ସୁବର୍ଣ୍ଣପୁର (ପ୍ରଭୁଦତ୍ତ ରଥ) : ସୁବର୍ଣ୍ଣପୁର ଜିଲ୍ଲାର ବିଭିନ୍ନ ସ୍ଥାନରେ ଆଜି ଆର୍ନ୍ତଜାତୀୟ ମହିଳା ଦିବସ ପାଳିତ ହୋଇଯାଇଛି । ମହିଳାଙ୍କ ଭିତରେ ଥିବା ପ୍ରତିଭା ଓ ଦକ୍ଷତାର ବିକାଶ ସହ ସାମାଜିକ ଉନ୍ନୟନରେ ମହିଳାଙ୍କ ଭାଗିଦାରୀ ଓ ଭୂମିକା ଅନିର୍ବାଯ୍ୟ ବୋଲି ମତ ପ୍ରକାଶ ପାଇଛି । ଏହି ଅବସରରେ ସୁବର୍ଣ୍ଣପୁରସ୍ଥିତ କେନ୍ଦ୍ରୀୟ ବିଦ୍ୟାଳୟରେ ଅନୁଷ୍ଠିତ ମହିଳା ଦିବସରେ ଜିଲ୍ଲା ସଂସ୍କୃତି ଅଧିକାରୀ ଡ.ଇପ୍ସିତା ପ୍ରିୟଦର୍ଶନୀ ମିଶ୍ର ଅତିଥି ଭାବେ ଯୋଗଦେଇ ମହିଳା ସଶକ୍ତିକରଣ ଏବଂ ଅର୍ନ୍ତନିହିତ ଦକ୍ଷତାର ବିକାଶ ଉପରେ ଗୁରୁତ୍ବାରୋପ କରିଛନ୍ତି । କେନ୍ଦ୍ରୀୟ ବିଦ୍ୟାଳୟର ଅଧ୍ୟକ୍ଷ ଅଶୋକ ସରଭଙ୍ଗଙ୍କ ପୌରହିତ୍ୟରେ ଅନୁଷ୍ଠିତ ସଭାରେ ସାମାଜିକ କର୍ମୀ ଅନାସାରୀ ନେଗୀ, ଅଧ୍ୟାପିକା ରାଧାରାଣୀ ପଣ୍ଡା ଏକ ବିକଶିତ ସଭ୍ୟତା ନିର୍ମାଣରେ ମହିଳାଙ୍କ ଯୋଗଦାନ ଏବଂ ଲିଂଗଗତ ସମାନତା ଉପରେ ଆଲୋକପାତ କରିଥିଲେ । ସେହିପରି ବିଜୁ ପଟ୍ଟନାୟକ ମହିଳା ମହାବିଦ୍ୟାଳୟଠାରେ ଆୟୋଜିତ ମହିଳା ଦିବସରେ ଅତିରିକ୍ତ ଜିଲ୍ଲାପାଳ ସୂର୍ୟ୍ୟନାରାୟଣ ଦାଶ ଯୋଗଦେଇ ମହିଳାଙ୍କ ପାରଦର୍ଶିତା ପ୍ରଦର୍ଶନ ଆଜିର ଏକ ଆହ୍ବାନ ବୋଲି ଉଦବୋଧନ ଦେଇଛନ୍ତି । ଉଭୟ ସ୍ଥାନରେ ଛାତ୍ରୀମାନଙ୍କ ଦ୍ବାରା ସାଂସ୍କୃତିକ ନୃତ୍ୟଗୀତ ପରିବେଷଣ ହୋଇଥିଲା ।