କେନ୍ଦ୍ର ଜଳଶକ୍ତି ମନ୍ତ୍ରୀ ସିଆର ପାଟିଲ ପାରମ୍ପରିକ ଜଳ କଳସ ସମାରୋହ ସହିତ ଜଳ ସୁରକ୍ଷା ଉପରେ ଦ୍ୱିତୀୟ ରାଜ୍ୟ ଜଳମନ୍ତ୍ରୀ ସମ୍ମିଳନୀକୁ ଉଦ୍ଘାଟନ କରିଛନ୍ତି
- “ଜଳ ଜୀବନ ମିଶନ ମାଧ୍ୟମରେ ୨୫ ଲକ୍ଷ ମହିଳାଙ୍କୁ କ୍ଷେତ୍ର ପରୀକ୍ଷଣ କିଟ୍ ବ୍ୟବହାର କରି ଜଳର ଗୁଣବତ୍ତା ପରୀକ୍ଷା କରିବାକୁ ତାଲିମ ଦିଆଯାଇଛି”: ସିଆର ପାଟିଲ
- “ଭାରତର ପ୍ରତ୍ୟେକ ଗ୍ରାମୀଣ ପରିବାର ପାଇଁ ସୁରକ୍ଷିତ ଏବଂ ସ୍ଥାୟୀ ପାନୀୟ ଜଳ ସୁନିଶ୍ଚିତ କରିବା ପାଇଁ ଏହି ସରକାର ପ୍ରତିଶ୍ରୁତିବଦ୍ଧ”: ସିଆର ପାଟିଲ
- “ଗ୍ରାମାଞ୍ଚଳର ୮୦% ରୁ ଅଧିକ ପରିବାର ଏବେ ଟ୍ୟାପ୍ ଜଳ ସଂଯୋଗ ପାଇ ପାରୁଛନ୍ତି”: କେନ୍ଦ୍ରମନ୍ତ୍ରୀ
ନୂଆଦିଲ୍ଲୀ, (ପିଆଇବି) : ପାରମ୍ପରିକ ଜଳ କଳଶ ସମାରୋହ ସହିତ ରାଜସ୍ଥାନ ମୁଖ୍ୟମନ୍ତ୍ରୀ ଭଜନ ଲାଲ ଶର୍ମାଙ୍କ ଉପସ୍ଥିତିରେ କେନ୍ଦ୍ର ଜଳଶକ୍ତି ମନ୍ତ୍ରୀ ସିଆର ପାଟିଲ ଜଳ ସୁରକ୍ଷା ଉପରେ ଦ୍ୱିତୀୟ ରାଜ୍ୟ ଜଳମନ୍ତ୍ରୀ ସମ୍ମିଳନୀକୁ ଉଦ୍ଘାଟନ କରିଥିଲେ । ଜଳ ନିରାପତ୍ତା ଉପରେ ଦ୍ୱିତୀୟ ରାଜ୍ୟ ଜଳମନ୍ତ୍ରୀ ସମ୍ମିଳନୀରେ ଉଦ୍ବୋଧନ ଦେଇ କେନ୍ଦ୍ର ଜଳଶକ୍ତି ମନ୍ତ୍ରୀ ସିଆର ପାଟିଲ ଜଳ ଜୀବନ ମିଶନ (ଜେଜେଏମ୍)ର ଉଲ୍ଲେଖନୀୟ ଅଗ୍ରଗତି ଉପରେ ଆଲୋକପାତ କରିଥିଲେ ଏବଂ ଭାରତର ପ୍ରତ୍ୟେକ ଗ୍ରାମୀଣ ପରିବାର ପାଇଁ ନିରାପଦ ଏବଂ ସ୍ଥାୟୀ ପାନୀୟ ଜଳ ସୁନିଶ୍ଚିତ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ଦୋହରାଇଥିଲେ । ଶ୍ରୀ ପାଟିଲ ଗୁରୁତ୍ୱାରୋପ କରି କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏହି ଅଭିଯାନ ଅଭୂତପୂର୍ବ ଅଗ୍ରଗତି କରିଛି ଏବଂ ୮୦% ରୁ ଅଧିକ ଗ୍ରାମୀଣ ପରିବାର ବର୍ତ୍ତମାନ ଟ୍ୟାପ୍ ଜଳ ସଂଯୋଗ ଉପଲବ୍ଧ କରାଇଛନ୍ତି । ଫଳରେ ୧୫ କୋଟିରୁ ଅଧିକ ପରିବାର ଘର ଦ୍ୱାରରେ ବିଶୁଦ୍ଧ ଓ ନିରାପଦ ପାନୀୟ ଜଳ ପାଇ ଉପକୃତ ହେଉଛନ୍ତି । ଜନସ୍ୱାସ୍ଥ୍ୟ, ମହିଳା ସଶକ୍ତୀକରଣ ଏବଂ ଗୋଷ୍ଠୀର ଅଂଶଗ୍ରହଣ ଉପରେ ଜେଜେଏମ୍ର ପରିବର୍ତ୍ତନକାରୀ ପ୍ରଭାବ ଉପରେ ମନ୍ତ୍ରୀ ଗୁରୁତ୍ୱାରୋପ କରିଥିଲେ । ଡବ୍ଲ୍ୟୁଏଚ୍ଓର ଆକଳନ ଅନୁଯାୟୀ, ଡାଇରିଆ ଭଳି ଜଳବାହିତ ରୋଗରେ ୪ ଲକ୍ଷ ମୃତ୍ୟୁକୁ ରୋକିବାରେ ଏହି ମିଶନ ଯୋଗଦାନ ଦେଇଛି । ଏହା ବ୍ୟତୀତ, ଏହି ପଦକ୍ଷେପ ଦ୍ୱାରା ସ୍ୱାସ୍ଥ୍ୟ ସମ୍ବନ୍ଧୀୟ ଖର୍ଚ୍ଚରେ ଉଲ୍ଲେଖନୀୟ ହ୍ରାସ ଘଟିଛି ଏବଂ ଗ୍ରାମୀଣ ଜନସଂଖ୍ୟାର ସାମଗ୍ରିକ କଲ୍ୟାଣରେ ଉନ୍ନତି ଘଟିଛି । ଏହି ଅଭିଯାନର ଏକ ପ୍ରମୁଖ ଆକର୍ଷଣ ହେଉଛି ମହିଳା ସଶକ୍ତୀକରଣ, ୨୫ ଲକ୍ଷ ମହିଳାଙ୍କୁ ଫିଲ୍ଡ ଟେଷ୍ଟିଂ କିଟ୍ ବ୍ୟବହାର କରି ଜଳର ଗୁଣବତ୍ତା ପରୀକ୍ଷା କରିବାକୁ ତାଲିମ ଦିଆଯାଇଛି । ଏହି ପଦକ୍ଷେପ ଗୋଷ୍ଠୀ ନେତୃତ୍ୱାଧୀନ ତଦାରଖକୁ ସୁଦୃଢ଼ କରିଛି, ଯାହା ଦ୍ୱାରା ଘରେ ପହଞ୍ଚୁଥିବା ପାଣି ଗୁଣାତ୍ମକ ମାନଦଣ୍ଡ ପୂରଣ କରୁଛି । ଏହାବ୍ୟତୀତ ଟ୍ୟାପ୍ ପାଣିର ଉପଲବ୍ଧତା ମହିଳାମାନଙ୍କ ପାଇଁ ଦୈନିକ ୫.୫ କୋଟି ଘଣ୍ଟା ସଞ୍ଚୟ କରିଛି, ଯାହା ଦ୍ୱାରା ସେମାନେ ଆର୍ଥିକ, ଶିକ୍ଷାଗତ ଏବଂ ସାମାଜିକ କାର୍ଯ୍ୟରେ ନିୟୋଜିତ ହୋଇପାରିବେ । ସରକାରଙ୍କ ଦୃଷ୍ଟିକୋଣକୁ ଦୋହରାଇ ଶ୍ରୀ ପାଟିଲ କହିଥିଲେ ଯେ, ଜଳ ସୁରକ୍ଷା ବିକଶିତ ଭାରତ ଅ୨୦୪୭ର ଏକ ମୌଳିକ ସ୍ତମ୍ଭ ଏବଂ ଜଳ ଜୀବନ ମିଶନ ଏହି ଲକ୍ଷ୍ୟ ହାସଲ କରିବାରେ ଏକ ପ୍ରମୁଖ ଚାଳକ । ନିରନ୍ତର ପ୍ରଗତି ଏବଂ ଦୃଢ଼ ଗୋଷ୍ଠୀ ଅଂଶଗ୍ରହଣ ସହିତ, ଆମେ ସମସ୍ତଙ୍କ ପାଇଁ ସ୍ୱଚ୍ଛ ପାନୀୟ ଜଳକୁ ବାସ୍ତବ ରୂପ ଦେବାକୁ ପ୍ରତିଶ୍ରୁତିବଦ୍ଧ ।