ମାଲକାନଗିରି : ଦଶାହ କାର୍ଯ୍ୟ ସାରି ଫେରୁଥିବା ବେଳେ ଓଲଟିଲା ଟ୍ରାକ୍ଟର । ୧୦ ଜଣ ଆହତ ହୋଇଥିବା ବେଳେ ୩ ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି । ଏଭଳି ଅଭାବାନୀୟ ଘଟଣା ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ ସ୍ଥିତ ସ୍ୱାଭିମାନ ଅଞ୍ଚଳ ବଡ଼ପୁଟ ଘାଟିରେ ଘଟିଛି । ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଜବତ କରିବା ସହ ଆହତଙ୍କୁ ଉଦ୍ଧାର କରି ନିକଟସ୍ଥ ହସ୍ପିଟାଲରେ ଭର୍ତ୍ତି କରିଛି ।
ସୂଚନା ଅନୁସାରେ ବୁଧବାର ସନ୍ଧ୍ୟାରେ ଚିତ୍ରକୋଣ୍ଡା ଥାନା ସ୍ଥିତ ବଡ଼ପଦର ଗ୍ରାମରୁ ପ୍ରାୟ ୧୫ ଜଣ ପୁରୁଷ ଓ ମହିଳା ସ୍ୱାଭିମାନ ଅଞ୍ଚଳର ଗାଜଲମାମୁଡ଼ି ପଞ୍ଚାୟତ ତଟାଗୁଡା ଗ୍ରାମକୁ ଏକ ଦଶାହ କାର୍ଯ୍ୟରେ ଯୋଗଦେଇ ବୁଧବାର ରାତିରେ ନିଜ ଘରକୁ ଫେରୁଥିବା ବେଳେ ତଟାଗୁଡା ଗ୍ରାମ ଠାରୁ କିଛି ଦୂର ବଡ଼ପୁଟ ଘାଟିରେ ହଠାତ ଟ୍ରାକ୍ଟରଟି ଭାରସାମ୍ୟ ହରାଇ ଓଲଟି ପଡିଥିଲା । ସେଥିରେ ବସିଥିବା ଲୋକମାନେ ତଳକୁ ଛିଟିକି ପଡି ଆହତ ହୋଇଥିଲେ । ନିକଟସ୍ଥ ଗ୍ରାମବାସୀମାନେ ଆହତମାନଙ୍କୁ ନିକଟସ୍ଥ ଜନବାଇ ସ୍ୱାସ୍ଥ୍ୟକେନ୍ଦ୍ରକୁ ଚିକିତ୍ସା ନିମନ୍ତେ ନେଇ ଯାଇଥିଲେ । ସେଠାରେ ୩ ଜଣଙ୍କୁ ଡାକ୍ତର ମୃତ ଘୋଷଣା କରିଥିଲେ । ଆହତମାନଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଚିତ୍ରକୋଣ୍ଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଡାକ୍ତର ସ୍ଥାନାନ୍ତର କରିଥିଲେ । ଘଟଣା ସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡିଛି ।