ବଲାଙ୍ଗିର, (କେପିଏନ୍ଏସ୍) : ଗନ୍ଧରେଲ ସ୍ଥିତ ରାଧାରମଣ ମନ୍ଦିର ପରିସରରେ ମାହେଶ୍ଵରୀ ସାମାଜିକ ସଙ୍ଗଠନର ବାର୍ଷିକ ସାଧାରଣ ସଭା ସହ ବନ୍ଧୁ ମିଳନ ଅନୁଷ୍ଠିତ ହୋଇଯାଇଛି । ଏହି ଅବସରରେ ବଲାଙ୍ଗିର ନବ ନିର୍ବାଚିତ ବିଧାୟକ କଳିକେଶ ନାରାୟଣ ସିଂଦେଓଙ୍କୁ ଜାତୀୟ ରାଇଫଲ୍ ଏସୋସିଏସନ୍ ସଭାପତି ହେବା ସହ ଭାରତ ପାଇଁ ବ୍ରୋଞ୍ଜ ପଦକ ହାସଲ କରାଇ ଗୌରବାନ୍ୱିତ କରିଥିବା ହେତୁ ସମ୍ବର୍ଦ୍ଧିତ କରାଯାଇଥିଲା । ବଲାଙ୍ଗିରର ମୁଖ୍ୟ ଶାଖା ସହ ଆଗଲପୁର, ଲୋଇସିଂହା, ତରଭା, ପୁଇନ୍ତଲା, ଟିଟଲାଗଡ, ଦେଓଗାଁ, ଖପ୍ରାଖୋଲ, ପାଟଣାଗଡ଼, ବଲାଙ୍ଗିର ସଦର ସମସ୍ତ ଶାଖାର ଶତାଧିକ ପୁରୁଷ ଓ ମହିଳା ସ୍ୱେଚ୍ଛାସେବୀ ଉପସ୍ଥିତ ଥିଲେ । ବିଧାୟକ ଯୁବ ବର୍ଗଙ୍କ କାର୍ଯ୍ୟକଳାପକୁ ପ୍ରଶଂସା କରିବା ସହ ଶିକ୍ଷା, ସ୍ଵାସ୍ଥ୍ୟ, କ୍ରୀଡା ଆଦି କ୍ଷେତ୍ରରେ ନୂଆ ପ୍ରକଳ୍ପ ହାତକୁ ନେବା ପାଇଁ ଉଦବୋଧନ ଦେଇଥିଲେ । ପରିଚାଳନା ନିର୍ଦ୍ଦେଶକ ଅଙ୍କୁଶ କୁମାର ପାଣ୍ଡିଆଙ୍କ ସଭାପତିତ୍ୱରେ ହୋଇଥିବା ଏହି ସଭାରେ ଅନେକ ସମୟ ଧରି ସମସ୍ତ ସଭ୍ୟ ମତ ବିନିମୟ କରିଥିଲେ ଏବଂ ଏହି ସଭାକୁ ତୃପ୍ତିମୟୀ ମହାପାତ୍ର ପରିଚାଳନା କରିଥିଲେ ଓ ସଭାପତି ଶୋଭନ କୁମାର ଅଗ୍ରୱାଲ ଧନ୍ୟବାଦ୍ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ଆଶୁତୋଷ ବାଗ, ସୋମେଶ ମିଶ୍ର, ଜତିନ୍ଦ୍ର ସାହୁ, ତୁଷାର କୁଅଁର, କରନ୍ ବେହେରା, ଶିବାନନ୍ଦ ସାହାଣୀ, ଓମ୍ ସୁନା, ଅଂଶୁମାନ କୁମ୍ଭାର, ଦେବାଶିଷ ପାଣ୍ଡିଆ, କାହ୍ନ ସିଂହ ସହଯୋଗ କରିଥିଲେ ।