ମୟୁରଭଞ୍ଜ, (କେପିଏନ୍ଏସ୍) : ଜିଲ୍ଲା ଶିଶୁ ସୁରକ୍ଷା ୟୁନିଟ ସହାୟତାରେ ୭ ବର୍ଷ ପରେ ହଜିଲା ଝିଅକୁ ଫେରି ପାଇଲେ ପରିବାର । ୨୦୧୮ ମସିହାରେ ମୟୁରଭଞ୍ଜ ଜିଲ୍ଲା ଝାରାଡ଼ିହି ପୋଲିସ ଏକ ଝିଅକୁ ଉଦ୍ଧାର କରି ଚାଇଲଡ ଲାଇନ ସବ ସେଣ୍ଟରକୁ ହସ୍ତାନ୍ତର କରିଥିଲେ । ଚାଇଲଡ ଲାଇନ ତରଫରୁ ଝିଅ ଟିକୁ ମୟୁରଭଞ୍ଜ ଶିଶୁ ମଙ୍ଗଳ ସମିତି ରେ ଉପସ୍ଥାପନ କରାଯାଇ ତାକୁ ବାରିପଦା ର ଏକ ଶିଶୁ ଯତ୍ନ ଅନୁଷ୍ଠାନରେ ରଖାଗଲା । ସେତେ ବେଳକୁ ଝିଅର ବୟସ ୬ ବର୍ଷ । ସେଠାରେ ତାକୁ ନିକଟସ୍ଥ ବିଦ୍ୟାଳୟରେ ନାମ ଲେଖା ଗଲା ଓ ସେ ସେଠାରେ ପାଠ ଆରମ୍ଭ କରି ସପ୍ତମ ଶ୍ରେଣୀ ପର୍ଯ୍ୟନ୍ତ ପଢି ଆସୁଥିଲା । ଝିଅର ନାମ ବେବି ପାତ୍ର । ଶିଶୁ ଯତ୍ନ ଅନୁଷ୍ଠାନରେ ରହିବା ଭିତରେ ଅନେକ ଥର ତା ସହିତ ଆଲୋଚନା କରିଥିଲେ ମଧ୍ୟ ସେ ତାର ସଠିକ ଠିକଣା କହି ପାରୁନଥିଲା । ପରିଶେଷରେ କିଛି ଦିନ ପୂର୍ବରୁ ସେ କହିଥିଲା ତାକୁ ସାଙ୍ଗରେ ନେଇଗଲେ ହୁଏତ ସେ ତାର ଘର ଦେଖେଇ ଦେଇପାରେ । ଫଳରେ ମୟୁରଭଞ୍ଜ ଜିଲ୍ଲା ଶିଶୁ ସୁରକ୍ଷା ୟୁନିଟ ଏବଂ ଶିଶୁ ମଙ୍ଗଳ ସମିତି ତତ୍ପର ହୋଇପଡ଼ିଥିଲେ ଓ ଗତ ଗୁରୁବାର ଦିନ ତାରିଖ ୨୭. ୦୩. ୨୦୨୫ ରେ ଜିଲ୍ଲା ଶିଶୁ ସୁରକ୍ଷା ଅଧିକାରିଣୀ ମମତା ମୟୀ ବିଶ୍ୱାଳ ଏବଂ ଶିଶୁ ମଙ୍ଗଳ ସମିତିର ନିର୍ଦ୍ଦେଶ କ୍ରମେ ସୁରକ୍ଷା ଅଧିକାରୀ (ଆନୁଷ୍ଠାନିକ ସେବା ) ମଧୁସୂଦନ ରଥ ଏବଂ ଚାଇଲଡ ହେଲ୍ପ ଲାଇନ ର ପରାମର୍ସଦାତ୍ରୀ ରଶ୍ମିତା ପାଣି ବେବିକୁ ସାଙ୍ଗରେ ନେଇ ତା ଘର ଅଭିମୁଖେ ବାହାରି ଥିଲେ । ସେ କହିବା ମୁତାବକ ତା ଘର ଝାରଖଣ୍ଡ ରାଜ୍ୟର ଜାମଶେଦପୁର ସହରରେ । ଜାମଶେଦପୁର ପହଂଚିବା ପରେ ସେ ହତବିମ୍ବ ହୋଇପଡ଼ିଥିଲେ । ନୂଆ ଘର ନୂଆ ରାସ୍ତା ଦେଖି ସେ ବାଟ ବଣ ହୋଇଗଲେ । ତଥାପି ହାର ନ ମାନି ଜାରି ରହିଥିଲା ସନ୍ଧାନ । ସେ କହୁଥିବା ସଂକେତକୁ ଆଧାର କରି ଅଧିକାରୀ ମାନେ ସ୍ଥାନୀୟ ଲୋକଙ୍କୁ ପଚାରି ପଚାରି ନୟାନ୍ତ ହୋଇଥିଲେ ମଧ୍ୟ ଶେଷରେ ତାର ଠିକଣା ମିଳିଥିଲା । ପ୍ରଥମେ ତାର ବଡ ଭାଇ କାମ କରୁଥିବା ସ୍ଥାନର ସନ୍ଧାନ ମିଳିଥିଲା ଓ ପରେ ସମ୍ପୂର୍ଣ ଠିକଣା ମିଳି ପାରିଥିଲା । ସେଠାରେ ତାର ମା କୁ ପାଇ ବେବି ଆତ୍ମହାରା ହୋଇପଡିଥିଲା । ମା ମଧ୍ୟ ଏତେ ଦିନ ପରେ ଝିଅ କୁ ପାଇ ଖୁସିରେ ବିଭୋର ହୋଇପଡିଥିଲା । ସେଠାରେ ଏକ ଭାବ ବିହ୍ୱଳ ପରିବେଶ ସୃଷ୍ଟି ହାଇଥିଲା । ଏତେ ଦିନ ପରେ ଜଣେ ହଜିଥିବା ଶିଶୁ ତାର ପରିବାର ଫେରି ପାଇଥିଲା । ମୟୁରଭଞ୍ଜ ଜିଲ୍ଲାପାଲ ହେମକାନ୍ତ ସାୟ ବେବି ଏବଂ ତା ପରିବାରକୁ ଶୁଭେଚ୍ଛା ଜଣାଇଛନ୍ତି ।