁ ଉପଢ଼ୌକନ ଦେଇ ସମ୍ମାନିତ କରିଥିଲେ ।