ବଲାଙ୍ଗିର, (କେପିଏନ୍ଏସ୍) : ଆଜି ବଲାଙ୍ଗିର ଜିଲ୍ଲା ପ୍ରାଥମିକ ଶିକ୍ଷକ ସଂଘର ଆନୁକୂଲ୍ୟରେ ସଭାନେତ୍ରୀ ଶାନ୍ତିଲତା ସାହୁଙ୍କ ଅଧ୍ୟକ୍ଷତାରେ ରେଲୱେ ଷ୍ଟେସନ ନିକଟସ୍ଥ ଜନକଲ୍ୟାଣ ମଣ୍ଡପ ଠାରେ ଅନ୍ତର୍ଜାତୀୟ ଶିକ୍ଷକ ଦିବସ ପାଳିତ ହୋଇଯାଇଛି । ଏଥିରେ ପୂର୍ବତନ ସଭାପତି ଇନ୍ଦୁଭୂଷଣ ଡାଙ୍ଗ ଶିକ୍ଷକମାନଙ୍କୁ ଯତ୍ନର ସହ ଏଲ୍ଆର୍ପି ଉପରେ କାର୍ଯ୍ୟକ୍ରମ ଜାରି ରଖିବାକୁ ପରାମର୍ଶ ଦେଇଥିଲେ । ଆଚାର୍ଯ୍ୟ ସୁନା ସାର ଶିକ୍ଷକମାନଙ୍କୁ ନିଜର ଆତ୍ମସମ୍ମାନ ବଜାୟ ରଖିବା ପାଇଁ ତତ୍ପର ହେବାକୁ କହିଥିଲେ । ଗୁରୁ ଶ୍ରୀ ଆନନ୍ଦ କୁମାର ଯୋଶୀ ପୁରୁଣା ପେନସନ୍ ସ୍କିମ ପାଇଁ ସଂଘ ଏକତ୍ରିତ ହୋଇ ପଦକ୍ଷେପ ନେବାକୁ ଆଗ୍ରହ କରିଥିଲେ । ସମ୍ପାଦକ ଶ୍ରୀ ରଥ ଶିକ୍ଷା ଓ ଶିକ୍ଷକମାନଙ୍କର ସମସ୍ୟା ତଥା ସମାଜ ପାଇଁ ଶିକ୍ଷକର ଭୂମିକା ଉପରେ ଆଲୋକପାତ କରିଥିଲେ । ଉପସଭାପତି ତୁଷାର କର୍ମୀ ଶିକ୍ଷକମାନେ ସମାଜ ସଂସ୍କାର ପାଇଁ ଗୁରୁ ଦାୟିତ୍ୱ ବହନ କରିଥିବାରୁ ଛାତ୍ର ଗୋଷ୍ଠୀ ଓ ସମାଜର ଉତ୍ତର ଦାୟୀ ବୋଲି ଅଭିହିତ କରିଥିଲେ । ପ୍ରଶାନ୍ତ ପୁରୋହିତ ଶିକ୍ଷକର ସାମାଜିକ ମୂଲ୍ୟବୋଧ ଉପରେ ବର୍ଣ୍ଣନା କରିଥିଲେ । ଅନୁପମା ପ୍ରହରାଜ ଉପସ୍ଥିତ ସଦସ୍ୟମାନଙ୍କୁ ଧନ୍ୟବାଦ ପ୍ରଦାନ କରିଥିଲେ ।