ଜୟପାଟଣା, (ଶେଷଦେବ ବେହେରା) : ମୋବାଇଲ୍ ଚୋରକୁ ଧରିବାରେ ସଫଳ ହୋଇଛି ଜୟପାଟଣା ପୋଲିସ । ବିଗତ ଦିନରେ ଜୟପାଟଣା ସହରରେ ମୋବାଇଲ ଚୋରି ଘଟଣାକୁ ଗୁରୁତ୍ୱର ସହ ନେଇ ତଦନ୍ତ ଜାରି ରଖିଥିଲା ପୋଲିସ । ଶେଷରେ ଘଟଣାର ୪ ଦିନ ପରେ ପୋଲିସ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି । ଗତ ୩୧ ଡିସେମ୍ବର ମଙ୍ଗଳବାର ବିଳମ୍ବିତ ରାତିରେ କଳାହାଣ୍ଡି ଜିଲ୍ଲା ଜୟପାଟଣା ସହରରେ ଥିବା ଜେକେ ମୋବାଇଲ ଷ୍ଟୋରରୁ କାନ୍ଥ ଫାଡ଼ି ଚୋରି ଘଟଣାରେ ଚୋରକୁ ଧରିବାରେ ସଫଳ ହୋଇଛି ପୋଲିସ । ପାଖାପାଖି ୧୮ରୁ ଅଧିକ ଦାମୀ ମୋବାଇଲ ଚୋରି ହୋଇଥିବା ବେଳେ ଏହାର ଆନୁମାନିକ ମୂଲ୍ୟ ୪ ଲକ୍ଷରୁ ଅଧିକ ହେବ ବୋଲି ଜୟପାଟଣା ଥାନାରେ ଅଭିଯୋଗ ହୋଇଥିଲା । ଚୋରି ସମ୍ପର୍କରେ ଜୟପାଟଣା ପୁଲିସରେ ଅଭିଯୋଗ ହେବା ପରେ ପୁଲିସ ସିସିଟିଭି ଫୁଟେଜ ଆଧାରରେ ତତ୍ପରତା ସହ ତଦନ୍ତ ଆରମ୍ଭ କରି ଚୋର ବିଷୟରେ ସନ୍ଧାନ ପାଇବା ସହ ଚୋରକୁ ଗିରଫ କରିଛି । ଚୋର ମୁଖୀଗୁଡା ଗ୍ରାମର ପରମେଶ୍ୱର ବାଗ(୨୨) ହୋଇଥିବା ବେଳେ ଚୋରର ନାମରେ ବିଏନ୍ଏସ୍ ୩୩୧(୪) ଓ ୩୦୫ ଧାରା ଲାଗୁ କରାଯାଇ ଆଜି କୋର୍ଟ ଚାଲାଣ କରାଯାଇଛି । ଏହାସହ ଚୋର ଠାରୁ ୧୫ ଗୋଟି ମୋବାଇଲ ଜବତ କରାଯାଇଛି । ଏନେଇ ପୋଲିସ ପକ୍ଷରୁ ଏକ ସାମ୍ବାଦିକ ସମ୍ମିଳନୀ କରି ସୂଚନା ଦିଆଯାଇଛି ।