ଚାନ୍ଦବାଲି : ସାପ କାମୁଡ଼ାରେ ଜଣେ ଯୁବତୀଙ୍କ ପ୍ରାଣହାନୀ ଘଟିଥିବା ସୂଚନାରେ କୁହାଯାଇଛି । ତେବେ ସେ ପରିବାର ସଦସ୍ୟଙ୍କ ମଝିରେ ଶୋଇଥିବା ବେଳେ ଏକ ୫ ଫୁଟିଆ ନାଗ ସାପ ତାଙ୍କୁ କାମୁଡ଼ିଥିଲା । ସୂଚନା ଅନୁସାରେ ଚାନ୍ଦବାଲି ଏନ୍ଏସି.ର କୁଆଁରସର ଗାଁ ବାସିନ୍ଦା ପ୍ରଭାକର ପଣ୍ଡାଙ୍କ ଝିଅ ଲୋପିତା(୨୧) ଗଲା ରାତିରେ ପରିବାର ଲୋକଙ୍କ ସହ ଶୋଇଥିବା ବେଳେ ଏଭଳି ଅଘଟଣର ଶିକାର ହୋଇଛନ୍ତି ।
ଘର ଚଟାଣରେ ବାପାଙ୍କ ପାଖରେ ଶୋଇଥିବା ବେଳେ ନାଗ ସାପ କାମୁଡ଼ି ଦେଇଥିବା ଯୋଗୁଁ ତାଙ୍କ ମୃତ୍ୟୁ ଘଟିଛି । ପରିବାର ଲୋକେ ସାପ କାମୁଡ଼ିବା ପରେ ପରେ ଚାନ୍ଦବାଲି ମେଡ଼ିକାଲ ନେଇଥିଲେ । ତାଙ୍କ ଅବସ୍ଥା ଗୁରୁତର ଥିବାରୁ ଭଦ୍ରକ ମେଡ଼ିକାଲକୁ ମଧ୍ୟ ନେଇଥିଲେ । ସେଠାରେ ଡାକ୍ତର ଲୋପିତାଙ୍କୁ ମୃତ ଘୋଷଣା କରିଥିବା ବେଳେ ପରିବାରବର୍ଗ ସଂପୂର୍ଣ୍ଣ ଭାଂଗି ପଡ଼ିଥିଲେ । ଲୋପିତାଙ୍କ ମୃତ୍ୟୁରେ ସାରା ଅଂଚଳରେ ଶୋକର ଛାୟା ଖେଳି ଯାଇଛି । ସାପଧରାଳୀମାନେ ଆସି ଘର ଭିତରେ ଏକ ଡେକ୍ଚି ଭିତରୁ ସଂପୃକ୍ତ ୫ ଫୁଟିଆ ନାଗ ସାପକୁ ଧରିଛନ୍ତି ।