ସଇଁତଲା, (ପ୍ରମୋଦ ସେଲମା) : ବଲାଙ୍ଗିର ଜିଲ୍ଲା ସଇଁତଲା ଥାନା ଅଞ୍ଚଳରେ ଜଣେ ବାଇକ ଆରୋହୀ ଭାରସାମ୍ୟ ହରାଇ ଗଛରେ ପିଟି ହୋଇ ମୃତ୍ୟୁବରଣ କରିଥିବା ଜଣାପଡିଛି । ମୃତ ବ୍ୟକ୍ତିଙ୍କ ନାମ ସୁରେଶ ମାଝୀ (୨୮) ଘର କମରଲଗା ବୋଲି ଜଣାପଡିଛି । ଖବର ପାଇଁ ସଇଁତଲା ପୋଲିସ ପହଂଚି ଶବକୁ ଜବତ କରି ଥାନା କେସ ନଂ ୧୬୩/୨୩ରେ ଏକ ମାମଲା ରୁଜୁ କରି ବଲାଙ୍ଗିରରେ ଶବ ବ୍ୟବଛେଦ କରି ପରିବାର ଲୋକଙ୍କୁ ହସ୍ତାନ୍ତର କରିଥିଲେ । ଯାହାକୁ ନେଇ ଅଞ୍ଚଳରେ ଶୋକର ଛାୟା ଖେଳିଯାଇଛି । ପ୍ରକାଶ ଯେ, କୁଇକେଡା ପଞ୍ଚାୟତର କମରଲଗା ଗାଁର ସୁରେଶ ମାଝୀ, ଦେବେନ୍ଦ୍ର ମାଝୀ ଓ ମୁକେଶ ମାଝୀ ୩ ଜଣ ସାଙ୍ଗ ବାଇକ ନଂ ଓଡ଼ି ୦୩ ଭି ୧୭୨୦ ଯୋଗେ ସଇଁତଲାକୁ ଆସି ସନ୍ଧ୍ୟା ସାଢେ ୭ଟାରେ ଘରକୁ ଫେରୁଥିବା ବେଳେ ସ୍ଥାନୀୟ କଲେଜ ନିକଟର ବୁଲାଣିଠାରେ ଭାରସାମ୍ୟ ହରାଇ ଛିଟିକି ପଡ଼ିଥିଲେ । ଏଥିରେ ସୁରେଶ ଏକ ଗଛରେ ପିଟି ହୋଇଥିଲେ ଓ ଅନ୍ୟ ୨ ସାଙ୍ଗ ସାମାନ୍ୟ ଆହତ ହୋଇଥିଲେ । ଘଟଣାସ୍ଥଳରୁ ସୁରେଶଙ୍କୁ ସ୍ଥାନୀୟ ଲୋକେ ଉଦ୍ଧାର କରି ସଇଁତଲା ଡାକ୍ତରଖାନାକୁ ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଥାନା ଏସ୍ଆଇ ଶଙ୍କରଲାଲ ମିର୍ଦ୍ଧା ବାଇକକୁ ଜବତ କରି ଘଟଣାର ଅଧିକ ତଦନ୍ତ ଜାରି ରଖିଛନ୍ତି ।