- ପୋଲିସ ତଦନ୍ତ
ସଇଁତଲା, (ଲକ୍ଷ୍ମୀକାନ୍ତ ସାହୁ) : କାଠ ସଂଗ୍ରହ କରିବାକୁ ଯାଇ ନିଖୋଜ, ୫ ଦିନ ହେଲା ମିଳୁନାହିଁ ପତ୍ତା । ଜଙ୍ଗଲକୁ କାଠ ସଂଗ୍ରହ କରିବାକୁ ଯାଇଥିଲେ । କିନ୍ତୁ ଗତ ୫ ଦିନ ହେଲା ନିଖୋଜ ଅଛନ୍ତି ବଲାଙ୍ଗିର ଜିଲ୍ଲା ସଇଁତଲା ଥାନା କୁମ୍ଭାରୀ ଗ୍ରାମର ବେଦବ୍ୟାସ ରଣା । ଗତ ୨୨ ଜାନୁଆରୀ ସକାଳ ସୁଲିଆ ଜଙ୍ଗଲକୁ ବେଦବ୍ୟାସ କାଠ ସଂଗ୍ରହ କରିବାକୁ ଯାଇଥିଲେ । କିନ୍ତୁ ସନ୍ଧ୍ୟା ପର୍ଯ୍ୟନ୍ତ ଆଉ ଘରକୁ ନ ଫେରିବାରୁ ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ କୌଣସି ତଥ୍ୟ ମିଳି ପାରିନଥିଲା । ଫଳରେ ସଇଁତଳା ଥାନାରେ ତାଙ୍କ ଭାଇ ଲିଖିତ ଅଭିଯୋଗ କରିଥିଲେ । ଘଟଣାକୁ ୫ ଦିନ ବିତିଗଲା ସତ୍ତ୍ୱେ ତାଙ୍କର କିଛି ଖବର ମିଳି ପାରିନାହିଁ । ପୋଲିସର ତଦନ୍ତ ଜାରି ଥିବା ବେଳେ ଏ ଦିଗରେ ପ୍ରଶାସନ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଗ୍ରାମବାସୀ ଏବଂ ପରିବାର ଲୋକେ ଦାବି କରୁଛନ୍ତି । ବେଦବ୍ୟାସଙ୍କ ପରିବାର ଲୋକେ କାନ୍ଦି କାନ୍ଦି ନିବେଦନ କରିବା ସହ ତାଙ୍କ ସ୍ୱାମୀକୁ ଖୋଜିବା ପାଇଁ ତାଙ୍କ ସ୍ତ୍ରୀ ସରକାରଙ୍କୁ ନିବେଦନ କରିଛନ୍ତି । ତେବେ ବେଦସବ୍ୟାସ ଏବେ କେଉଁଠି ଅଛନ୍ତି ପୋଲିସ ତଦନ୍ତ କରିବା ପାଇଁ ଗ୍ରାମବାସୀ ଦାବି କରିଛନ୍ତି ।