ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ଉପଖଣ୍ଡ ପାଇକମାଲ ସରକାରୀ ଉଚ୍ଚ ବିଦ୍ୟାଳୟରେ ବାର୍ଷିକ ପରୀକ୍ଷା ଫଳ ପ୍ରଧାନ ଶିକ୍ଷକ ଡଃ ଦ୍ଵାଦଶ କୁମାର ପ୍ରଧାନଙ୍କ ଅଧ୍ୟକ୍ଷତାରେ ଘୋଷିତ ହୋଇଯାଇଛି । ଉନ୍ନୟନ କମିଟି, ଅଭିଭାବକ, ଶିକ୍ଷକ ଶିକ୍ଷୟିତ୍ରୀ ଓ ଛାତ୍ରଛାତ୍ରୀ ମାନଙ୍କ ଉପସ୍ଥିତିରେ ବାର୍ଷିକ ପରୀକ୍ଷା ଫଳ ଘୋଷଣା କରାଯାଇଥିଲା । ପ୍ରଧାନ ଶିକ୍ଷକ ବିଦ୍ୟାଳୟ ଫଳାଫଳ ଓ ସହ ପାଠ୍ୟକ୍ରିୟା କଳାପ ରେ ଛାତ୍ରଛାତ୍ରୀଙ୍କ କୃତିତ୍ୱର ବିବରଣୀ ପ୍ରଦାନ କରିଥିଲେ । କମିଟି ସଦସ୍ୟ ପ୍ରଫୁଲ୍ଲ କୁମାର ପାଣିଗ୍ରାହୀ, କୁସୁମ କୁମାର ରାଓ ଏବଂ ଟାଇଲ ଚନ୍ଦ୍ର ଭୋଇ ସଭାରେ ମଞ୍ଚାସୀନ ଥିଲେ । ନବମ ଶ୍ରେଣୀର ପରୀକ୍ଷା ଦେଇଥିବା ୧୦୧ ଜଣ ଛାତ୍ରଛାତ୍ରୀ ସମସ୍ତଙ୍କୁ ଉତ୍ତୀର୍ଣ୍ଣ ଘୋଷଣା କରାଯାଇଥିଲା । ସ୍ୱସ୍ତିକ ରଞ୍ଜନ ଭୋଇ, ଖିଲେଶ୍ ବାରିକ ଓ ସୌମ୍ୟ ରଞ୍ଜନ ସାହୁଙ୍କୁ ଯଥାକ୍ରମେ ପ୍ରଥମ ଦ୍ୱିତୀୟ ଓ ତୃତୀୟ ସ୍ଥାନରେ ଉତ୍ତୀର୍ଣ୍ଣ ପାଇଁ ମଞ୍ଚରେ ପୁଷ୍ପଗୁଚ୍ଛ ଦେଇ ସମ୍ମାନିତ କରାଯାଇଥିଲା । ମିଳିତ ଭାବେ ଦଶମ ଶ୍ରେଣୀ ପାଇଁ ଏକ ଯୋଜନା ପ୍ରସ୍ତୁତ କରାଗଲା । ବାର୍ଷିକ ପ୍ରଗତି ପତ୍ର ପ୍ରଦାନ ସହ ପରୀକ୍ଷା ଖାତା ଦେଖିବା ପାଇଁ ବ୍ୟବସ୍ଥା କରାଯାଇଥିଲା । ଏଥିରେ ସମସ୍ତ ଶିକ୍ଷକ ସହଯୋଗ କରିଥିଲେ । ତ୍ରିଲୋଚନ ନାୟକ ମଞ୍ଚ ପରିଚାଳନା ଓ ବବିତା ବେହେରା ଧନ୍ୟବାଦ ଅର୍ପଣ କରିଥିଲେ ।