
ଲୋଇସିଂହା, (ବିମଳେନ୍ଦୁ ସାହୁ) : ଆନ୍ତର୍ଜାତୀୟ ମହିଳା ଦିବସ ଅବସରରେ ବଲାଙ୍ଗିର ଜିଲ୍ଲାର ଏକମାତ୍ର “ମହିଳା ଅନୁକୂଳ ଗ୍ରାମପଞ୍ଚାୟତ” ଭାବରେ ଲୋଇସିଂହା ବ୍ଲକର ବୁଢ଼ୀପଦର ପଞ୍ଚାୟତ କାର୍ଯ୍ୟାଳୟ ପରିସରରେ ମହିଳା ସଭା ଆୟୋଜିତ ହୋଇଯାଇଛି । ଏଥିରେ ପଞ୍ଚାୟତର ସମସ୍ତ ଆଶା ତଥା ଅଙ୍ଗନବାଡ଼ି କର୍ମୀ, ଏମବିକେ, ସିଆରପି, ସ୍ଵୟଂ ସହାୟିକା ଗୋଷ୍ଠୀ ସଦସ୍ୟା ଏବଂ କିଶୋରୀ ମାନେ ଯୋଗଦେଇଥିଲେ । ବଲାଙ୍ଗିର ସ୍ଥିତ ପିରାମଲ ଫାଉଣ୍ଡେସନ ଆନୁକୁଲ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସରପଞ୍ଚ ଲକ୍ଷ୍ମୀ ପଧାନ ଯୋଗଦେଇ ମହିଳା ଦିବସ ଉପରେ ସୂଚନା ପ୍ରଦାନ କରିଥିଲେ । ସମ୍ମାନିତ ଅତିଥି ଭାବେ ପିରାମଲ ଫାଉଣ୍ଡେସନର ପ୍ରୋଗ୍ରାମ ଅଫିସର ଦେବୀ ପ୍ରସାଦ ପରିଡା ଯୋଗଦେଇ “ଅନୁକୂଳ ଗ୍ରାମପଞ୍ଚାୟତ” ର ଆବଶ୍ୟକତା ତଥା ଉପଲବ୍ଧି ଉପରେ ଆଲୋକପାତ କରିଥିଲେ । ଆଇସିଡିଏସ ସୁପରଭାଇଜର ସତ୍ୟବତୀ ମିଶ୍ର, ସମାଜସେବୀ ଯୁଧିଷ୍ଠିର ପଧାନ, ଡିପିଆରସି ସପୋର୍ଟ ଷ୍ଟାଫ ଅନନ୍ତ ପଧାନ, ସୁନିଲ ସାହୁ, ନେହା କୁମାରୀ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ପଞ୍ଚାୟତ ନିର୍ବାହୀ ଅଧିକାରୀ ପ୍ରହଲ୍ଲାଦ ବେହେରା ସଭା ସଂଯୋଜନା କରିଥିବା ବେଳେ ଜିଆରଏସ ଜିତେନ୍ଦ୍ରିୟ ସାହୁ ଧନ୍ୟବାଦ ଅର୍ପଣ କରିଥିଲେ ।