ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ପ୍ରତିବର୍ଷ ମାର୍ଚ୍ଚ ୮ରେ ପାଳନ କରାଯାଉଥିବା “ଆନ୍ତର୍ଜାତୀୟ ମହିଳା ଦିବସ” ହେଉଛି ମହିଳାମାନଙ୍କ ସଫଳତାକୁ ସମ୍ମାନ ଦେବା, ସମାଜରେ ସେମାନଙ୍କର ଅବଦାନକୁ ସ୍ୱୀକୃତି ଦେବା ଏବଂ ଲିଙ୍ଗଗତ ସମାନତା ପାଇଁ ଏକ ବିଶ୍ୱସ୍ତରୀୟ ଉତ୍ସବ ପାଳନ କରିବା । ଏହି ଅବସରରେ ଡେଲାଙ୍ଗ ଶିଶୁ ସାହିତ୍ୟ ସଂସଦ ଆନୁକୂଲ୍ୟରେ ବିଶ୍ୱନାଥ ଦେବ ନୋଡାଲ ଉଚ୍ଚ ବିଦ୍ୟାପୀଠ ପରିସରରେ କିଶୋରୀ ଛାତ୍ରୀ ଓ ସ୍ୱୟଂ ସହାୟକ ଗୋଷ୍ଠୀର ମାଆ ମାନଙ୍କ ଉପସ୍ଥିତିରେ ବିଦ୍ୟାଳୟର ସମସ୍ତ ଶିକ୍ଷକଶିକ୍ଷୟିତ୍ରୀଙ୍କ ସହଯୋଗରେ ଆନ୍ତର୍ଜାତିକ ମହିଳା ଦିବସ ପାଳନ କରାଯାଇଥିଲା । ଏହି ପରିପ୍ରେକ୍ଷୀରେ ଆୟୋଜିକା ଶିକ୍ଷୟିତ୍ରୀ ଲକ୍ଷ୍ମୀପ୍ରିୟା ଦାଶ ବିଭିନ୍ନ ପ୍ରତିଯୋଗିତା ଯଥା ପୁଚିଖେଳ, ଦୌଡି ଡିଆଁ, ମ୍ୟୁଜିକ୍ ଚେୟାର, ଝୋଟିଚିତା ତଥା ମହିଳା ମାନଙ୍କର ଶଙ୍ଖଫୁଙ୍କା, ବେଲୁନ ହୁଙ୍କା, ଝୋଟିଚିତା ପ୍ରତିଯୋଗିତାର ଆୟୋଜନ କରିଥିଲେ । ପରେ ପରେ ସଭାକାର୍ଯ୍ୟରେ ସର୍ବ ପ୍ରଥମେ ଜଗନ୍ନାଥଙ୍କ ପାଖରେ ପ୍ରଦୀପ ପ୍ରଜ୍ଜ୍ୱଳନ ସହିତ ନୃତ୍ୟ ସଙ୍ଗୀତ ପରିବେଷଣ କରିଥିଲେ । ଅତିଥି ଭାବେ ବରିଷ୍ଠ ଶିକ୍ଷକ ସୁରେଶ ଚନ୍ଦ୍ର ବେହେରା ମହିଳା ଦିବସ ଉପଲକ୍ଷେ ସମାଜରେ ମହିଳାଙ୍କ ସମାନତା ଓ ସମ୍ମାନ ଉପରେ ଆଲୋକପାତ କରିଥିଲେ । ପ୍ରତ୍ୟେକ ମହିଳାମାନେ ନିଜ ନିଜର ବକ୍ତବ୍ୟ ପ୍ରଦାନ କରି ସଭାକାର୍ଯ୍ୟକୁ ତ୍ୱରାନ୍ୱିତ କରି ସଂଘର୍ଷମୟ କାହାଣୀ ଆଲୋଚନା କରିଥିଲେ । ଏହି ଅବସରରେ ସ୍ୱୟଂ ସହାୟିକା ଗୋଷ୍ଠୀ ମୁଖ୍ୟମୋଟରୀ ପଞ୍ଚାୟତର ସବିତା ବରାଳ, ସିଆର୍ପି ନମିତା ସାମନ୍ତସିଂହାର, ସୁଲୋଚନା ଜୟସିଂହ, ରଜନୀ ନାୟକ ପ୍ରଭୃତିଙ୍କୁ ଉତ୍ତରୀୟ ଓ ଫୁଲତୋଡା ପ୍ରଦାନ କରି ସମ୍ମାନିତ କରାଯାଇଥିଲା । ମହିଳା ଦିବସ ପାଳନ ଉପଲକ୍ଷେ କବିତା ଆବୃତ୍ତି କରାଯାଇଥିଲା । ପରିଶେଷରେ କୃତ୍ତି ପ୍ରତିଯୋଗୀଙ୍କୁ ପୁରସ୍କାର ପ୍ରଦାନ କରାଯାଇଥିଲା । ଏହି କାର୍ଯ୍ୟକ୍ରମରେ ଶିକ୍ଷକ ଦିଲ୍ଲୀପ କୁମାର ବେହେରା, କେଶୀରାମ ହେମ୍ବ୍ରମ, ଶାନ୍ତିଲତା ପ୍ରଧାନ, ସୁକନ୍ୟା ଡାକୁଆ, ସରିତା ମିଶ୍ର, ଦେବକୀ ଦାଶ ପ୍ରଭୃତି ସହାୟତା ପ୍ରଦାନ କରିଥିଲେ । ଛାତ୍ରୀମାନେ ନୃତ୍ୟ ସଙ୍ଗୀତ ପରିବେଷଣ କରିଥିଲେ । କାର୍ଯ୍ୟକ୍ରମ ଶେଷରେ ଆୟୋଜିକା ଶିକ୍ଷୟିତ୍ରୀ ଲକ୍ଷ୍ମୀ ପ୍ରିୟା ଦାଶ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।