ପାଟଣାଗଡ଼, (ଅଶୋକ କୁମାର ବାଗ) : ବଲାଙ୍ଗିର ଜିଲ୍ଲା ପାଟଣାଗଡ଼ ବ୍ଲକ ଭଇଁଷା ପଞ୍ଚାୟତ ଅନ୍ତର୍ଗତ ସାନଝାଙ୍କରପାଲି ଛକ ବା ମୁଦଘାଟ ଛକ ପାଖରେ ଏକ କପା କିଆରିରୁ ଜଣେ ବ୍ୟକ୍ତିଙ୍କ ଉଲଗ୍ନ ମୃତଦେହ ପାଟଣାଗଡ଼ ପୋଲିସ ଉଦ୍ଧାର କରିଛି । ସୂଚନା ଅନୁଯାୟୀ ଆଜି ସକାଳୁ କପା କିଆରୀରେ ଜଣେ ବ୍ୟକ୍ତିଙ୍କ ମୃତଦେହ ସ୍ଥାନୀୟ ଲୋକେ ଦେଖିବାକୁ ପାଇଥିଲେ । କେହି ଜଣେ ପାଟଣାଗଡ଼ ଥାନାକୁ ଫୋନ କରି ଘଟଣା ବିଷୟରେ ଜଣାଇଥିଲେ । ଖବର ପାଇ ପାଟଣାଗଡ଼ ଥାନାଧିକାରୀ ଅନନ୍ତ ପଧାନ ଘଟଣା ସ୍ଥଳରେ ପହଞ୍ଚି ଶବକୁ ଜବତ କରି ଶବ ବ୍ୟବଚ୍ଛେଦ ପାଇଁ ପାଟଣାଗଡ଼ ଡାକ୍ତରଖାନାକୁ ପଠାଇଥିବା ଜଣାପଡିଛି । ମୃତ ବ୍ୟକ୍ତିର ପରିଚୟ ଲୁଚନ ଯୁଏଡ଼ ବୋଲି ଜଣାପଡିଛି । ସେ ସାନଝାଙ୍କରପାଲି ଗ୍ରାମର ବୋଲି ଜଣାପଡିଥିବା ବେଳେ ତାଙ୍କ ଉଲଗ୍ନ ମୃତଦେହ କପା କିଆରିରେ ମିଳିଥିବାରୁ ଅଞ୍ଚଳରେ ଭୟର ବାତାବରଣ ଦେଖିବାକୁ ମିଳିଛି । ହତ୍ୟାର ସନ୍ଦେହ କରୁଥିବା ବେଳେ ଏନେଇ ପାଟଣାଗଡ଼ ଥାନା କେସ ନଂ ୧୩/୨୦୨୩ରେ ଏକ ମାମଲା ରୁଜୁ ହୋଇଥିବା ବେଳେ ଘଟଣାର ଅଧିକ ତଦନ୍ତ କରୁଥିବା ପାଟଣାଗଡ଼ ଥାନାଧିକାରୀ ଅନନ୍ତ ପଧାନ ପ୍ରକାଶ କରିଛନ୍ତି ।