ଓଡିଆପାଲି ପୂର୍ବତନ ସରପଞ୍ଚ ଏବଂ ବର୍ତ୍ତମାନର ସରପଞ୍ଚଙ୍କ ସ୍ୱାମୀଙ୍କ ମଧ୍ୟରେ ପିଟାପିଟି : ତିନି ଅଭିଯୁକ୍ତ କୋର୍ଟ ଚାଲାଣ
ଖପ୍ରାଖୋଲ, (ଅଶୋକ କୁମାର ବାଗ) : ଖପ୍ରାଖୋଲ ଥାନା ଓଡ଼ିଆପାଲି ପଞ୍ଚାୟତର ପୂର୍ବତନ ସରପଞ୍ଚ କୁନୁ ବରିହା (୫୮)ଙ୍କୁ ରବିବାର ସନ୍ଧ୍ୟାରେ ସଂଘବଦ୍ଧ ମରଣାନ୍ତକ ଆକ୍ରମଣ ହୋଇଥିବା ନେଇ ଖପ୍ରାଖୋଲ ଥାନାରେ ଅଭିଯୋଗ ହୋଇଛି । ଅଭିଯୋଗ ଅନୁସାରେ ପୂର୍ବତନ ସରପଞ୍ଚ କୁନୁ ବରିହା ରବିବାର ସନ୍ଧ୍ୟା ସମୟରେ ନିଜ ଗାଁ କପସିପାଲି ବସଷ୍ଟାଣ୍ଡ ନିକଟରେ ନିଜ ବାଇକରେ ବସି ଛିଡ଼ା ହୋଇଥିବା ବେଳେ ସେହି ଗ୍ରାମର ସୁବାଷ ଛୁରା ଓ ସହଯୋଗୀ ଅପ୍ରତ୍ୟାଶିତ ଭାବରେ ମରଣାନ୍ତକ ସଂଘବଦ୍ଧ ଆକ୍ରମଣ କରିଥିବା ବେଳେ ଘଟଣା ସ୍ଥଳରେ ପୂର୍ବତନ ସରପଞ୍ଚ ଅଚେତ୍ ହୋଇ ପଡ଼ି ଯାଇଥିଲେ । ସ୍ଥାନୀୟ ଲୋକଙ୍କ ସହ ପରିବାର ଲୋକେ ଉଦ୍ଧାର କରି ପ୍ରଥମେ ଖପ୍ରାଖୋଲ ଡାକ୍ତରଖାନା ଓ ପରେ ପାଟଣାଗଡ଼ ଡାକ୍ତରଖାନାକୁ ନେଇଥିଲେ । ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ବଲାଙ୍ଗିର ଭୀମ ଭୋଇ ମେଡିକାଲ୍ କଲେଜ ଓ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ଜଣାପଡିଛି । ଏନେଇ ପୂର୍ବତନ ସରପଞ୍ଚଙ୍କ ପୁଅ ଶଙ୍କର ବରିହାଙ୍କ ଅଭିଯୋଗକୁ ଭିତ୍ତି କରି ଖପ୍ରାଖୋଲ ଥାନା କେସ୍ ନମ୍ବର ୫/୨୦୨୪ ରେ ଅନୁସୂଚିତ ଜନଜାତି ଓ ଅନୁସୂଚିତ ଜାତି ନିର୍ଯ୍ୟାତନା ନିରୋଧ ଆଇନ ସମେତ ବିଭିନ୍ନ ଦଫାରେ ମାମଲା ରୁଜୁ କରି ସୁବାଷ ଛୁରା(୩୫), ତାଙ୍କ ସହଯୋଗୀ ମଞ୍ଚନ ନିଆଲ (୩୩) ଓ ବୁଲୁ ହଂସ(୨୫)ଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରାଯାଇଥିବା ବେଳେ ପୂର୍ବ ଶତ୍ରୁତାରୁ ଆକ୍ରମଣ ହୋଇଥିବା ଖପ୍ରାଖୋଲ ଥାନା ଅଧିକାରୀ ରମାକାନ୍ତ ସାହୁ ପ୍ରକାଶ କରିଛନ୍ତି ।