ସାମୁଦ୍ରିକ କ୍ଷେତ୍ର, ସେତୁ ଓ ଟନେଲ ଇଞ୍ଜିନିୟରିଂ, ପ୍ରତିରକ୍ଷା ଲଜିଷ୍ଟିକ୍ସ ଏବଂ ବହୁମୁଖୀ ପରିବହନ ଯୋଜନାକୁ ଆଗକୁ ବଢ଼ାଇବ ଜିଏସଭି – ଶ୍ରୀ ଅଶ୍ୱିନୀ ବୈଷ୍ଣବ
- ଗତି ଶକ୍ତି ବିଶ୍ୱବିଦ୍ୟାଳୟର ଦ୍ୱିତୀୟ ବୈଠକ ଅନୁଷ୍ଠିତ
ନୂଆଦିଲ୍ଲୀ, (ପିଆଇବି) : ଗତି ଶକ୍ତି ବିଶ୍ୱବିଦ୍ୟାଳୟ (ଜିଏସଭି)ର ଦ୍ୱିତୀୟ ବୈଠକ ନୂଆଦିଲ୍ଲୀ ରେଳ ଭବନରେ ଅନୁଷ୍ଠିତ ହୋଇଥିଲା । ଏହି ବୈଠକରେ ବିଶ୍ୱବିଦ୍ୟାଳୟର କୁଳପତି ଭାବେ ଅଧ୍ୟକ୍ଷତା କରି କେନ୍ଦ୍ର ରେଳ, ସୂଚନା ଏବଂ ପ୍ରସାରଣ ତଥା ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି “ଜିଏସଭି କାର୍ଯ୍ୟକ୍ଷମ ହେବାର ୩ ବର୍ଷ ମଧ୍ୟରେ ଏହାର ଶିଳ୍ପ ପରିଚାଳିତ ଆଭିମୁଖ୍ୟ ସହିତ ବ୍ୟାପକ ଅଗ୍ରଗତି କରିଛି, ଯାହା ଦେଶ ପାଇଁ ଏକ ଆଦର୍ଶ ହୋଇପାରିଛି । ରେଳବାଇ ଓ ବିମାନ ଚଳାଚଳ କ୍ଷେତ୍ର ଉପରେ ଏହାର ଦୃଢ଼ ଧ୍ୟାନ ଜାରି ରଖିବା ସହିତ, ଜିଏସଭି ଜାହାଜ ନିର୍ମାଣ ଉପରେ ଗୁରୁତ୍ୱ ଦେଇ ସେତୁ ଏବଂ ଟନେଲ ଇଞ୍ଜିନିୟରିଂ, ସାମୁଦ୍ରିକ କ୍ଷେତ୍ରରେ ପାଠ୍ୟକ୍ରମକୁ ଗଭୀର କରିବ, ପ୍ରତିରକ୍ଷା ବାହିନୀ ଏବଂ ରେଳବାଇର ଦକ୍ଷତା ବୃଦ୍ଧି ପାଇଁ ଅଧିକ ଯୋଗଦାନ କରିବ; ଏବଂ ସମନ୍ୱିତ ପରିବହନ ଯୋଜନା ପାଇଁ ପ୍ରୟୋଗାତ୍ମକ ଗବେଷଣା କରିବ ।
ଏହି ବୈଠକରେ ବରୋଦାର ମହାମାନ୍ୟ ରାଜମାତା ଶୁଭାଙ୍ଗିନୀ ରାଜେ ଗାଏକ୍ୱାଡ, ରେଳବାଇ ବୋର୍ଡର ଅଧ୍ୟକ୍ଷ ଏବଂ ସିଇଓ ଶ୍ରୀ ସତୀଶ କୁମାର, ସେନା ଉପମୁଖ୍ୟ ଲେଫ୍ଟନାଣ୍ଟ ଜେନେରାଲ ପୁଷ୍ପେନ୍ଦ୍ର ସିଂହ, ଡିପିଆଇଆଇଟି ସଚିବ ଶ୍ରୀ ଅମରଦୀପ ସିଂହ ଭାଟିଆ, ଡିଜି-ବିଆଇଏସଏଜି ଶ୍ରୀ ଟିପି ସିଂହ, ଆଇଆଇଟି ଜିଏନର ନିର୍ଦ୍ଦେଶକ ପ୍ରଫେସର ରଜତ ମୁନା, ବେସାମରିକ ବିମାନ ଚଳାଚଳ ମନ୍ତ୍ରଣାଳୟ, ଏମଓଆରଟିଏଚର ପ୍ରତିନିଧି, ଏଲ୍ ଆଣ୍ଡ ଟି, ଏଏମଡି ପରି ଅଗ୍ରଣୀ ଶିଳ୍ପ ଏବଂ ଗତି ଶକ୍ତି ବିଶ୍ୱବିଦ୍ୟାଳୟର କାର୍ଯ୍ୟକର୍ତ୍ତାମାନେ ଯୋଗ ଦେଇଥିଲେ ।
ଜିଏସଭିର କୁଳପତି ପ୍ରଫେସର ମନୋଜ ଚୌଧୁରୀ ଏକ ବିସ୍ତୃତ ଅଗ୍ରଗତି ରିପୋର୍ଟ ଉପସ୍ଥାପନ କରିଥିଲେ । ସମସ୍ତ ସଦସ୍ୟ ଏତେ କମ୍ ସମୟ ମଧ୍ୟରେ ବିଶ୍ୱବିଦ୍ୟାଳୟର ଏଭଳି ପ୍ରଗତିକୁ ପ୍ରଶଂସା କରିଥିଲେ । ଏହା ମଧ୍ୟରେ ବିଶେଷ କରି ଶିଳ୍ପ ସହିତ ଏହାର ସହଯୋଗ, ରେଳବାଇ, ପ୍ରତିରକ୍ଷା ବାହିନୀ ପାଇଁ କାର୍ଯ୍ୟନିର୍ବାହୀ ତାଲିମ ଏବଂ ସିଭିଲ୍ ସର୍ଭିସ୍ ପାଇଁ ପିଏମ୍ ଗତି ଶକ୍ତି ଆଦି ରହିଥିଲା । ସଦସ୍ୟମାନେ ସେତୁ ଏବଂ ଟନେଲ ଇଞ୍ଜିନିୟରିଂ, ଜାହାଜ ନିର୍ମାଣ, ରେଳବାଇ, ପ୍ରତିରକ୍ଷା କ୍ଷେତ୍ରର ଲଜିଷ୍ଟିକ୍ସ ଏବଂ ଯୋଗାଣ ଶୃଙ୍ଖଳାରେ ଭବିଷ୍ୟତର ପ୍ରଗତି ପାଇଁ ଅନେକ ପରାମର୍ଶ ଏବଂ ସହଯୋଗୀ ଇନପୁଟ ପ୍ରଦାନ କରିଥିଲେ । ସେନା ଉପ-ମୁଖ୍ୟ ଭାରତୀୟ ସେନାର କ୍ଷେତ୍ର ସମ୍ବନ୍ଧୀୟ ପ୍ରତିଷ୍ଠାନଗୁଡ଼ିକୁ ବିଶ୍ୱବିଦ୍ୟାଳୟ ସହିତ ଅନୁବନ୍ଧିତ କରିବା ସହିତ ତାଲିମ କାର୍ଯ୍ୟକ୍ରମର ପରିସର ବୃଦ୍ଧି ପାଇଁ ମତ ପ୍ରଦାନ କରିଥିଲେ । ବିଶ୍ୱବିଦ୍ୟାଳୟ ଚଳିତ ବର୍ଷ ଠାରୁ ଆଇଆରଏମ୍ଏସ୍ ଅଧିକାରୀମାନଙ୍କ ପାଇଁ ପରୀକ୍ଷାମୂଳକ ପ୍ରଶିକ୍ଷଣର ରୂପରେଖ ପ୍ରସ୍ତୁତ ଏବଂ ପରିଚାଳନା କରିବ ତଥା ଅଧିକ ପ୍ରଫେସରସିପ୍ ଚେୟାର ପ୍ରତିଷ୍ଠା କରିବା ପାଇଁ ଉଦ୍ୟୋଗଗୁଡ଼ିକ ସହିତ କାର୍ଯ୍ୟ କରିବ ।
ଏହି ଅବସରରେ ବିଆଇଏସ୍ଏଜି ଏବଂ ଜିଏସଭିପିଏମ୍ ଗତି ଶକ୍ତିକୁ ଆହୁରି ତ୍ୱରାନ୍ୱିତ କରିବା ଲାଗି ବୁଝାମଣା ପତ୍ର ଘୋଷଣା କରିଥିବାବେଳେ, ଏଏମଡିଜିଏସଭିରେ ଇନକ୍ୟୁବେସନ ସୁବିଧା ପାଇଁ ଆର୍ଥିକ ସହାୟତା ଘୋଷଣା କରିଥିଲେ । ଅତିରିକ୍ତ କ୍ୟାମ୍ପସ୍ ଭିତ୍ତିଭୂମି ନିର୍ମାଣ କରାଯାଉଛି ଏବଂ ଅତିରିକ୍ତ କ୍ୟାମ୍ପସ୍ ପାଇଁ ଏକ ମାଷ୍ଟର ପ୍ଲାନ୍ ପ୍ରସ୍ତୁତ କରାଯିବ, ଯାହା ପାଇଁ ଜମି ଅଧିଗ୍ରହଣ ହୋଇସାରିଛି। ବିଶ୍ୱବିଦ୍ୟାଳୟର ୨୦୨୪-୨୦୨୫ ବାର୍ଷିକ ରିପୋର୍ଟ ଏବଂ ବାର୍ଷିକ ହିସାବ ସଂସଦରେ ଉପସ୍ଥାପନ କରିବାକୁ ଅନୁମୋଦନ କରାଯାଇଥିଲା ।
ଗତି ଶକ୍ତି ବିଶ୍ୱବିଦ୍ୟାଳୟ (ଜିଏସଭି), ପରିବହନ ଏବଂ ଲଜିଷ୍ଟିକ୍ସ କ୍ଷେତ୍ରରେ ଭାରତର ଅଗ୍ରଣୀ ବିଶ୍ୱବିଦ୍ୟାଳୟ, ୨୦୨୨ରେ ସଂସଦର ଅଧିନିୟମ ଦ୍ୱାରା ଏକ କେନ୍ଦ୍ରୀୟ ବିଶ୍ୱବିଦ୍ୟାଳୟ ଭାବରେ ସ୍ଥାପିତ ହୋଇଥିଲା । ଭାରତ ସରକାରଙ୍କ ରେଳ ମନ୍ତ୍ରଣାଳୟ ଅଧୀନରେ କାର୍ଯ୍ୟ କରୁଥିବା ଏହି ବିଶ୍ୱବିଦ୍ୟାଳୟ ରେଳବାଇ, ରାଜପଥ, ବନ୍ଦର, ବିମାନ ଚଳାଚଳ, ସାମୁଦ୍ରିକ, ଜାହାଜ ଚଳାଚଳ, ଆଭ୍ୟନ୍ତରୀଣ ଜଳପଥ, ସହରାଞ୍ଚଳ ପରିବହନ ଏବଂ ସମ୍ପୂର୍ଣ୍ଣ ଲଜିଷ୍ଟିକ୍ସ ଏବଂ ଯୋଗାଣ ଶୃଙ୍ଖଳା ନେଟୱାର୍କ ସମେତ ସମଗ୍ର ପରିବହନ କ୍ଷେତ୍ରକୁ ଅନ୍ତର୍ଭୁକ୍ତ କରେ ।